ەەڭ جاڭا مازمۇندار
جۇڭگو كوممۋنيستىك پارتياسى ورتالىق كوميتەتى ساياسي بيۋروسى ءماجىلىس اشتى
اۋلا شارۋاشىلىعىن دامىتۋ،كەشكى بازار ەكونوميكاسىنىڭ ومىرشەڭدىك كۇشىن قاۋلاتۋ،نان كاسىبىنىڭ اناعۇرلىم جاقسى،اناعۇرلىم تەز دامۋىن كۇش سالا ىلگەرىلەتۋ كەرەك
2020-جىلى 7-ايدىڭ 2-كۇنى 136-سان
كاسىپ قۇرىلىمىن رەتتەپ،كىرىستىڭ ارتۋىن جەبەدى
تارباعاتاي كاسىپتىك تەحنيكا شۋەيۋانى ۆيۋەسكا ءىلدى
شينجياڭ جۇڭتاي توبى ۋاكىلدەر ۇيىرمەسى ايماعىمىزدا تەكسەرۋ جۇرگىزدى
ايماق ورگاندار پارتيا قۇرىلىسى قىزمەتى ءماجىلىسىن اشتى
ءدوربىلجىن اۋدانىنداعى قىستاق تۇرعىندارى شارۋاشىلىق قۇرۋ،جۇمىستانۋ جاعىندا كوپ تيىمدىلىككە كەنەلدى
جۇمىستانۋعا تاربيەلەۋ تەحنيكالىق شەبەرلىكتى جوعارىلاتتى
جەردى قورعاۋ ورتاق جاۋاپكەرشىلىگىمىز
شاعانتوعاي 3900 اۋىل-قىستاق تازالىق دارەتحاناسىن سالىپ،قونىس ورتاسىن جاقسارتپاقشى
اۋەلگى ماقساتتان اينىماي،بورىش ارقالاپ،ماڭگى كۇرەس جۇرگىزەمىز
اۋەلگى ماقساتتان اينىماي،بورىش ارقالاپ،ماڭگى كۇرەس جۇرگىزەمىز
2020-جىلى 7-ايدىڭ 1-كۇنى 135-سان
پارتيانىڭ مەيىرىن جىرلاپ،اۋەلگى ماقساتتان اينىمادى
شي جينپيڭ تاسقىننان ساقتانۋ،اپاتتان قۇتقارۋ قىزمەتى جونىندە ماڭىزدى نۇسقاۋ بەردى
قول ۇستاسا وتىرىپ ۇكىمەت،بانكە،كاسىپورىن سەلبەستىگىنىڭ ۇلگىسىن قالىپتاستىرىپ،سەلبەستىك ورناتىپ،ءوزارا پايدا جەتكىزىپ،تەڭ يگىلىككە كەنەلۋدىڭ جاڭا پاراعىن بىرگە جازۋعا كىرىستى
پارتيالى كادرلار قىستاق تۇرعىندارىنىڭ ماقسارى گۇلىن تەرۋىنە كومەكتەستى
بوس تۇرعان اۋلا كىرىس باقشاسىنا اينالدى
پارتيا مۇشەلەرى مەن كادرلار ۇزدىكتەردەن ۇيرەنىپ، ىشكى قوزعاۋشى كۇشتى تاسقىنداتتى
پانجياجۋاڭ قىستاعى ۇشقىشسىز ۇشاقپەن ءدارى شاشىپ،ەڭبەككۇش پەن ۋاقىتتى ۇنەمدەدى
جابايى كەندىردى وتادى
باعىمشىلىقپەن شۇعىلدانىپ اۋقاتتانۋ جولىنا ءتۇستى
تاماعىنا سۇيەك تۇرىپ قالعان بالانى شۇعىل قۇتقاردى
جالپاق شاپتولدىڭ حوش ءيىسى اڭقىپ،شارۋا وتباسى شاتتىققا شومدى
«1-شىلدەنى» قارسى الىپ،پارتيانىڭ مەيىرىن جىرلاپ،اۋەلگى ماقساتتان اينىمادى
بال اراسى اۋىل شارۋاشىلىق وندىرىسىنە كومەگىن تيگىزدى
ەركىن تۇنياز ايماعىمىزدا تەكسەرۋ-زەرتتەۋ جۇرگىزدى
اۆتوكولىك تۇتىنۋىن ورنىقتى ۇلعايتايىق
جاڭا نۇسقاداعى سالىق جيناۋ تيىمدىلىك ساياساتى باعدارناماسى جاريالاندى!

