«سەن مەنىڭ انامسىڭ،تاتە،سەن مەنىڭ پانامسىڭ،قىزىم»

سۋرەتتە: ساۋ ميحۇڭ داريعا  اپايدىڭ  شاشىن تاراۋدا.
 

  ماقسات قيزات ۇلى حابارلايدى. ول وسىبىر ءالسىز دەنەلى، اق كوڭىل قازاق اجەنى كورگەندە، ءوزىنىڭ اياۋلى اناسىن ەسىنە الدى، ونىڭ اناسى دا ءجيى اۋىرا بەرەتىن، ول اناسى اۋىرعان شاقتا جانىن قويارعا جەر تاپپاۋشى ەدى، ماڭايداعى ۇلكەن-كىشى شيپاحانانىڭ بارىنە جۇگىرىپ، ارداقتىسىن اياقتان تۇرعىزعانشا مىگىر تاپپايتىن، جۇرەگى جىلى قىزدىڭ قامقورلىعى مەن قۇلشىنىسى تەگىن كەتكەن جوق، اناسى كوز الدىندا كۇندەي جارقىراپ كۇلىمدەپ ءجۇر.

  ال، الىستاعى جۇدەۋ قىستاقتاعى داريعانىڭ سەنەر ۇلى دا، قىزى دا جوق ەدى، قولىن جىلى سۋعا مالىپ، وڭ جاعىن قىزارتادى دەگەن قوس قۇلىنى جاس كەزىنەن ناۋقاس توسەگىنە تاڭىلىپتى، كۇنى بۇگىنگە دەيىن ەكى ۇلى ۋكول-دارىدەن قول ۇزە الماي، قارتايعان انانىڭ وزىنەن كومەك تىلەپ ۇزدىگەدى.

  ءدوربىلجىن اۋداندىق مەملەكەتتىك باجى مەكەمەسىنەن شاڭحۋ اۋىلى توتە 6-قىستاعىنا تۇسكەن جانى ىزگى جومارت بويجەتكەن   ساۋ ميحۇڭدى داريعا اپامىز: «قادىرلىم، حانزۋ قىزىم، قامقورشىم دا قۋاتىم» دەيدى. مەن تىلشىلىك بابىمەن ساۋ ميحۇڭدى ەرتىپ،  داريعا  اپايدىڭ  ۇيىنە  بارعاندا، اپامىز ساۋ ميحۇڭدى كورگەن بەتتە قۇشاقتاپ،  بەتىنەن ءسۇيدى. كوزىنەن ءمولدىر جاس دومالاپ كەتتى. 

  ساۋ ميحۇڭ قۇددى ءوز ۇيىنە كەلگەندەي داريعا اپانى مەيىرلەنە قۇشاقتاپ، سامايىنداعى شاشىن ايالى الاقانىمەن سيپادى. ساۋ ميحۇڭ  وتىرار-وتىرماستان ءۇي ىشىندە ءار جەردە شاشىلىپ جاتقان دۇنيەلەردى جيىستىرىپ قاربالاستاپ كەتتى.

  -شەشە، مىنە مىناۋ بەت جۋاتىن سابىنىڭىز، مىنا جاڭا ورامالمەن بەتىڭىزدى ءسۇرتىڭىز.

  -بۇعان اقشا شىعىندار قىپ ناعىلاسىڭ، بۇرىنعىسى بار ەمەس پە، اينالايىن!

  -ۇن مەن كۇرىش تە بىتەيىن دەپ تۇر ەكەن، ەرتەڭ اكەپ بەرەيىن.

  -ەندى ءوزىم الايىن، اۋرە بولماشى، قىزىم.

  -قويىڭىزشى، اپاتاي، سىزگە كومەكتەسسەم اناما كومەكتەسكەندەي سەزىنەمىن، ءسىز مەنىڭ انامسىز.

  -راقىمەت، شىراعىم، سەن مەنىڭ پانامسىڭ، قىزىم، الدىڭعى جولى وزىڭنەن العان 1000 يۋاندى كەلەر ايدا قايتارىپ بەرەيىن، ۋاعىندا بەرە الماي جاتىرمىن، ۇيات بولدى، قاراعىم.

  -قارىز دەپ ايتپاڭىزشى، سىزگە بەرگەن بالالىق بازارلىعىم بولسىن، سىزگە كومەكتەسسەم كوڭىلدەنىپ قالامىن.

