ماقسات قيزات ۇلى حابارلايدى. -الاقاي، جەڭگەلەر، اۋىلعا جاڭالىق كەلىپتى، ەندى جۇمىسسىز جۇرمەيتىن سياقتىسىڭدار.
-وي،اۋزىڭا ماي اينالايىن،نە جاڭالىق ەكەن ءا، ۇيدە وتىرا بەرىپ ومالىپ قالدىق قوي. نە تاپقان كىرىس، نە ىستەگەن جۇمىس جوق،وتىرساڭ وپاق،تۇرساڭ سوپاق دەگەندەي.
-ۇيدە جۇرسەڭ تۇك ىستەمەگەندەي كورىنەدى ەكەنسىڭ، قاي كۇنى ەنەم: كەلىنجان،بوسقا قاراپ جۇرگەنشە، قالادان جۇمىس ىستەگەندەرىڭ ءجون عوي،-دەپ ەمەكسىتىپ قانا قويدى. ەمەكسىتۋدىڭ ارجاعىندا ەڭبەك ىستەمەدىڭ دەگەندەي ىم جاتىر.
-سەنىڭ ەنەڭ ەستى ەكەن، «ءبىز سىرتقا شىعىپ جۇمىس ىستەيىك»،- دەپ ەدىك، «قالادا نەلەرىڭ بار، وسى اۋىلدا بولىڭدار، بالاڭدى باعىپ، كۇيەۋىڭنىڭ تاماعىن ىستەپ وتىرساڭ بولدى»،- دەپ تيىپ تاستاعانى. ۇلكەن كىسى ءبىزدىڭ سىرتقا شىعىپ ەڭبەك ىستەۋىمىزدەن الاڭدايدى. قايتەدى ەندى، ءوزى دە جالعىزسىراپ قالادى عوي. قولايلى جۇمىس بولسا، وسى اۋىلدان-اق ىستەي بەرسەك ءجون ەدى.
-نە جاڭالىق دەيسىڭدەر عوي، ءبىز ەندى كىلەم توقيتىن بولىپپىز، حوتاننان ارنايى كىلەم توقۋدى ۇيرەتەتىن مامان كەلىپتى، ايماقتىق بىرلىكساپ، ايماقتىق ءدىن، ۇلت ىستەرى كوميتەتىنەن قىستاعىمىزعا تۇسكەن كادر اعالارىڭ اۋىل ايەلدەرىن كاسىپتەندىرۋدى قولعا الىپتى.
-مىناۋ كەرەمەت جاڭالىق ەكەن، اۋىل تۇگىل قازىرگى كۇنى قالامىزدىڭ وزىندە كىلەم توقيتىن ايەلدەر از ەمەس پە،
-قايتكەن كۇندە دە ۇيرەنىپ الايىق، كىلەم توقۋ ەكىنىڭ قولىنان كەلە بەرمەيتىن كاسىپ قوي. وگىز اتتاي جەلمەيدى، وراي ەكى كەلمەيدى دەگەن ەمەس پە. الدىڭعى ايدا ۇرىمجىگە بارىپ كىلەم الايىن دەسەم، بەس سىرماقتىڭ قۇنىن سۇرايدى، ۋداي قىمبات ەكەن عوي. دەگەنمەن كىلەم توقىپ ساتساڭ پايداسى ءبىز ويلاعانداي از ەمەس پە ەكەن دەپ قالدىم.
بۇل شاۋەشەك قالاسىنىڭ قاراقاباق اۋىلى فەرما قىستاعىندا تۇراتىن اۋىل ايەلدەرىنىڭ «حوتاننان كىلەم توقۋدى ۇيرەتەتىن ۇستاز كەلىپتى، اۋىل ايەلدەرىن كاسىپتەندىرۋگە جەتەلەيدى ەكەن»،-دەگەن ءسوزدى ەستىگەن كەزدە اعىتقان جۇرەك سوزدەرى ەدى.
مىنە وسىلاي 10-مامىر قاراقاباق اۋىلىنىڭ فەرما قىستاعىندا تۇراتىن، كاسىپتەنسەم، ۇيرەنسەم، تىرلىگىمدى تىڭايتسام دەيتىن 50 دەن استام اۋىل ايەلدەرى قىستاققا تۇسكەن قىزمەت اترەتىندەگى ىسكەر كادرلاردىڭ باستاۋىندا قىستاق كوميتەتىنىڭ اۋلاسىنان اشىلعان ونەرگە تاربيەلەۋ وتاۋىنا وڭ اياقتارىمەن ىرىمداپ كىردى.
بارلىعىنىڭ كوكەيىندە كىلەمدى كەرەمەتتەي توقىساق دەگەن كوركەم نيەت بار.
ۇلكەن ءىس ادەمى ويدان باستاۋ الادى ەمەس پە، جۇمىسقا ەپتى اۋىلداعى جەڭگەلەرىمىز كىلەم تىگۋ ونەرىنە ىنتى-شىنتىسىمەن كىرىستى.
