جاڭعازىنىڭ جاسىل اۋلاسى

سۋرەتتە: جاڭعازى (سولدان 1- ادام)  جەمىس باعىندا.

  ۇسىنىس ەتىلگەن ءتىلشى تاۋلە قۇماش ۇلى حابارلايدى. شاعانتوعاي اۋدانى جاڭاجەر اۋىلىنىڭ مۇحىر قستاعىندا تىلشىلىك جۇمىسپەن جۇرگەنىمدە، ءبىر قىستاق تۇرعىنى: «مەملەكەت قورشاعان ورتانى قورعاۋدى العا قويىپ، جالپى حالىق  ات سالىسىپ، ءىشىنارا ورىندار قورشاعان ورتانى ءبۇلدىرىپ، زياندايتىن، جاسىل القاپ پەن ورتا تازالىعىنا ءمان بەرمەيتىن جاعدايلاردى اشىق اشكەرەلەۋدى؛ ورتانى قورعاۋداعى بايقالعان جاعىمسىز جايىتتەردى دەر كەزىندە وڭاۋ، قاتاڭ تەكسەرىپ، ءبىر جايلى ەتۋ ساياساتتارىن العا قويدى. بۇل حالىقتىڭ ءتول مۇددەسىنە قاتىستى ءارى حالىق قۋاتتايتىن، قۋاناتىن جاقسى جاعداي  بولدى، مىنە وسىنداي جاعدايدا، قىستاعىمىزدىڭ  تۇرعىنى جاڭعازى يمانعاجى ۇلىنىڭ جاسىل اۋلاسىن كورىپ، كوڭىلىڭىزگە تولسا  ۇگىتتەپ قويساڭىز، باسقالارعا ۇلگى، باستاما بولا ما» دەدى.
 
  قىستاقتىڭ شىعىس جاعىنا قونىستانعان، اۋلاسىنداعى اعاشتار ماۋەلەپ وسكەن جاڭعازى قارتتىڭ وتباسىنا بارىپ، ول كىسىنى جاپ - جاسىل باقشانىڭ ىشىندە جەمىس ءۇزىپ،  ارام ءشوپ وتاپ جۇرگەن جەرىنەن كەزدەستىرىپ، اۋلاسىنا اعاش ەگۋ جاعدايىن ۇعىسقانىمدا: «جاڭاجار اۋىلدىق مال شارۋاشىلىق جاتاقتى ورتالاۋ مەكتەپتە 1982-جىلدان 2003-جىلعا دەيىن ۇيىمنىڭ ورنالاستىرۋى بويىنشا وقىتۋشى، مەكتەپ باستىعى مىندەتىن اتقارىپ، 1995-جىلى «مەملەكەتتىك ۇزدىك وقىتۋشى» بولىپ، 2005 - جىلى دەمالىسقا شىقتىم. وسىدان كەيىن قارتايدىق دەپ قاراپ جاتباي، اۋلاداعى 1983- جىلدان باستاپ ەككەن 210 مۋ جەردەگى اعاشتاردىڭ ءتۇرىن مولايتىپ، ءونىمىن جوعارىلاتۋعا بار كۇشىمدى  جۇمساعاندىقتان، قازىر اعاشتاردىڭ الدى  ماتەريالعا جاراپ، جەمىس  اعاشتارى ءونىم بەرىپ جاتىر» دەدى.

  مەن اعاشتىڭ قانداي تۇرلەرى بار دەگەنىمدە، تال، تەرەك، قاراعاي، سامىرسىن، ارشا، بۇتا - بۇرگەن،ءيتمۇرىن بار بولسا، جەمىس تۇرلەرىنەن  ءتورت ءتۇرلى الما، توشالا، تاڭقۋراي، قارا ورىك، سار ورىك، قاراقات، جاڭعاق سياقتى اعاشتار مەن جەمىستەر بار دەپ باقشانى ارالاپ كورسەتكەندە، اۋاسى تۇنىق، سۋى ءمولدىر،  بۇلبۇلى سايراعان تابيعي جاسىل ورماندى  ارالاپ جۇرگەندەي كوڭىل كۇيدە بولدىم.

  جاڭعازى قارتتىڭ جۇبايى رايحان: «باقشادا 2500 ءتۇپ اعاش بار، اعاشتىڭ الدىنا 32 جىل بولدى، قارتايدىڭ، 73 جاسقا كەلدىڭ دەسەم، كەشەگى ەككەن شىبىق بۇگىن تەرەك بولدى، قۋراتقىم كەلمەيدى  دەپ، قايتا قۋراعانداردىڭ ورنىنا جىلدا تولىقتاپ تال ەگىپ مولايتىپ بارادى، ۇيىم دا قولداپ-قۋاتتاپ، اعاشتاردى سۋارۋعا سۋ جاقتان كومەك جاساپ جاتقانى وعان جىگەر سيلاپ، تاڭ اتقاننان كۇن باتقانعا دەيىن باقشانى ارالاپ، تالدى  سۋارىپ، ارام شوپتەردى وتاپ، بالا- شاعالارعا دا اۋلالارىڭا اعاش ەگىڭدەر، جاسىل اۋلا جانعا جايلى  دەپ ۇنەمى ايتىپ وتىرادى» دەدى.
 

  رەداكتورى: گۇلنۇر جۇماش قىزى
 
  تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
 
  مسالى: «تارباعاتاي اقپارات تورابىنان» الىندى.