  -ءوزىڭ قىزمەت اترەتىنىڭ باستىعىسىڭ، قىزمەتىڭ قاربالاس، توتە 6-قىستاقتاعى تۇرعىننىڭ بارلىعىن كوزدەن كەشىرىپ، كوڭىلىڭە ءتۇيۋىڭ كەرەك، كەشكە دەيىن ماعان كەلە بەرسەڭ، وزگەلەر ءسوز ەتىپ جۇرمەسىن، كومەكتىڭ ءبارىن مىنا كەمپىرگە كورسەتىپ جاتىرسىڭ دەپ.

  -قايداعىنى ايتپاڭىزشى اجەتاي، قىستاقتاعى تۇرعىنداردىڭ بارلىعى ءسىزدىڭ جايدى بەس قولىنداي بىلەدى، سىزگە كومەكتەسكەنىمە ولار دا ءدان ريزا، ونىڭ ۇستىنە ءبىز قىستاق تۇرعىندارىنىڭ بارلىعىنا تەڭ قارايمىز، كوزقاراسىمىز بىردەي، اناردىڭ دانىندەي تىعىز ۇيىسىپ، دوڭگەلەك داۋلەتتى قوعامعا جەتۋ ورتاق بورىشىمىز.

  اناسى مەن قىزى كۇڭكىلدەسە ءجۇرىپ، ءبىرتالاي شارۋانىڭ شالعايىن قايىرىپ تاستادى.

  «مىنە، مىنا قىزىمنىڭ ارقاسىندا قامسىز ءومىر ءسۇرىپ جاتىرمىن، كوكتەمنەن بەرى تالاي رەت شيپاحاناعا ءتۇسىپ قالدىم، ءبىر رەت ءولىم اۋزىنا بارىپ قايتتىم، سونىڭ بارلىعىندا ساۋ ميحۇڭ قاسىمنان تابىلدى. تەك ساۋ ميحۇڭ عانا ەمەس، قىزمەت اترەتىندەگى بارلىق جولداستاردىڭ ەڭبەگىن ەرەكشە اتاعىم كەلەدى، ولار قىستاقتاعى قولى قىسقا وتباسىلارىنىڭ بارلىعىنا كومەكتەسىپ، ولاردىڭ قيىنشىلىقتان قۇتىلۋىنا نەگىز قالادى» دەيدى داريعا اپامىز قۋانىشتان ءجۇزى بال-بۇل جانىپ.

  قىستاق تۇرعىندارىنان ۇعىسۋىمىزشا كادرلار ناۋرىز ايىنىڭ باسىندا قىستاققا كەلە سالا تۇرعىندارمەن قۇددى ءوزىنىڭ بىرگە تۋعان اعا-باۋىرىنداي كورىپ ارالاسىپ كەتىپتى. ولار حالىقپەن ەتەنە بولىپ، حالىق جاعدايىن ىشكەرىلەي ۇعىسىپ، قوعام ورنىقتىلىعى مەن باياندى تىنىشتىق باس نىساناسىن ىسكە اسىرىپ، حالىقتى كەدەيلىكتەن قۇتىلدىرۋ ءۇشىن قۇلشىنا جۇمىس ىستەپ جاتىپتى.

  ساۋ ميحۇڭ قازاق اناسىنا كورسەتكەن جاقسىلىق جايىندا ءتىس جارعىسى كەلمەيدى، «وسىنداي ۇساق ءىستى دە دابىرا قىلۋعا بولار ما ەكەن، ماقتانارلىق دانەڭەسى جوق، اۋىل-قىستاقتا قازاق پەن حانزۋدىڭ، ۇيعۇر مەن حۇيزۋدىڭ دوستاسىپ، بەرەكەنىڭ قازانىنان ءدام  تاتىپ، تاتۋ-ءتاتتى ءومىر ءسۇرىپ جاتقان مىسال كوپتەپ كەزىگەدى، بۇل مەكەن ءار ۇلتتىڭ ورتاق مەكەنى،ءبىز جاراسىمدىلىق دەيتىن الىپ بايتەرەكتىڭ استىندا شات-شادىمان جاساپ جاتقان شينجاڭدىقتارمىز، ۇلى جۇڭحۋانىڭ ادال پەرزەنتتەرىمىز» دەيدى.

  رەداكتورى : اراي ەركىن قىزى

  تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.

  مسالى: «تارباعاتاي اقپارات تورابىنان» الىندى