ماۋەلقان قايموللا ۇلى
تابيعات سازى
كورىنەسىڭ اسا كوزگە ىستىق،
كوسىلگەن تاۋلار كوگىلدىر.
قوينىڭدا جەتىپ تەز پىستىق،
نوسەرىڭمەنەن شومىلدىر.
جامىلعان مايسا قىرات-بەل،
قاپتالدار سىرىك توسەگەن.
سىلاعان سامال، شۇرات-كول،
سەزىمنىڭ وتىن كوسەگەن.
مەزگىلدە ءساندى نۇر جاپتى،
گۇل بىتكەن جايناپ تۇر كۇلىپ.
جۋىتپاي ماڭعا كىر-داقتى،
اعادى بۇلاق بۇلقىنىپ.
جارىسا وسكەن بيىكپەن،
قاراعاي، قايىڭ، نار شىنار.
اقبوز ءۇي،اۋىل سۇيىكتى ەڭ،
سەندە ءبىر كيە بار شىعار.
باسادى سەزىم پەرنەسىن،
بوزتورعاي ءانى توگىلگەن.
قايتەسىڭ ىزدەپ وزگەسىن،
دۋماندى،جارقىن ومىردەن.
تەلمىرەم شايداي اسپانعا،
سۇلۋلىق شىقپاي سانامنان.
نە جەتسىن باۋىر باسقانعا،
جەرىڭە تۋىپ جارالعان.
جاي تاپسا كوڭىل جان كۇلىپ،
قيالعا شومۋ باسى ارتىق.
تابيعات كوركەم ماڭگىلىك،
تۇرادى ءسۇيىپ،جاسارتىپ.
وتەيىك ءماندى كۇن كەشىپ
تاۋ تۇلعالى دوستارىم،
دالامداي دارقان پەيىلىڭ.
اقيقات ءۇشىن قوسقان ءۇن،
جاقسىعا توگىپ مەيىرىن.
دۋماندى ورتا سەرگەك تىم،
ومىرگە قۇشتار سايا-باق.
ءان-كۇيمەن سيلاپ تەربەتتىڭ،
باۋىرعا باسىپ ايالاپ.
قاشاندا ءادىل ىسكە ايعاق،
جان سىرىن ىركىپ جاسىرماي.
اقىلى كەنىش، كۇش-قايرات _
قاتارىڭ سايدىڭ تاسىنداي.
ءبىر جۇرگەن تالاي سايىستا،
جىلداردىڭ ءىزى سويداقتاپ.
قىدىرسا قيال الىسقا،
الادى كەيدە وي قاپتاپ.
سەندەرسىز باقىت جات ماعان،
وسكەنبىز تاتۋ، تاعدىرلاس.
ارقا تۇتىپ ماقتانام،
توعىسقان جۇرەك جان قۇرداس.
بۇكپەسىز، ەركىن اقتارىل،
قالماسىن سىرلار شەرتىلمەي.
ارمانعا ىزگى قاق دابىل،
كورسەتىپ باعدار،ەرشىمدى وي.
تۇسكەنشە بەلگە ساقالىڭ،
جاساڭدار دەيمىن مىنا مەن.
جەمىستى بولسىن ساپارىڭ،
سۇيىنتكەن كوپتى ۋادەڭ.
كوز جازسام قالام جابىرقاپ،
تۇراسىڭ ءدايىم تىلدەسىپ.
كۇنشىلدەر ءجۇرسىن تاڭىرقاپ،
وتەيىك ءماندى كۇن كەشىپ!
ساعىنىش سارىعى
ءبارى دە تال بويىڭا سيىپ تۇرعان،
قايداسىڭ،ىڭكار سەزىم،سۇيىكتى جان؟
جارقىن ءديدار سىر شەرتسە جادىراتىپ،
اتار تاڭ،باتار كۇندە قىزىق دۋمان.
باس اساۋ الدەكىمگە بەرمەس ىرقىن،
كەلەدى الىپ ۇشىپ كوڭىل شىركىن!
ەلىتەم ەلەگىزىپ اۋىق-اۋىق،
ەستىلەردەي سىڭعىرلى سۇلۋ كۇلكىڭ.
تاۋسىلدى تاعاتىم دا ەزىلە تىم،
ءساتتى توسىپ وزىڭە كەزىگەتىن.
جەتسەڭشى جۇرەگىڭدى قولىڭا الىپ،
مازداتىپ ساعىنىشتىڭ سەزىم وتىن.
ماحاببات قۇدىرەتىن ءجيى اڭعارىپ،
وتىرمىن ءتاتتى ۇمىتپەن قيالدانىپ.
مۇمكىن عوي تارتىنۋىڭ،نازدانۋىڭ،
بايقايمىن قىز قىلىعى ۇياڭ حالىق.
ۋاقىت توستىرمايدى، وتەدى كۇن،
قادىرىن جاستىق شاقتىڭ جەتە بىلگىن.
قالقام-اۋ،كەتتىڭ بە ەرتە،قالدىڭ با كەش؟
قالايشا ويىڭنان تەز كوتەرىلدىم؟
الماسام ابايسىزدا ەندى ءوشىرىپ،
وت العان كوكىرەگىمنەن سونبەس ءۇمىت.
سالشى ءوزىڭ بەزبەنىنە اقىلىڭنىڭ،
شىن ءسۇيۋ جاسامايدى پەندەشىلىك.
رەداكتورى: الماگۇل اقاتبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.