قوبىقتاعى قۇرىش قالاي شىنىقتى

جولدانعان ۋاقىتى : 2017/6/7 13:35:39

ماقسات قيزات ۇلى




 
   -سابانى پىسە،پىسە بىلەك تالدى، بۇرىنعىداي وزدەرىڭ قۇساپ پىسپەكتىڭ جانىن شىعاراتىن بالا قالمادى عوي.

   -ماڭايدا كورشىنىڭ بالالارى ءورىپ ءجۇر، سولارعا ءتاتتى بەرسەڭ تاڭ اتقانشا ءپىسىپ بەرەر.

   -وسى كۇنگىنىڭ بالالارىنا ءتاتتىنى تاڭداپ ەمەس، ۋىستاپ بەرسەڭدە پىسپەيدى، بۇلار قۇرت-ماي جەۋگە بار   ەكەن دە، سابا پىسۋگە جوق ەكەن، بىرەۋى دە ماڭىما جولامايدى. ىشىنە تاس ساپ قويعان سياقتى اۋىر ەكەن،-دەپ كەشە بىرەۋى قۇرت-مايىمدى جەپ الدى دا، تايىپ تۇردى.

  -سابا پىسەتىن جان قالماسا، ساۋىندى دوعارىڭىز، جەلىنى بوساتىڭىز، قاسقا  سيىرعا قوش ايتىڭىز.

  -ءتايت ارى، سابا تولى ىركىتتەن قۇرت-ماي الىپ، سەندەردى جەتكىزىپ ەدىك قوي، وڭ مەن سولىڭ بۇتىندەلگەن سوڭ سابا بايقۇس ساسىق سەزىلگەن   ەكەن ءا. بىلە بىلسەڭ بۇل سابانىڭ قۇنى كۇن وتكەن سايىن ارتىپ كەلەدى، قازىر ءبىر كيلوگرام قۇرتىڭ 80 يۋان، سارى مايىڭ 100 يۋانعا شىقتى، سابانىڭ قىزىعىن ەندى كورگەلى وتىرعاندا، قوش ايت دەپ دەپ قويادى ماعان، ويتكەنشە مىنا كەمپىردىڭ ساباسىن قايتكەندە توقتاۋسىز پىستىرىپ، ءونىمدى مولىنان الامىز،  ويلانساڭدار نەتتى،-دەپ شەشەم    كادىمگىدەي رەنجىپ-اق قالعانى.

  قانشا جەردەن وقىدىم-توقىدىم، جۋرناليست اتانىپ،جۇرت كوزىنە ءتۇستىم دەگەنىممەن، ساۋىنشى انامنىڭ قولىن   اعاش پىسپەكتىڭ ازابىنان قۇتىلدىرا الماعانىما ءىشىم اشىپ كەتتى.

  ويلانىپ قالا بەردىم.
※      ※       ※
  وتكەن ايدىڭ باسىندا ساۋىردىڭ كۇنگەيىندە تىلشىلىك ساپارمەن جۇرگەنىمدە، قوبىقسارى موڭعۇل اۆتونوميالى اۋدانىنىڭ ۇگىت بولىمىندە ىستەيتىن ەلگەزەك كادر ەرجان توقتاسىن ۇلى: اعا، ۇلتىمىزدان شىققان كاسىپكەرلەر جايلى ماقالا جازۋعا قۇشتار ەدىڭىز،ءبىزدىڭ اياداي اۋداندا اجەپتاۋىر جاڭالىق جاراتىپ، حالىق ءۇشىن يگىلىكتى ءىس تىندىرىپ جاتقان ءبىر ونەر يەسى بار ەدى، قۇلقىڭىز شاپسا، سوعا كەتىڭىز،-دەپ ءوتىنىپ ەدى.

  -باۋىرىم-اي، بىزدە جاڭالىق جاراتتىم دەپ پاتەنت ۇقىعىن العاندار از ەمەس. ءبىراق سونىسىن كادەگە جاراتقاننان   گورى، ساندىقتىڭ تۇبىنە سارعايتىپ   قوياتىندار كوپ، ايتقانىڭ سونداي جاننىڭ ءبىرى بولسا، اتتىڭ باسىن ىركە تۇرعانىمىز وڭ. پاتەنتىنە جان ءبىتىپ، جۇرت  يگىلىگىنە جاراعان كۇنى كەلەرمىن،-دەپ مەن ويىمدى اشىق ايتتىم.

  -ءبالى،ءسىز وزىڭىزشە مەنسىنبەي وتىرسىز ءا، بۇل كىسى مالشىلارىمىزدىڭ تۇرمىسىنا ۇلكەن جەڭىلدىك اكەلگەن تەحنيك دەسەم دە بولادى.

     قازىرگى كۇنى بۇل كىسىنىڭ توك پىسپەگىنە ءتانتى  بولماعان ساۋىنشى نەكەن-ساياق. كۇنى كەشە عانا كۇنەس اۋدانىنان ازامات دەيتىن اعامىز 50 پىسپەكتى ساباسىمەن قوسا الىپ كەتتى، ارنايى بيە بايلاپ، قىمىز اشىتاتىن كاسىپكەر كىسى ەكەن، توك پىسپەكتى كورگەندە كوزى شىراداي جاندى، «30 بيەنىڭ ساۋمالىن پىسەمىز دەپ اۋىلدىڭ قاتىن-قالاشى مۇرنىنان شانشىلدى، توك پىسپەكتى تاپقىرلاعان ميىڭنان اينالايىن»،-دەپ كادىمگىدەي رازى بولىپ قايتتى. توك پىسپەكتىڭ بازارعا شىققانىنا دا انىق 3 ايدىڭ ءجۇزى بولعان جوق، بازارداعى باعى اشىلىپ-اق كەلەدى دەگەن ءسوزدى ەستىگەنىمدە ەلەڭ ەتە قالدىم.

  وزگەنى قويشى، «ايتقانى ايداي كەلسە ەكەن، تىم قۇرىعاندا شەشەمنىڭ قولىن پىسپەكتەن بوساتىپ، ءبىر جىرعاتىپ   قالاتىن» دەگەن ويدىڭ تاباندا تۋا    قالعانى.

  «ءىنىم مەن كاسىپكەر ەمەسپىن، كىتاپتىڭ اراسىندا ەرجەتكەن ۇلمىن، مەن قازىر اۋداندىق كىتاپحانانىڭ جاۋاپتىسىمىن، وسى كىتاپحانانى گۇلدەندىرۋ بورىشىم، قالا بەردى تەحنيكا مەن ونەرگە قىزىعامىن، كوپ ۋاقىتىمدى جوبالاۋ مەن زەرتتەۋگە ارنايمىن» دەپ قازاقتىڭ قوي كوزدى، قىزىل شىرايلى ادەمى جىگىتى ءوزى جايلى ماعلۇماتتى جايلاپ تۇسىندىرە باستادى.

  «قۇرىش»،-دەگەن ەسىمىڭىز ادەمى ەكەن. ەندەشە،ەل-جۇرتىڭىزعا قوبىقتاعى قۇرىشتىڭ قالاي شىنىققانىن، توك پىسپەكتى قالاي تاپقىرلاپ، قالاي بازارعا سالعانىن ايتىپ بەرىڭىز،-دەدىم سۇراعىمدى توتەسىنەن قويىپ.

  -شاماسى 3 جىلدىڭ الدى بولار،ءبىر ءۇيلى جان ۇيدە شۇيىركەلەسىپ وتىرعانبىز، 9 جاستاعى قىزىم ءداننار ۇستەلدىڭ ءبىر شەتىندە ساباق قاراپ وتىرعان، كەنەت توك كەتىپ قالدى. لەزدە اينالانى قاراڭعىلىق باستى. «بۇگىن تاپسىرمانى  ورىنداماسام مۇعالىم ۇرسادى» دەپ قىزىم جارىق ىزدەپ شارق ۇردى. ۇيدە جارىق بولارلىق ەشتەڭە تابىلمادى، سودان اتاسى ءداننارعا قالتاسىنان كىشكەنتاي پروجەكتور الىپ شىعىپ، مىنانى قۇلاعىڭا قىستىرىپ الساڭ، جازۋدى كورە الاسىڭ دەپ جارىق سيلاعانداي بولدى.

   اتاسى بىردەڭەنى بىلەدى ەكەن، قىزىم تاپسىرماسىن كىشكەنتاي پروجەكتوردىڭ ارقاسىندا ورىنداپ شىقتى.

  ەرتەسى قىزىم: اكە، اتامنىڭ كەشەگى پروجەكتورى ماعان ءبىر وي سالدى، مەن وزگەشە ءبىر كوز اينەك جاساۋدى ويلاپ قالدىم، كەيبىر كەزدە قالادا توكسىز قالاتىن جاعدايلار كەزىگەدى، اسىرەسە شارۋاشىلىقتى وڭىردە توك بىردە بار، بىردە جوق قوي،سونداي كەزدە جارىق شىعاراتىن كوز اينەك بولسا،بالالاردىڭ    تاپسىرما ورىنداۋىنا،كىتاپ وقۋىنا كوپ كومەگىن تيگىزەر ەدى،-دەدى.

  مەن قىزىمنىڭ تاپقىرلىعىنا ءتانتى  بولدىم.

  تالاپتىڭ تايىنا ءمىندىم، قىزىمنىڭ   قىراعىلىعى شابىت سيلادى، ەكى قۇلاعىندا ەكى جارىعى بار، تۇندە ساباق قاراۋعا بولاتىن پروجەكتوردى جاساۋدى قولعا  الدىم. جارىم جىل دەگەندە جاڭالىعىمىز قاز تۇردى. قىزىمنىڭ اتىندا پاتەنت ۇقىق  الدىق. كەرەكتى تاپقىرلىقتىڭ كۇرەسىندە جاتقان جەرى بارما، وزىندىك ارتىقشىلىعى مول زاماناۋي كوز اينەكتى بازارعا   سالىپ،150 مىڭ يۋانداي پايدا تاپتىق.  مىنە، بۇل كىشكەنتاي ويدان وربىگەن جاڭالىعىمىزدىڭ باسى ەدى.

  «تاپقىرلىقتى ومىرگە اكەلىپ، ونى   پاتەنتتەپ قويۋمەن جۇمىس بىتپەيدى. ەڭ ماڭىزدىسى سول تاپقىرلىقتان قۇن جاراتۋ. وسى قاعيدا مەنى ورگە باستادى»،- دەيدى قوبىقسارى موڭعۇل اۆتونوميالى   اۋدانىنىڭ يكىۇتىبۇلاق مال فەرماسىنان تۇلەپ ۇشقان تالانتتى تاپقىرشى قۇرىش جۇمابەك ۇلى اڭگىمەسىن ارى قاراي  جالعاپ.

  -اۋىل، اۋداندا قاي قازاقتىڭ تۋىسى مالشى ەمەس دەيسىڭ، وسى مالمەن   كوسەگەمىزبەن كوگەرىپ، وسى مالمەن جانىمىزدى اسىراپ وتىرعان ەل ەمەسپىز بە، مال شارۋاشىلىعىنا شىنداپ ءمان بەرگەن جاننىڭ قالتاسى ءاماندا قالىڭ بولعان. ءوزىڭىز ءبىلىپ وتىرسىز، بۇل كۇندە   ادامداردىڭ جاسىل ازىقتىققا دەگەن سۇرانىسى بارعان سايىن ۇدەپ كەلەدى.

   ءسۇت ونىمدەرىنىڭ بازارداعى باعىن اشاتىن كەز كەلدى.

  نەگىزگى ساتىنى ارالاۋ بارىسىندا   ساۋىنشى اپايلارىمىزدىڭ سابا ءپىسىپ قينالىپ، اعاش پىسپەكتىڭ «قۇلىنا» اينالىپ كەتكەنىن كوردىم.

