ءتىلشىمىز ليۋ پىڭ، جۇماجان بەگزاتقان ۇلى حابارلايدى. «ساۋ بولىڭىز، تاعى دا كەلۋىڭىزدى قارسى الامىز». 4 - ايدىڭ 6 - كۇنى تۇستە ءدوربىلجىن اۋدانى قالاماڭى اۋىلى چيڭچۋان قىستاعىنىڭ تۇرعىنى چىن شينچاڭ 5 الارمانىن جولعا سالدى، ءبىر ءتۇستىڭ وزىندە 100 يۋاننان ارتىق كىرىس كىرگىزدى.
چىن شينچاڭ: «ۇيدە وتىرىپ اقشا تاباتىنىمىزدى بۇرىن ويلاپ كورمەگەن ەكەنمىن، مۇنداي وراي — قارامايلى-شاۋەشەك تەمىر جولىنىڭ ارقاسىندا كەلىپ وتىر. قارامايلى-شاۋەشەك تەمىر جولىنىڭ چيڭچۋان قىستاعىنان وتەتىنىن ەستىپ، بىلتىر 5 ميلليون يۋان قارجى قوسىپ، ءوز اۋلامنان 600 شارشى مەترلىك شارۋالار ساياجايى مەن ەرەن بازار سالدىم، كۇنىنە كەلەتىن الارمانداردىڭ اياعى ۇزىلمەيدى، كۇندەلىكتى تيجارات سومامىز 500 يۋاننىڭ ۇستىندە، بيىل تيجاراتتى كەڭەيتكەننەن كەيىن، ساۋدامىزدىڭ ءتىپتى دە كۇسەت بولاتىنىنا سەنىمىم كامىل» دەدى.
ۇعىسۋعا قاراعاندا، قارامايلى-شاۋەشەك تەمىر جولىنىڭ ءدوربىلجىن اۋدانىنداعى بولەگىنىڭ جالپى ۇزىندىعى 91.7 كيلومەتر بولىپ، 10 اۋىل، قالاشىق، 29 قىستاقتى باسىپ وتەدى. بيىل رەليس توسەۋ ساتىسىنا ءوتتى، كەلەر جىلى پويەز قاتىنايدى.
تەمىر جول اۋقاتتانۋ ورايىن الا كەلگەننەن كەيىن، چيڭچۋان قىستاعىنداعى تۇرعىندار دا چىن شينچاڭ سياقتى ‹جەدەل قارمانىپ›، «جىبەك جولى ەكونوميكالىق بەلدەۋىنىڭ» وسى قاتىناس «كۇرە تامىرىنا» سۇيەنىپ، كەدەيلىكتەن قۇتىلىپ، دوڭگەلەك داۋلەتتى ورەگە جەتۋدىڭ قامىنا كىرىستى.
قىستاق تۇرعىنى جاڭ جۇن 3 ميلليون يۋان قارجى قوسىپ اۋلاسىنان اۆتوكولىك رەمونتتاۋ زاۆودىن سالسا؛ ما فۋچيڭ 4 ميلليون يۋان قارجى قوسىپ يىڭمين مال باعىمشىلىعى كاسىپتىك كووپەراتيۆىن؛ جاڭ ارميڭ 2 ميلليون يۋان قارجى قوسىپ، تەمىر تور زاۆودىن؛ تىڭ يۇڭشىڭ 3 ميلليون يۋان قارجى قوسىپ تامشىلاتىپ سۋارۋ قۇرىلعىسىن جاساۋ زاۆودىن؛ ۋاڭ چيڭچۋان جيانياڭ تاس كاسىبىن اشقان...
چيڭچۋان قىستاعى كوميتەتىنىڭ مەڭگەرۋشىسى ۋاڭ حۋانچۇن: «قارامايلى-شاۋەشەك تەمىر جولى قىستاقتىڭ نەگىزدىك قۇرىلعىلارىنىڭ دارەجەسىن جوعارىلاتۋمەن بىرگە، جەرگىلىكتى ورىنداعى تۇرعىنداردىڭ ءوندىرىس-تۇرمىس شارت-جاعدايىن دا جاقسارتتى. 2017-جىلى قىستاقتاعى 291 وتباسىنداعى 869 ادامنىڭ ەكىنشى، ءۇشىنشى كاسىپپەن شۇعىلدانعاندارى جالپى وتباسىنىڭ ۇشتەن ءبىر بولەگىن يەلەپ، سول جىلعى ەگىنشى-مالشىلاردىڭ كىسى باسىندىق كىرىسى 11 مىڭ 400 يۋاننان اينالىپ، تاريحتاعى ەڭ جوعارى ورەنى جاراتتى. مۇنان بىلايعى جالپى تۇلعالىق دامۋ جونىنەن، قىستاق ‹ەكى كوميتەتى› قىستاقتاعى 140 مۋ بوس جەردەن پايدالانىپ، ساۋداگەر باۋراپ، قارجى ەنگىزۋ ارقىلى ساۋدا زات اينالىمى باقشاسى نەمەسە ءىرى تۇرپاتتى اۆتوكولىك رەمونتتاۋ زاۆودىن قۇرىپ، قىستاق تۇرعىندارىنىڭ كىرىسىن جالعاستى ارتتىرۋىنا جول تاۋىپ بەرۋدى جوسپارلاپ وتىر» دەدى.
