سانجى قالاسىنداعى ءبىر شوفەر شاعان مەرەكەسى كەزىندە اراق ىشكەننەن كەيىن اۆتوكولىك جۇرگىزىپ، قاتىناس شىرعالاڭىن تۋدىرىپ، قۇنى 3 ميلليون 200 مىڭ يۋاندىق مەرسەدەس ماشينانى كەرەكتەن شىعارادى. اۆتوكولىك وزىنىكى ەمەس، قايتا سەرىكتەستىككە ءتان ەدى. جۋىقتا ءتىلشى بۇل شوفەر زاڭنىڭ قاتاڭ جازاسىنا ءدوپ كەلۋمەن بىرگە، قىرۋار تولەم تولەيتىندىگىن دە ءبىلدى.
شىرعالاڭ بيىل 30 - قاڭتاردا، ياعني كوكتەم مەرەكەسىنىڭ 3 - كۇنى تۋىلعان، سول كۇنى ساعات 21 دەن 53 مينۋت وتكەندە، سانجى قالالىق قوعام حاۋىپسىزدىگى مەكەمەسى قاتىناس ساقشى ۇلكەن اترەتى سانجى قالاسى سانگۇڭ قالاشىعىندا قاتىناس شىرعالاڭى تۋىلىپ، اۆتوكولىكتەگى 2 ادام جارالانعاندىعى جونىندەگى دەلو مالىمەتىن تاپسىرىپ الادى. قاتىناس شىرعالاڭىن ءبىر جاقتى ەتۋگە جاۋاپتى ساقشىلار شىرعالاڭ تۋعان جەرگە بارعاندا، سانجى قالاسى سانگۇڭ قالاشىعى چۇنگۋاڭ 7 - اترەتىنىڭ جول اۋىزىنداعى بۇرىلمادا مەرسەدەس ماشينانىڭ جولدىڭ وڭتۇستىك جاق شەتىنە شىعىپ كەتكەنىن، اۆتوكولىكتىڭ اۋىر دارەجەدە بۇلىنگەنىن، جول جاعاسىندا توك كەرنەۋىن وزگەرتكىش ساندىعى ورناتىلعان ەلەكتر باعاناسىنىڭ سىنعانىن بايقايدى. دەلونى مالىمدەگەن اۆتوكولىكتىڭ شوفەرى رىن xx ساقشىلارعا ءوزىنىڭ دوسى ۋاڭ xx پەن ياڭ xxتى الىپ سانگۇڭ قالاشىعىنا شاعانشىلاي بارا جاتىپ، شىرعالاڭ تۋىلعان جەردەگى بۇرىلماعا جەتكەندە اۆتوكولىك قارقىنى تەز بولعاندىقتان، اۆتوكولىكتى مەڭگەرە الماي جولدىڭ شەتىنە شىعىپ كەتكەنىن، وسى بارىستا ەلەكتر باعاناسىنا سوعىلعاندىعىن ايتادى.
قاتىناس شىرعالاڭىن ءبىر جاقتى ەتۋگە جاۋاپتى ساقشىلار رىن xxتىڭ ابىرجىپ تۇرعانىن بايقاپ، دەرەۋ دەنەسىندەگى سپيريت قۇرامىن تەكسەرەدى، ونىڭ ءار 100 ميلليليتر قانىنداعى سپيريت قۇرامىنىڭ 97 ميلليگرامعا جەتىپ، ماس بولىپ اۆتوكولىك جۇرگىزگەنى بايقالادى دا، ساقشىلار دەرەۋ ونى سانجى قالالىق جۇڭگوشا شيپاگەرلىك شيپاحاناسىنا اپارىپ قان الدىرىپ تەكسەرتەدى.
تەكسەرۋ ارقىلى سول كۇنى رىن xx ۋاڭ xx، ياڭ xxپەن بىرگە قالا ىشىندەگى ءبىر اسحانادا باس قوسىپ، اراق ىشكەندىگى، رىن xxتىڭ شينجياڭداعى ءمالىم ءبىر سەرىكتەستىكتىڭ شوفەرى ەكەندىگى، اۆتوكولىك سەرىكتەستىككە ءتان بولىپ، قۇنى 3 ميلليون 200 مىڭ يۋانعا جەتەتىندىگى انىقتالادى.
ۇعىسۋعا قاراعاندا، شىرعالاڭنىڭ تۋىلۋىنا اراق ءىشىپ ماس بولۋ سەبەپ بولعان، مۇندايدا قامسىزداندىرۋ سەرىكتەستىگى اۆتوكولىكتى جوندەۋدىڭ ەشقانداي اقىسىن تولەمەيدى. الداعى كەزدە رىن xx زاڭدىق جازاعا تارتىلۋمەن بىرگە، قىرۋار تولەم تولەۋگە ءدوپ كەلگەن.
اراق ىشكەن سوڭ اۆتوكولىك جۇرگىزبەۋدى، اۆتوكولىك جۇرگىزسەڭىز اراقتان اۋلاق بولۋدى استە ەستەن شىعارماڭىز!
اۋدارعان - ورال قاسەيىن ۇلى
رەداكتورى: اراي ەركىن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.