  سودان «قايتكەن كۇندە دە، ادام   كۇشىنە سۇيەنبەيتىن، جۇمىس قۋاتى مول توك پىسپەك تاپقىرلاۋ كەرەك ەكەن عوي» دەگەن ويعا كەلدىم.

  ينتەرنەتتەن توك پىسپەكتى ىزدەدىم، ىشكى موڭعۇلدىڭ حوحود قالاسىندا ءمالىم ءبىر كاسىپورىننىڭ تاپقىرلاعان پىسپەگىن كورىپ، 200 داناسىن توراپتان الدىردىم، وكىنىشتىسى اسپاپ ويىمىزداعىداي بولمادى، سابانى ۇزاق پىسە المايدى ەكەن، باستى كەمشىلىگى _ ىركىتتەگى مايدى تولىق ايىرا المادى.

  2013-جىلدىڭ جازىندا توك پىسپەكتى سوڭىنا ارنايى «شىراق الىپ ءتۇستىم».  العاش رەت ماتەريالى اعاش بولعان توك پىسپەكتى تاپقىرلاپ شىقتىم. سول جىلدىڭ كۇزىندە جۇڭگو ءبىلىم مەنشىك ۇقىعى ورتالىعىنا توك پىسپەگىمدى پاتەنتتەۋگە جولدادىم.

  ورتالىق تاپقىرلىعىمدى ولقىسىنبادى، پاتەنت ۇقىق كۋالىگىن بەردى.

  «پاتەنت ۇقىق كۋالىگىن الدىم»،- دەپ مارقايعانىممەن،بۇل تابىسقا جەتەر   جولدىڭ تابالدىرىعى عانا ەكەن.

  2015-جىلى پاتەنتتەلگەن پىسپەگىمدى تاجىريبەدەن ارنايى وتكىزىپ العاسىن، حاڭجوۋ قالاسىنا قاراي تارتتىم. ول  جەردەگى زاۆود ماعان توك پىسپەكتىڭ  سىرتىن جاساپ بەردى دە،ىشكى موتورىن شاڭحايعا اپارىپ جاساتىپ كەل دەپ جولعا سالدى. سونىمەن ىشكى ولكەدەگى قاڭعىرعان كۇندەرىم باستالدى. ءبارىن جىپكە تىزگەندەي بايانداپ بەرۋىمنىڭ نە قاجەتى بار دەيسىڭ ءىنىم،سونىمەن ايتەۋىر  كۇندى تۇنگە جالعاعان سارپالداڭ سارى   ءجۇرىس، تولاسسىز سىناق پەن تاجىريبەنىڭ ناتيجەسىندە،2016-جىلدىڭ اقپانىندا 1-ۇرپاق توك پىسپەك ومىرگە كەلدى.

  زاۆودتان جاساتىپ اكەلىپ، ىسكە قوسقانىمىزدا توك پىسپەگىمىزدىڭ جۇمىس ىستەۋ قۋاتى ازەر دەگەندە 6 ساعاتتان استى.

  تاپقانىمنىڭ ءالى دە ءبىر قايناۋى  ىشىندە ەكەنىن ءتۇشىندىم. بۇل ۋاقىتتا مەن حاڭجوۋ مەن ءۇرىمجىنىڭ اراسىنا 17 رەت قاتىناپ،جول قاراجاتىمنىڭ وزىنە 120 مىڭ يۋان اقشا جۇمساپ بولعان ەدىم.

  «باستاعان سوڭ تاستاما» دەگەن حالقىمىزدىڭ قاراپايىم بولسا دا قادىرلى ءسوزىن بويتۇمار ەتتىم،ىزدەگەنىمدى  ىندەتە زەرتتەۋگە بەل بۋدىم.

  جارىم جىل تاپجىلماي قايتا-قايتا   تاجىريبەدەن وتكىزىپ ءجۇرىپ، اقىرى 24 ساعات ۇزدىكسىز اۆتوماتتى قىزمەت  ىستەيتىن، ارنايى تەڭشەۋ كنۋپكاسى بار توك پىسپەكتى 2016-جىلدىڭ ماۋسىمىندا جاساپ شىقتىم.

  ءوزىڭ كورىپ تامسانىپ وتىرعان ساباسى مەن پىسپەگى، ويۋى مەن جوباسى سايكەسكەن توك پىسپەگىمىزدىڭ جاسالۋ جاعدايى قىسقاشا مىنە وسى. بىلاي قاراعاندا قاراپايىم بولعانىمەن، بۇل ءوزى 18 قۇرىلعىدان قۇرالادى،ءار قۇرىلعىسىنا ءبىر قالىپ جاساتتىق،18 قالىپقا 337 مىڭ يۋان اقشا كەتتى، سەح قۇرۋعا 40 مىڭ يۋان جۇمسادىق. پىسپەكتىڭ باسىن زالالسىز كاۋچىكتەن جاسادىق، وعان دا از قارجى كەتپەدى،بارلىعىن جيىپ كەلگەندە ءبىر ميلليوننان ارتىق قارجى جۇمسالدى.

  «كىتاپحانادا كىتاپ كەمىرىپ، حالىققا رۋحاني ازىق باعىشتايمىن دەپ ارمان قۋىپ جۇرگەن ازاماتتىڭ قولىنان وسىنشاما قارجى قايدان كەلدى» دەپ ويلاپ وتىرعان بولۋىڭىز كەرەك.

  ءبىزدىڭ دە باستى اۋىرتقان وسى شارۋا-تۇعىن.

  مەن «بەرەكە _ ءتۇبى مەرەكە» دەگەن ءسوزدى توك پىسپەكتى جاساۋ بارىسىندا ءتىپتى دە تەرەڭدەپ تۇسىنگەندەيمىن. وسى ورەگە جەتۋىمە باستى دەمەۋشى بولعان كىسى اسقار تاۋىم اكەم ەدى، كىشكەنتاي كەزىمنەن بىردەڭەنى جاساپ، الدەنەنى قۇراستىرۋعا شەبەر ەدىم،اكەم نە ىستەسەم دە: بالام،العان بەتىڭنەن قايتپا، ىستەگىڭ كەلسە سىناپ كور، جىعىلارسىڭ، جىلارسىڭ،تۇڭىلەرسىڭ،تۇرارسىڭ دەپ مەدەت بەرىپ وتىراتىن.

  ال، توك پىسپەكتىڭ تورگە وزۋىنا قولداۋشى بولعان جاننىڭ ءبىرى ۇيدەگى اسىل جارىم ارداق ءالىمعازى قىزى. تالاي رەت تاجىريبەمىز ءساتسىز بولىپ،توك پىسپەكتىڭ توكتەرىن قولعا الىپ ءتۇڭىلىپ وتىرعاندا،قاسىما كەلىپ: قۇرىش،   قۇلشىن، ارعىماق سۇرىنبەي جەر تانىماس، ازامات سۇرىنبەي ەل تانىماس دەيدى عوي،ءتۇبى توك پىسپەك تابىستىڭ تورىنە شىعارادى،-دەپ دەمەيتىن.

  جىگەرىڭ قۇم بولعاندا، جەبەيتىن   جاقىنىڭ بولسا جاقسى ەكەن، وسىنداي جاقىندارىمنىڭ ارقاسىندا قارجى جاقتان دا، قۋات جاقتان دا كەمىگەن جوقپىز، قولداعى جيعان-تەرگەندى ەش ەكىلەنبەي ورتاعا سالدىق، جەتپەي قالعان جەرىنە قارىز جالعادىق.

  «وسەر ەلدىڭ بالاسى ءبىرىن-ءبىرى باتىر دەيدى» دەگەن ەمەس پە،«اعا، ەل ىسىنە ءنار بولاتىن جاقسى دۇنيە جاساپ جاتىر ەكەنسىز، ىسىڭىزگە قارجى جاقتان قولداۋشى بولايىن» دەپ ەرلانقان سايلاۋ ۇلى دەيتىن ءىنىم كەلىپ قول ۇشىن  بەردى.

  جارقىن، قاديشا، جەڭىس، گىمىڭنۇر  ەسىمدى جاقىندارىمنىڭ جانىمنان تابىلىپ، قىسىلعان ساتتە قولتىعىمنان دەمەگەنىن قالاي ۇمىتايىن.

  سەنىمدى سەرىك ەتىپ، جاقىن مەن جاقسىلاردىڭ قولداۋىندا 2017-جىلدىڭ اقپانىندا توك پىسپەكتى ساپاسى مەن ساباسىنا بىردەي كەپىلدىك ەتىپ بازارعا سالدىق. العاش  رەت 5 مىڭ دانا وندىردىك، قازىرگە دەيىن 2 مىڭ 640 داناسى ساتىلىپ كەتتى. قۇرت-ماي الاتىن، قىمىز پىسەتىن اپايلارىمىزدىڭ قۋانىشىندا شەك جوق، مال شارۋاشىلىعىن وركەندەتەمىز دەپ تالپىنىپ جۇرگەن سەلبەستىك   كووپەراتيۆتەرىنىڭ ماڭدايىنا توك پىسپەگىم «شور-شور التىن» بولدى.

  ءبىر عانا مىسال كۇنى كەشە عانا قابا اۋدانىنىڭ تەرەكتى اۋىلىندا وڭال، ساۋلە دەيتىن قوس جۇباي توك پىسپەگىمىزدىڭ مالشىلاردىڭ كادەسىنە جاراعانىن ايتىپ، 60 داناسىن ءبىر جولدا الىپ كەتتى. شينجياڭنىڭ جەر-جەرىنەن زاكاز قابىلداپ، جەڭگەڭنىڭ «ەسى شىعىپ جاتىر».

  ەرىنبەي كوز مايىمىزدى تاۋىسىپ جاساعان تاپقىرلىعىمىز ەل كادەسىنە جارادى، ەڭبەگىمىز جاندى.

  بۇل توك پىسپەگىم 2-ۇرپاق توك پىسپەك سانالادى، بۇيىرتسا كەلەر جىلعا جەتكىزبەي 3-ۇرپاق توك پىسپەكتى قاريدارلار قولىنا تيگىزسەم بە دەپ ويلاپ وتىرمىن. ول كەزدە توك پىسپەكتىڭ   يقۋاتى مەن جۇمىس ونىمدىلىگى بۇدان دا كەرەمەت بولاتىنىنا سەنىمىمىز كامىل.

  قۇلشىنىسىمەن قۇت اكەلگەن قۇرىش تەك توك ساباسىمەن عانا توڭىرەكتى تامسانتىپ وتىرعان جوق،قويدى سۋعا توعىتاتىن «قولايلى ۆاننا قۇرىلعىسىن» تاپقىرلاپ، قوبىقسارىداعى مالشىلاردى بۇدان بۇرىن دا ءبىر قۋانتقان ەدى.

  ورتالاۋ مەكتەپ وقىپ جۇرگەندە   تاپقىرلاعان كۇن، جەر، اي ءوز وسىندە اينالۋ زاڭدىلىعىن ءتۇسىندىرۋ قۇرىلعىسى 2001-جىلى اۆتونوميالى رايوندىق عىلىم-تەحنيكادا جاڭالىق جاراتۋ سيلىعىن ەنشىلەپتى.

  تاپقىرلىق جاساۋعا قۇلىن كەزىنەن  قۇمار قۇرىشتىڭ كىشى-گىرىم تاپقىرلىقتارىن تىزە بەرسەك ءبىرتالاي ساندى قۇرايدى. ءبىز بۇگىنشە وتكىر ويىمەن تەحنيكادان قۇن جاراتقان «توك پىسپەكتىڭ» يەسىنە: «تابىستىڭ تورىنە تالماي شابا بەر» دەپ قول سوعامىز دا،جاڭا ءبىر جاڭالىقتىڭ جانە ءبىر كۇنى جارق ەتۋىن جىل قۇسىنداي ساعىنا كۇتەمىز.

  رەداكتورى : اراي ەركىن قىزى

   تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.

   مسالى: «تارباعاتاي اقپارات تورابىنان» الىندى
 

 
powered by IlgharCMS 3.2 www.ilghar.cn