«كادرلار قىستاعىمىزعا كەلگەننەن بەرى كوپ جۇمىستاردى تىندىردى. حالىقتى بەرەكەگە شاقىرىپ، جاستاردى ەڭبەككە باۋلىدى، ەندى مىنە اۋىل ايەلدەرىن كاسىپتەندىرۋدى ويلاستىرىپ، تۋ الىستان كىلەم توقۋدى ۇيرەتەتىن ۇستازدى ارنايى شاقىرتىپتى. وزگەلەر مۇنداي وزىق ونەردى اقشا بەرىپ ۇيرەنسە، ءبىز اقىسىز ۇيرەنىپ جاتىرمىز. مەن بۇرىن ۇيدە كەستە تىگەتىنمىن، سانى از، ساپاسى سىن كوتەرمەيتىن ەدى، بازارعا اپارىپ ساتقانىممەن قۇنى تومەن ەدى. ەندى مىنە جارقىراتىپ كىلەم توقۋدى ۇيرەنىپ جاتىرمىز. ۇيرەنۋ، توقۋ سەندەردەن بولسىن، كىلەمنىڭ بازارداعى ساتىلىمىن ءبىز قاراستىرامىز، وعان قام جەمەڭدەر، تەك ادەمىلەپ توقي بىلسەڭدەر، بۇدان تاباتىن ناپاقالارىڭ از بولمايدى،-دەپ جەلپىندىرىپ جاتىر كادرلار، اعالارىمىزدىڭ ايتقانى ايداي كەلەتىنىنە سەنەمىز. ءبىز كىلەم توقۋدى كوڭىل قويىپ ۇيرەنەمىز»-دەيدى كىلەم توقۋعا قاتىناسقان كەستەشى اپەكەمىز گىميڭگۇل.
قاراقاباق اۋىلىنىڭ فەرما قىستاعى حانزۋ، حۇيزۋ،قازاق،داعۇر،موڭعۇل قاتارلى كوپ ۇلتتان قۇرام تاپقان بەرەكەلى شاڭىراق. 600 دەن استام جان سانى بار قىستاقتىڭ نەگىزگى تۇرعىنى قازاق ۇلتى، مال شارۋاشىلىقتى نەگىز ەتەتىن قىستاقتىڭ جان باسىندىق كىرىسى ەل ويلاعانداي تىم شىركىن-اي ەمەس. تۇرعىندار جالاڭ مال شارۋاشىلىقتى مىسە تۇتاتىندىقتان، جان باسىندىق كىرىسىن تەزدەن جوعارىلاتۋعا قاۋقارسىز، بۇل قاۋقارسىزدىقتى قىزمەت اترەتىندەگى كوپشىل كادرلار قاجىر مەن قايراتقا، قازىنا مەن قۋاتقا اينالدىرۋعا قۇلشىنا كىرىستى.
قىزمەت اترەتى قىستاققا كەلە سالا تۇرعىنداردىڭ وتباسىنا كىرىپ،حال-جاعدايىن ۇعىستى. ءبىر ايدان استام تەكسەرىپ-زەرتتەۋ بارىسىندا قىستاق ايەلدەرىنىڭ كوپ ساندىسىنىڭ وتباسىندا جۇمىسسىز وتىرعانىن بايقادى. ونسىزدا قىستاق ايەلدەرىنىڭ سىرتقا شىعىپ كۇندىك ىستەۋى نەمەسە قالاعا بارىپ جۇمىس تابۋى مۇمكىن ەمەس ەدى.
«قوعام ورنىقتىلىعى مەن باياندى تىنىشتىق باس نىساناسىنان اۋىتقىماي، حالىقتى كەدەيلىكتەن قۇتىلدىرىپ، اۋىل ادامدارىن جۇمىسپەن قامتۋ نەگىزگى قىزمەتىمىزدىڭ ءبىر پاراعى،ءبىز قىستاقتاعى جەلەكتىلەردىڭ ىنتاسىن بايقاپ، كىلەم توقۋدى، سول ارقىلى كاسىپ كوزىن اشۋدى قولعا الدىق. مىنە ءبىر اپتاداي ۋاقىت بولىپ قالدى،اۋىل ايەلدەرىنىڭ ۇيرەنۋ ناتيجەسى ايتارلىقتاي،كىلەممەن باستالعان كاسىپتىڭ كوپ كوسەگەسىن كوگەرتەتىنىنە سەنەمىز، ءبىز تەك كۋرس اشۋمەن توقتالمايمىز، كەلەسى كەزەكتە كىلەم توقۋ كووپەراتيۆىن قۇرىپ،كەرەگەمىزدى كەڭگە جايامىز»،-دەيدى قىزمەت اترەتىنىڭ باستىعى ۋاڭ گۋاڭشىڭ.
رەداكتورى: اراي ەركىن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.