باقتىر يمانعالي ۇلى
قوڭىروبا _ قۇتتى مەكەن،
ءور توسىڭدە
ءبي-شەشەندەر قۇرعان كەڭەس.
ءار ءداۋىردىڭ پاراعىنان
ۇلگىلى، ىزگى قالعان ەلەس.
دۋمانداتىپ وسكەن حالىق،
اقىمجاننىڭ سىبىزعىسىن،
زاعىپاردىڭ ءانىن تىڭداپ.
كۇندە تويمەن ءوتۋشى ەدى،
رۇستەم مەن كاسىمبايدىڭ
كۇيىن ەستىپ.
ءبارىن تەزگە سالۋشى ەدى-اۋ،
ءسوز پەرىسى
قايران،كەشتىك!
شاڭىراعىڭا ۇيا سالعان
نيعىمەتتىڭ «قارلىعاشى»،
قاقشاڭ جازعان «العاشقى ادىم»،
«راس پا، اكە» قۇرمەتىنە
باسىن يگەن
كەربەز بارلىق قارلى باسى.
بىلەسىڭ بە،
بىلمەيسىڭ بە؟
ەگەيلەرىن ەتكەن ماقتان،
مايلى-جايىر كارى-جاسى.
* * *
قوڭىروبا _ قۇتتى مەكەن،
جۇپار اۋاڭ تامساندىرىپ،
سامال جەلىڭ بەتىمدى وپكەن.
قيلى زامان
سان وقيعا
قويناۋىڭدى دۇبىرلەتكەن.
ءبىر مىڭ توعىز ءجۇز توقسان التى
تىشقان جىلى
ءۇش الىپتىڭ مەرەي تويى
وزىڭدە وتكەن.
«ساعىنىپ كەلدىم
تاستاپ كەتتىڭدەر» دەپ
ساڭقىلداعان،
ەستىلگەن ەدى سوندا
ومىكەڭنىڭ ءۇنى وكتەم!
ال، بۇگىن
ءۇش الىپ جوق اۋىلدا،
ساعىنىش بار قاۋىمدا،
كۇي كەشەمىن مىنەكي
تۇسكەندەي ءبىر داۋىلعا.
وپاسىز دۇنيە
جالعان-اي!
وسى ما اتتەڭ
كۇنى وتكەن،
وكىنىش دەرتى جۇدەتكەن!
* * *
قوڭىروبا _ التىن بەسىك
الىپتاردى تەربەتكەن.
توعىسىندا عاسىرلاردىڭ
ءوز ۇرپاعى _
ءتورت مىقتىنىڭ
جىر نوسەرىن سەلدەتكەن -
كەشە عانا ەمەس پە ەدى
ءسالي، عاپپار،
بادەتىڭ مەن
قاجىبەكتىڭ كەۋدەسىنە
ارۋلارىڭ گۇل ەككەن.
سودان بەرى
ءوتتى، كەتتى
ون بەس-اق جىل ۋاقىت.
و، ءتاڭىرىم،
ءولىم نەتكەن راقىمسىز،
عاپپار مەنەن بادەت جوق
ءۇنى ەستىلەر ەستى ۇرپاق،
نۇرعا قۇشتار جۇرەكتەن.
* * *
قوڭىروبا _ قۇتتى مەكەن
جەر ۇيىعى ءوزىڭسىڭ.
ءاربىر تاڭىڭ
كۇن قۇشاقتاپ اتادى.
ءاربىر كۇنىڭ
اي نۇرىنا مالىنىپ
وت قۇشاقتاپ باتادى.
ۋا، قادىرلى قوڭىروبا
ءان مەن كۇيدىڭ مەكەنى.
جەرىڭ جاننات،
سۋىڭ ءشاربات،
ۇرپاق وسكەن جەتەلى.
دۇنيەنى جالت قاراتار
ءور توسىڭدە
ءالى دە
تالاي تويلار وتەدى!
رەداكتورى: الماگۇل اقاتبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.