قارامايلى-شاۋەشەك تەمىر جولى چيڭچۋان قىستاعىن وياتۋمەن بىرگە، كورشىلەس اۋىل، قالاشىق، الاڭدارداعى شارۋالار مەن كاسىپورىندارعا دا تاماشا اۋقاتتانۋ ورايىن جاراتىپ بەردى.
چيڭچۋان قىستاعىمەن كورشىلەس وتىراتىن قالاماڭى اۋىلى حويىرمودىن قىستاعىنىڭ تۇرعىنى گو تيانفىڭ 30 ميلليون يۋان قارجى قوسىپ، بەس جىل ىشىندە 800 مۋ جەر يەلەيتىن ءسان-سەيىل، كوڭىل اشۋ، مالتاۋ، اس-سۋ، ەمدەۋ مەن كۇتىمدەلۋ ءبىر تۇلعالانعان باقشا رايونىن سالۋدى جوسپارلاعان. كەزەكتە ءبىرىنشى مەرزىمدەگى مالتاۋ، اس-سۋ نىساندارى پايدالانۋعا بەرىلدى.
ەمىل مال فەرماسى قاتىناس ابزالدىلىعىنان پايدالانىپ، 20 ميلليون يۋان قارجى قوسىپ، ۇلتتىق قولونەر بۇيىمدارىن جاساۋ، تاربيەلەۋ، كورمەگە قويۋ، ساتۋ ءبىر تۇلعالانعان «حالىق قولونەرحاناسىن» سالىپ، قارامايلى-شاۋەشەك تەمىر جولىنان پايدالانىپ ءداستۇرلى قولونەر بۇيىمدارىن ەل ءىشى-سىرتىنا دەيىن ايگىلەمەكشى.
حوزەرتى موڭعۇل ۇلتتىق اۋىلى اقجارجوتا قىستاعىنىڭ تۇرعىنى ما شينۋىن قارامايلى-شاۋەشەك تەمىر جولى اكەلگەن دامۋ ورايىن مىقتى يگەرىپ، دۇڭشياڭ ۇلتىنىڭ ءداستۇرلى ەرەكشەلىككە يە اس-سۋ ونەرىن نەگىزگە الا وتىرىپ، 12 قىستاق تۇرعىنىنان قۇرالعان دۇڭشياڭ ۇلتىنىڭ شارۋالار ساياجايى اس-سۋ قوعامىن قۇرىپ، دۇڭشياڭ ۇلتىنىڭ سالت-ساناسىن ايگىلەيتىن شارۋالار ساياجايىن دامىتىپ، دۇڭشياڭ ۇلتىنىڭ ەرەكشەلىككە يە اس-سۋ ماركاسىن ايگىلەۋگە كىرىستى. كەزەكتە ماڭدايشالىق اسۋعا دايىندالىپ، قوناق قابىلداۋدى جوسپارلاپ وتىر.
ايتا كەتۋگە تاتيتىنى، شينجياڭداعى ەڭ ۇلكەن جۇگەرى مانەرلەيتىن كاسىپورىن — ءدوربىلجىن شينحۇڭجي جەم -ءشوپ شەكتى سەرىكتىگى بيىل بىلتىرعى ءونىم مولشەرى نەگىزىندە تاعى دا 5000 توننا كوبەيتىپ، ىشكى قوزعاۋشى كۇشتى ارتتىرىپ، وسى ماركانى پويەز ارقىلى ىشكى ولكەلەرگە دەيىن دامىتپاقشى.
ايماعىمىزداعى ەڭ ۇلكەن ءبيداي مانەرلەۋ كاسىپورنى سانالاتىن شينجياڭ شينتيانجۇن ۇن شەكتى سەرىكتىگى كاسىپورىندى دامىتۋدى جەدەلدەتۋمەن بىرگە، كەلەشەكتەگى دامۋ جولدارىن دا ەرتە ويلاستىرىپ، تاپسىرىس كولەمىن بىلتىرعى80 مىڭ مۋدان 100 مىڭ مۋعا ارتتىرماقشى. سەرىكتىكتىڭ ورىنباسار ديرەكتورى جاڭ ۋيدىڭ سوزىمەن ايتقاندا: «تەمىر جول قاتىناعاننان كەيىن، قاتىناس - تاسىمال قولايلى بولىپ، سەرىكتىكتىڭ تاڭەرتەڭ وندىرگەن ‹تيانجۇن› ماركالى ۇنىن تۇستەن كەيىن شينجياڭنان شىعارۋعا بولادى» ەكەن.
رەداكتورى: گۇلنۇر جۇماش قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان الىندى»