ءتىلشىمىز چىن لۋمان حابارلايدى. 9-ماۋسىم كۇنى تولى اۋداندىق اقىل-وي كەمىستىگى بار بالالاردى باعىپ-قاعۋ ورتالىعىنا بارعانىمىزدا اقىل-وي كەمىستىگى بار 20 نەشە بالانىڭ وسى ءبىر مەيىرىمگە تولى شاڭىراقتا الاڭسىز تاربيەلەنىپ جاتقانىن كوردىك.
جالپى جەر كولەمى 700 شارشى مەتر، قۇرىلىس كولەمى 240 شارشى مەتر كەلەتىن وسى باعىپ-قاعۋ ورتالىعىنىڭ ادەتتەگى بالالار باقشاسى مەن قارتتاردى كۇتىمدەۋ ورنىنان پارقى _ بۇل جەردە اقىل-وي كەمىستىگى بار بالالار ارناۋلى تاربيەلەنەدى.
تولى قالاشىعىنىڭ تۇرعىنى جياڭ شۋەچيننىڭ 10 جاستاعى ۇلى مي قابىرشاعى قاتايۋ اۋرۋىنا شالدىققاندىقتان، 24 ساعات قاسىنان ادام ۇزىلمەي قارايلاسۋ كەرەك ەكەن. جياڭ شۋەچين مەن جۇبايى كۇندىز قىزمەتكە بارعاندا، اكە-شەشەلەرىنە تاپسىرىپ كەتەتىندىكتەن، بالا ەسەيە كەلە قارتتاردىڭ شاماسى دا كەلمەي قالاتىن بولىپتى.
قالاشىقتان اقىل-وي كەمىستىگى بار بالالاردى ارناۋلى باعىپ-قاعۋ ورتالىعى قۇرىلعاندىعىنان حابار تاپقان جياڭ شۋەچين بالاسىن اپارىپ تىزىمدەتەدى.
جاڭ شۋەچين: « بالامىزدى بۇل اراعا تابىستاعاننان كەيىن كوڭىلىمىز ورنىعىپ قالدى،اكە-شەشەمىز دە شارشامايتىن بولدى» دەدى.
باعىپ-قاعۋ ورتالىعىن وزات ەسىمدى ازامات قۇرعان. قىزى جارىم جاس كەزىندە سالماقتى اۋرۋ سەبەبىنەن مۇگەدەك بولىپ قالعان ول كەمتار بالانى باعىپ-قاعۋدىڭ ماشاقاتتى جۇمىس ەكەندىگىن ابدەن بىلەتىن.
« بالام كەمتار بولعاندىقتان، ادەتتەگى مەكتەپ بولسىن، الدە ساڭىراۋ-مىلقاۋ بالالار مەكتەبى بولسىن، قاي-قايسىسىنان وقي المايتىنىن ويلاپ، وسىنداي بالالارعا ايىرىم مەكتەپ اشۋدى ويلادىم» دەدى وزات.
وسى ويىن جۇزەگە اسىرۋ ءۇشىن، وزات قولىنداعى جيعان اقشاسىن جۇمساپ، 2017-جىلى ءساۋىر ايىندا ارناۋلى وقىتۋشىلاردى ۇسىنىس ەتىپ، اقىل-وي كەمىستىگى بار بالالاردى باعىپ-قاعۋ ورتالىعىن قۇرادى ءارى بىرنەشە ايدىڭ ىشىندە 20 نەشە بالانى قابىلدايدى.
بالالاردىڭ ءوزىن-ءوزى باسقارۋ قابىلەتىن جوعارىلاتۋ ءۇشىن، بۇل اراداعى وقىتۋشىلار ءار كۇنى دەن قويا جاتتىعۋ جاساتۋ، ۇيرەتۋ ارقىلى بالالاردىڭ تانۋ قابىلەتى مەن امالياتتىق قابىلەتىن جوعارىلاتۋعا كۇش سالعاندىقتان، قازىر بالالاردىڭ كوڭىل كۇيى كوتەرىڭكى بولىپ قالماستان، تۇرمىستا ۇنەمى كەزىگەتىن ازىقتىقتار مەن قاراپايىم سانداردى تاني الاتىن دارەجەگە جەتكەن.
تولى قالاشىعىنىڭ تۇرعىنى كۇلاننىڭ نەمەرەسى تۋما كەمتار. اكە-شەشەسى ەرتە قايتىس بولعاندىقتان،وسى شيەتتەي كەمتار بالانى باعىپ-قاعۋ 69 جاستاعى كۇلاننىڭ موينىنا جۇكتەلگەن. بىرتىندەپ ەسەيىپ كەلە جاتقان بالا جاسى ەگدەلەگەن كۇلان قارتقا اجەپتاۋىر سالماق سالعان ساتتە وسى باعىپ-قاعۋ ورتالىعى ونى قابىلداعان.
كۇلان: « نەمەرەم وسىندا كەلگەننەن بەرى تەتىك بولىپ، باسقالارمەن سويلەسە الۋمەن قاتار، كوپتەگەن نارسەلەردى ۇيرەنىپتى، كوڭىلىم ورنىعىپ قالدى» دەدى.
ۇعىسۋعا قاراعاندا، اقىل-وي كەمىستىگى بار بالالاردى باعىپ-قاعۋ ورتالىعى تەگىن تاربيەلەيدى ەكەن. وسىعان جۇمسالعان قاراجاتتىڭ بارلىعىن وزات ءوزى مويىنىنا العان. قازىر بۇل اراعا كەلگەن بالالار ۇزدىكسىز كوبەيىپ، ورىن جەتىسپەۋ قيىنشىلىعى ءجۇز بەرگەندىكتەن، وزات قارجى جاقتان قينالا باستاپتى.
بۇل جونىندە وزات: « الداعى جەردە ورتالىعىمىزدىڭ كولەمىن كەڭەيتىپ، مۇگەدەك بالالارعا ءتىپتى دە جايلى تۇرمىس ورتاسىن جاراتۋ ويىمىز بار، پارتيا مەن ۇكىمەتتىڭ جانە اق ەدىل جانداردىڭ كومەگىنە ءزارۋمىز» دەدى.
رەداكتورى : اراي ەركىن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى