ۇسىنىس ەتىلگەن ءتىلشى المات عابدىلاحات ۇلى حابارلايدى جۋىقتا قوبىقسارى موڭعۇل اۆتونوميالى اۋدانىندا وتكەن 2017 -جىلعى تارباعاتاي ايماقتىق تۇڭعىش رەتكى قازاق كۇرەسى جارىسىندا تولى اۋداندىق كاسىپتەن سىرتقى جاس وسپىرىمدەر كومانداسى اعالاپ العا شىعىپ، كوللەكتيۆ 1 -دارەجەلى سيلىقتى جەڭىپ الدى.
قازاق كۇرەسى قازاق ۇلتىنىڭ ەرتەدەن بەرى جالعاسىپ كەلە جاتقان ءداستۇرلى دەنە تاربيە ارەكەتى، ۇلتىمىزدىڭ ەر، ايەل، كارى، جاس دەمەي قىزىعا تاماشالايتىن ۇلتتىق ءتۇسى قويۋ، زامانعا سايكەسكەن ۇلتتىق ونەرى. ۇلتىمىزدىڭ توي-تومالاعى،مەرەكە مەيرامى كۇرەسسىز وتپەگەن،جاس جىگىتەرىمىزدىڭ جىگەرىن جانىپ،كۇشىن سىنايتىن سىنعا ءتۇسىپ سىنالاتىن، نە ءبىر اتانجىلىك پالۋانداردى بارلىققا اكەلگەن ۇلتتىڭ اسىلى. قازاق كۇرەسىن جالپىلاستىرۋ، دامىتۋ، ات سالىسۋ بارلىق ازاماتتاردىڭ بۇلتارتپاس بورىشى. قازاق كۇرەسى تارباعاتايداعى ءار ۇلت حالقى قىزىعا تاماشالايتىن دەنە تاربيە ارەكەتى بولىپ قالماستان دۇنيە جۇزىندەگى كوپتەگەن مەملەكەت پەن حالىق جاقسى كورەتىن دەنە تاربيە جارىس ءتۇرى، قازىر دۇنيە جۇزىلىك جارىس تۇرىنە ەنگىزىلىپ دۇنيەگە بەت الىپ بارادى.
بۇل رەتكى قازاق كۇرەسى جارىسىنا قاتىناسقان جاس وسپىرىمدەر كومانداسىن اۋداندىق دەنە تاربيە كوميتەتىنىڭ جاتتىقتىرۋشىسى راۋشان راۋاپ قىزى ءوزى باس بولىپ ۇستاپ ۇزبەي جاتتىقتىرىپ كەلەدى.
ۇعىسۋعا قاراعاندا، بۇل كوماندا مۇشەلەرىنىڭ جاسى 10 جاستان 16 جاس ارالىعىنداعى جاس وسپىرىمدەر،قىزدار كومانداسى جانە ۇلدار كومانداسى بولىپ ەكى كومانداعا بولىنەدى. ولار راۋشان مۇعالىمنىڭ جەتەكشىلىگىندە تىنباي جاتتىعىپ كۇرەس قاعيداسىن، كۇرەس ونەرىن يگەرىپ، جاپالى جاتتىعۋلار جاساپ، ايماقتىق جارىستا 12 التىن مەدال، 4 كۇمىس مەدال، 3 قولا مەدال الىپ، كوللەكتيۆ 1 -دارەجەلى بولىپ ماراپاتتالدى. الدا تامىز ايىندا اۆتونوميالى رايوندىق قازاق كۇرەسى جارىسىنا ايماق اتىنان قاتىناسۋعا ساقاداي سايلانىپ وتىر ەكەن.
رەداكتورى : اراي ەركىن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى