تاماشا ءمورال اسىل قاسيەت

سۋرتتە: جوعالعان سومكەنى يەسىنە  تابىس ەتۋدە.

  ءتىلشىمىز جۇماجان بەگزاتقان ۇلى حابارلايدى. شاۋەشەك قالالىق 5-باستاۋىش مەكتەپ 5-كلاس 1-جىلدىعىندا وقيتىن دانا بولات قىزى 4-مامىر كۇنى مەكتەپتەن ۇيىنە قايتىپ كەلە جاتىپ، قالالىق ۇكىمەت سەميالىقتار اۋلاسى 37-ءنومىرلى عيماراتىنىڭ دەمالۋ  ورنىنان ءبىر كىشكەنە سومكەنى تاۋىپ الادى،  ول جان-جاعىنا قاراپ، اۋلا ىشىنەن سومكەنىڭ يەسىن قاراستىرادى، اۋلا جىم-جىرت ەشقانداي ادام پەندەسى كورىنبەيدى، سونىمەن سومكەنى ۇيىنە اكەلىپ شەشەسىنە بەرەدى، انا- بالالى ەكەۋى سومكەنى  الىپ، اۋلاداعى كەزدەسكەن تۇرعىنداردان سۇراستىرادى، اقىرى سومكە يەسىن تابا الماعان سوڭ، شاۋەشەك قالالىق دۋبەك ساقشى بولىمشەسىنە  سومكەنى تاپسىرىپ، حالىق ساقشىلارى ارقىلى سومكە يەسىن تابۋدى ءوتىنىش ەتەدى.

  حالىق ساقشىلارى  سومكەدەگى 260 يۋان ناق اقشا، 32 مىڭ يۋان ساقتالعان اقشا كارتۋچكاسى،200 مىڭ يۋاننىڭ ۇستىندە قارىز اقشا تالونى مەن    انىقتامانى تاپسىرىپ  الىپ، سومكە يەسىن ىزدەۋگە كىرىسەدى.

  حالىق ساقشىلارىنىڭ  قاشاندا حالىق مۇددەسىن الدىعا قويىپ، حالىق ءۇشىن قىزمەت ىستەيتىنى بارشامىزعا ايان. ولار دەرەۋ ىسكە كىرىسىپ، ىزدەۋ سالۋ ارقىلى  قالالىق ۇكىمەت سەميالىقتار اۋلاسى 37- ءنومىرلى عيماراتتا تۇراتىن ءامينا اجەيدىڭ جوعالتقان سومكەسى ەكەنىن تۇراقتاندىرىپ، ەكى جاقتى دۋبەك ساقشى بولىمشەسىنە شاقىرىپ، جوعالعان دۇنيەلەرىن ءامينا اجەيدىڭ قولىنا امان-ەسەن تابىس  ەتىپ،  سومكەنى شاۋەشەك قالالىق 5-باستاۋىش مەكتەپ 5-كلاس 1-جىلدىعىندا وقيتىن دانا بولات قىزىنىڭ تاۋىپ الىپ، دۋبەك ساقشى بولىمشەسىنە تاپسىرىپ بەرگەندىگىن ايتقاندا، ءامينا اجەي قاتتى اسەرلەنىپ، كوزىنە ىستىق جاس الدى. ول:« جاسىم  ۇلعايىپ، ەستە ساقتاۋ قابىلەتىم تومەندەپ، سومكەمدى قايدا قويعانىمدى ۇمىتىپ، تابا الماي ەسىم شىعىپ جۇرگەندە دۋبەك ساقشى بولىمشەسىنىڭ قىزمەتكەرلەرى سومكەڭىز تابىلدى، دۋبەك ساقشى بولىمشەسىنە كەلىڭىز، دەگەندە قاتتى قۋاندىم، مەندە سومكەم جوعالدى دەپ ولارعا مالىمدەمەگەم، اۋەلى  حالىق ساقشىلارىنا راقىمەت. اينالايىن بالام، تاماشا ءمورال، اسىل قاسيەتتى سەنىڭ  ءون بويىڭنان بايقادىم، سەندەي  مادەنيەتتى، ءمورالدى، التىنعا ازبايتىن  اياۋلى ۇرپاق تاربيەلەگەن اكە-شەشەڭە،مەكتەبىڭە، كلاس جەتەكشىڭە مىڭ راقىمەت. وركەنىڭ ءوسسىن،كىشكەنتايىڭنان، ادامگەرشىلىكتى، مەيىرىمدىلىكتى بويىڭا تۇمار ەتكەن وسكەلەڭ اسىل قاسيەتىڭە ءتانتى بولدىم، راقىمەت ساعان» دەدى ماڭدايىنان سيپاپ.

  ءيا مىناۋ جاراسىمدى قوعام، جاراسىمدى وتباسى قۇرۋ دارىپتەلىپ وتىرعان بۇگىنگى كۇندە جاقسى ءىس، جاقسى ارەكەت ىستەۋ ءاربىر ادامنىڭ بۇلتارتپاس بورىشى ەكەنى بارشامىزعا ايان، دەسەدە التىندى كورسە جولدان تاياتىن، اقشانى كورسە قول جاياتىن ادامدار جوق ەمەس، ەندەشە، مەكتەپ، قوعام، اتا-انا تاربيەسى سايكەسكەندە عانا داناداي اقىلدى،ءمورالدى بالالار كوپتەپ جەتىلەدى.

  رەداكتورى : اراي ەركىن قىزى

   تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.

   مسالى: «تارباعاتاي اقپارات تورابىنان» الىندى