اۋەلقان تۇسىپبايەۆ
تولىنىڭ كەشى تاماشا،
شىراقتارى اق ماڭداي.
سەزىمگە تولى جاڭاشا،
ءان-كۇيگە بولەپ جاتقانداي.
تولىنىڭ كەشى جايناعان،
جۇلدىز تۇنەپ جاتقانداي.
ءومىرى دۋمان قايناعان،
ارۋلارى اق قارداي.
تولىنىڭ باعى تاماشا،
جەمىستەن مونشاق تاعىنعان.
جولاۋشى كەتسەم الىسقا،
تاعاتىم كەتىپ ساعىنعام.
تولىنىڭ كەشى تاماشا،
جانىڭدى ەلىتىپ باۋراعان.
جاۋعان قارعا قاراسا،
اق كۇمىستەي ساۋلاعان.
تولىنىڭ تاريحى تاماشا،
ەل مۇراسىن ساقتاعان.
حالقىندا بار قىمباتتى
ۇلت دوستىعى ساقتالعان.
تولىنىڭ تاۋى تاماشا،
كوگىندە قىران سامعاعان.
قالاسى جايناپ جاڭاشا،
بازاردا بايلىق قايناعان.
تولىنىڭ كەشى جايناعان،
سايالى ورمان اينالام.
نۇرىنا بالقىپ كوكتەمنىڭ،
وراندى شۇلەن باي دالام.
تولىنىڭ كەشى تاماشا،
اۋاسى ءدارى دەرتىڭە.
اق سامالى ايمالاپ،
ۇرىلادى بەتىڭە.
تولىنىڭ كەشى تاماشا،
باعىندا بۇلبۇل ءۇنى بار.
نازار سالىپ قاراسا،
باقىتتىڭ سولماس گۇلى بار.
قاراعايباستاۋ تاماشا،
بالداي ءزامزام سۋى بار.
كەلگەن جان ءبىر تىڭداسا،
قۇلاقتا قالار ءانى بار.
كوكتەمدە كەلگەن ءتىزىلىپ،
جىل قۇسىنىڭ كوشىن كور.
باتامىن دەسەڭ قىزىققا،
تولىنىڭ كەلىپ كەشىن كور.
رەداكتورى: الماگۇل اقاتبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.