تىلەۋقان زاتىباي ۇلى
گۇل
گۇل،
قيىلىپ تۇرعان ەركەلەرىمسىڭ،
عۇمىرى ءتاتتى كەلتەلەرىمسىڭ.
رۋحىمنىڭ ءۇنى _ كوركەمونەرىمسىڭ،
كوگەنىم تولعان جاس ءتول ىشىندە
سۇيكىمدى وڭكەي بورتەلەرىمسىڭ.
گۇل،
سۇلۋدىڭ سىرىن بىلدىرگەن ءجۇزسىڭ،
سەزىمدى تۇڭعىش بۇلدىرگەن قىزسىڭ.
قارشىعا بولىپ، قۇيعىپ ءبىر كوكتەن،
تۇياققا قويان ىلدىرگەن قۇسسىڭ.
تايماشى، تايما! لەبىڭنەن سول ءبىر،
تۇنەرگەن ساتتە كۇلدىرگەن مىقتىم!
گۇل،
ۇزەم دە سەنى قالامىن جىرعاپ،
شاشىنا جاردىڭ تاعامىن بۇلداپ.
ارۋ ما ەدىڭ ليريكا جازعان،
اقىن كوكتەمنىڭ قالامىن ۇرلاپ؟
سولايشا سەنى بارامىن جىرلاپ!
گۇل،
ومىردەن ءبىر ءان تىڭداپ اپ قايتام،
جولدارى جاتىر سىرعاناق،قايقاڭ.
ءوزىڭدى ىزدەپ قاڭتاردا تۇرمىن،
كەتكەن بە سەنى ۇرلاپ اپ سايتان؟!
جاس داۋرەن بە ەدىڭ؟
الداماي سونشا،
بولماس پا ەدى كۇلمەي-اق قويساڭ!
كۇن شىققاندا
شىعىستان كوتەرىلدى كۇن دوڭگەلەپ،
شۋاققا ساۋساق سوزدى گۇل مەن بوبەك.
كوكتەم _ كەلىنشەك كوك جەلەك جامىلىپ تۇر،
تابيعاتتى بەسىككە جىرمەن بولەپ.
شىعىستان ەلجىرەپ كۇن كوتەرىلدى،
اسقار شىڭ، شۋاققا جاي ەتەگىڭدى!
ءان مەن كۇي،سايران جاققا مەن دە ۇمتىلدىم،
جيا ساپ قاق تورىمنەن توسەگىمدى.
شىعىستان كوتەرىلدى جايراڭداپ كۇن،
سايراتىپ الۋان قۇسىن سايران باقتىڭ.
اپپاق تاڭ، قانە مەنىڭ ەركىمدى بەر،
اقىنمىن جىرشى قۇسقا ايلانباقپىن!
جاسىرىپ سان مىڭداعان گۇلىن كوكتىڭ،
شىعىستان كوتەرىلدى كۇلىمدەپ كۇن.
اسپاننىڭ التىن كوزى بيىكتەي بەر،
مەن گۇل بوپ كىرپىگىڭە ىلىنبەكپىن!
ەي، اسقار شىڭ
سۇلۋ دا سۇلۋ،كۇن سۇلۋ دەرسىڭ،
الەمگە توككەن نۇر سۇلۋ كوركىن.
كۇلىپ تە تۇرىپ، تىرلىكتى جالماپ،
تارتتىرعان تالاي كۇلكىنىڭ دەرتىن.
بۇلتقا دا ءتاڭىرى باسقارتا الماي،
تىرلىككە تۇرعان باس قالقا قانداي؟!
ساۋلەسىن تاڭنىڭ الدىمەن سۇيگەن،
بولار ما ەڭ ەي،شىڭ،اسپاساڭ ونداي!
اسقارسىڭ،
شۋاق _ نەسىبەڭ تۇڭعىش،
بويىڭدا جاتىر ءبىز بىلمەس مىڭ كۇش.
قوينىڭدا شالقىپ سايگۇلىك مىنگەن،
ەرتەڭىن بىلمەس پەندەمىن كۇلگىش.
اسقار شىڭ دەگەن ءسوز بە ەدى جالعان،
الىسقا قاراپ كوز بە ەدى تالعان؟!
كۇن نۇرىن مەنەن سۇيسەڭ دە بۇرىن،
ماڭدايىڭ نەگە كوك مۇز بوپ قالعان؟!
دەيسىڭ بە ءومىر شاش جايىپ كۇلسىن،
تولقىندى توتە اق قايىق ءتىلسىن.
تويىمسىز تىرلىك كەۋدەڭدە ۇيىپ،
ءبىر شىندىق ءۇشىن قاسقايىپ تۇرسىڭ!
رەداكتورى: الماگۇل اقاتبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.