تالپىنعانعا تابىس مول

  ءتىلشىمىز جۇماجان بەگزاتقان ۇلى حابارلايدى. «جانار توقاش دۇكەنى» دەسە شاۋەشەك قالاسىنداعى تۇرعىنداردىڭ بىلمەيتىنى جوق شىعار-اۋ، جولداسىمنىڭ ۇنەمى وسى دۇكەننەن نان، پراندىك، ساڭزى، توقاش، تورت ساتىپ الىپ جۇرەتىنىن ەرتەدەن بىلەمىن، ونىڭ ۇستىنە ۇيدە جولداسىمنان « ‹جانار توقاش دۇكەنىنىڭ› ازىق-تۇلىكتەرى ءدامدى، ءتۇرى مول، الارمانى كوپ» دەپ ايتىپ وتىراتىنىن دا كوپ ەستىگەم، دۇكەن قوجايىندارىمەن اڭگىمەلەسىپ، ءتۇرلى پراندىك پىسىرۋدى قالاي ۇيرەنگەندىكتەرىن، كاسىپ كوزىن قالاي اشقاندىعىن ۇعىسايىن دەپ جۇرگەنمىن، مىنە بۇگىن ءساتى ءتۇسىپ، قۇربان ايت مەرەكەسى كەلۋ بايلانىسىمەن «جانار توقاش دۇكەنىنە» بارىپ، قۇربان ايت دايارلىعى ءۇشىن ىشپەك-جەمەك الىپ جاتقان قاريدارلارمەن اڭگىمەدە بولدىم.
 
  بەدەلقان سايدەن ۇلى ءدوربىلجىن اۋدانى شاڭحۋ اۋىلى قۇماق قىستاعىنىڭ تۇرعىنى، 2006 - جىلى شاۋەشەك قالاسى قاراقاباق قالاشىعى اراسان قىستاعىنىڭ تۇرعىنى  جانار بالتان قىزىمەن باس قۇراپ، قۇماق قىستاعىندا تۇرمىس  قامىنا كىرىسەدى، ءبىر وتباسىنىڭ شارۋاشىلىعىن شالقىتىپ، تۇتىنىن ءتۇزۋ ۇشىرۋ تەك ەڭبەكشىل ادامداردىڭ عانا قولىنان كەلەتىن جۇمىس، قىستاقتا ماندىعان جۇمىس جوق، 30 مۋ جەرگە عانا قاراپ كۇن كورۋ تەپسە تەمىر ۇزەتىن بەدەلقانعا ۇلكەن سىن، ولار ويلانا كەلە ەكونوميكاسى دامىعان، تۇرمىس ورەسى جاقسى قالاعا كوشىپ بارىپ، ونەر ۇيرەنىپ، كاسىپ كوزىن اشۋدى ءجون كورەدى. سونىمەن 2008 - جىلى شاۋەشەك قالاسىنا كەلىپ قونىستانادى. بەدەلقان قالادا  چىڭنۇڭ قالتقىدا كوكونىس ءوسىرۋ ورنىندا 2 جىل جۇمىس ىستەسە، جولداسى جانار شاڭلان پراندىك، توقاش پىسىرۋ دۇكەنىندە 2 جىل ۇيرەنەدى، جانار پراندىك، توقاش پىسىرۋدى ۇيرەنۋمەن بىرگە، اسپاپتىڭ تەتىگىن يگەرىپ، ونەرىن ۇشتايدى. سونىمەن ولار 2011 - جىلى ايماقتىق حالىق شيپاحاناسىنىڭ قيىس قارسىسى، قىزىل كوپىر ماڭىنان ءبىر اۋىزدى ءۇيدى جىلىنا 30 مىڭ يۋانعا مايعا  الىپ، «جانار توقاش دۇكەنىن» اشىپ، ساۋدالارىن باستاپ كەتەدى.
 
  «تالپىنعانعا تابىس مول» دەمەكشى، بەدەلقان مەن جانار ءوزارا سايكەسىپ، دۇكەننىڭ جۇمىسىن ورتاق ارقالاپ، پىسىرعان پراندىك پەن توقاشىنىڭ ءدامىن كەلتىرىپ، قىسقا عانا ۋاقىتتا الارماندارىنىڭ سەنىمىنە يە بولادى. ولار 6 جىل تاپجىلماي تاباندىلىقپەن جۇمىس ىستەپ، دۇكەندەگى زاتتىڭ ءتۇرىن مولايتىپ، 70 نەشە ءتۇرلى ازىق - تۇلىك ساتىپ، ساۋداسىن جانداندىرا ءتۇستى، ونىمەن قوسا، سامسا، كاتلەت، پارامىش جاساپ،تاپسىرىس بەرگەن الارماندارعا ۋاعىندا جەتكىزىپ بەرىپ، تاپسىرىس بەرەتىن قاريدارلاردىڭ سانىن مولايتتى. ايتا بەرسەك شۇبات، قىمىز، قۇرت-ماي، سۇزبە، سارى ماي، ساڭزى، باۋىرساق سياقتى ۇلتتىق تاعامدار مەن پراندىك، توقاشتارى الدە قاشان الارمانداردىڭ تاپسىرىس بەرىپ الاتىن سەنىمدى تاعامىنا اينالعان.

  ايماقتىق ءناسىلدى سيىر فەرماسىنىڭ قىزمەتكەرى قاسيەت: «قۇربان ايت مەرەكەسىنىڭ دايىندىعى ءۇشىن ارناۋلى وسى دۇكەنگە كەلىپ، پراندىك، توقاش ساتىپ الىپ جاتىرمىن، بۇل دۇكەننىڭ پراندىك، توقاشى ءدامدى، ۇنەمى وسى دۇكەننەن ىشپەك - جەمەك ساتىپ الامىن، الدىن الا بۇيىرتساڭ ۋاعىندا دايارلاپ بەرەدى، وتە سەنىمدى» دەدى.
 
  رەداكتورى: گۇلنۇر جۇماش قىزى
 
  تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.

  مسالى: «تارباعاتاي اقپارات تورابىنان» الىندى.