ءتىلشىمىز لي ميڭشىڭ
4-ايدىڭ 22-كۇنى شاعانتوعاي اۋدانى جانكىسى اۋىلى وڭتۇستىك قىستاعىنىڭ تۇرعىنى ي يانجۇننىڭ اۋلاسىنا باردىق. ەكى مۋدان اساتىن اۋلا رەتتى ورنالاستىرىلىپ، الدىڭعى اۋلاداعى 10 نەشە ءتۇپ ورىك، شاپتول اعاشى گۇلدەپ، قالتقىداعى كوكونىستەرى جايقالا وسسە؛ ارتقى اۋلاداعى تەرەكتەردىڭ اراسىنا ەككەن سەكپىلگۇلى بوي تالاسادى.
بىرنەشە جىل سىناق ەتۋ ارقىلى ي يانجۇن تەرەك اراسىنا سەكپىلگۇل ەگۋ تەحنيكاسىن يگەرگەن. اۋلاداعى جەمىس اعاشتارى مەن سەكپىلگۇلدەن جىلىنا 30 مىڭ يۋانداي كىرىس كىرگىزەدى ەكەن. ونىڭ وسى تابىستى ىزدەنىسى قىستاقتىڭ اۋلا شارۋاشىلىعىن دامىتۋىنا تۇرتكى بولعان.
قىستاق پارتيا ياچەيكاسىنىڭ شۋجيى ي يانۋىننىڭ تانىستىرۋىنا قاراعاندا، قىستاقتا اۋلاسىنداعى بوس جەردەن پايدالانىپ، اۋىل شارۋاشىلىق قوسىمشا ونىمدەرىن دامىتۋ ارقىلى كىرىستەرىن ارتتىرىپ وتىرعان وتباسى 10 نان اسادى ەكەن.
التىن ەمىل اۋىلى قىزىلبۇلاق قىستاعىنداعى ساۋيا: «جۇمىرتقا 1.5 يۋاننان، تاۋىق 100 دە 120 يۋاننان ساتىلادى، باعاسى وسىنشا جاقسى بولىپ تۇرسا، اۋلا شارۋاشىلىعىمەن شۇعىلدانباي نە ىستەيمىز» دەدى.
ول باستابىندا بالالارىنىڭ وقۋ قاراجاتى مەن تۇرمىستىق قاجەتتى قاناعاتتاندىرۋ ءۇشىن، تاۋىق باعا باستاعان. كەيىن قىستاقتا اۋلا شارۋاشىلىعىنىڭ جاندانۋى مەن قىستاقتا تۇراتىن قىزمەت اترەتىنىڭ ونىمدەرىن ساتۋىنا كومەكتەسۋىنىڭ ارقاسىندا باعىمشىلىق كولەمىن ۇلعايتا تۇسكەن. قازىر جۇمىرتقانىڭ وزىنەن ايىنا بىرنەشە ءجۇز يۋان كىرىس كىرگىزەدى ەكەن.
قىستاقتاعى تۇرمىسىندا قيىنشىلىعى بار وتباسى تالداۋگۇل ەلدىڭ اۋلا شارۋاشىلىعىمەن شۇعىلدانىپ كىرىس كىرگىزىپ وتىرعانىن كورگەننەن كەيىن 20 نەشە تاۋىق باعادى. كوپتىڭ جان - جاقتىلى كومەگىندە ونىڭ تۇرمىسى جاقسارا ءتۇستى.
ول ءوز اۋلاسىنا كوكونىس ەگۋمەن بىرگە، ءوزى پىسىرعان توقاش - پراندىكتەردى دە ساتىپ، جاڭا تۇرمىسقا دەگەن سەنىمى ارتا ءتۇستى.
قازىر قىزىلبۇلاق قىستاعىنداعىلاردىڭ ءبارى اۋلا شارۋاشىلىعىمەن شۇعىلدانادى.
جۋىق جىلداردان بەرى شاعانتوعاي اۋدانى ەرەكشەلىكتى كورنەكتىلەندىرىپ، بايلىق ابزالدىلىعىن تياناق ەتىپ، «ەگىمشىلىككە قولايلى بولسا، ەگىمشىلىكتى، باعىمشىلىققا قولايلى بولسا، باعىمشىلىقتى، سەيىل - سەرۋەنگە قولايلى بولسا، سەيىل - سەرۋەندى دامىتۋ» پرينسيبى بويىنشا، جەرلىك جاعدايعا ۇشتاستىرا وتىرىپ اۋلا شارۋاشىلىعىن دامىتتى. اۋىل شارۋاشىلىق ماماندارىن، جەرلىك شەبەرلەردى قىستاقتارعا، اتىز باستارىنا جىبەرىپ، اۋلا باعىمشىلىعى، اۋلا ەگىمشىلىگى تەحنيكالارى مەن باسقارۋ جاعىنداعى بىلىمدەردى شارۋالارعا ۇيرەتىپ، شارۋالاردىڭ ءوندىرىس بەلسەندىلىگىن قوزعادى. وسىمەن بىرگە، جاسىل، ەرەكشەلىككە يە سورتتاردى بەلسەنە ەنگىزىپ، اۋىل شارۋاشىلىق قوسىمشا ونىمدەرىنىڭ ساپاسىن جوعارىلاتتى.
اۋلادا ەگىلگەن كوكونىس، جەمىس - جيدەك، ءشوپ ءدارى جانە گۇلدەر مەن باسباي قويى، كوركي، تاۋىق باعۋ سياقتى كاسىپتەر شارۋالار كىرىسىنىڭ ارتۋىنا جەبەۋشى بولدى.
قازىر شاعانتوعاي اۋداندىق پارتكوم مەن ۇكىمەتتىڭ قولداۋىندا شارۋالار اۋلا شارۋاشىلىعىمەن جابال شۇعىلدانىپ، اۋلا شارۋاشىلىعى جەدەل دامىپ، ەكونوميكالىق ونىمدىلىگى ارتا ءتۇستى.
رەداكتورى: گۇلنۇر جۇماش قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان الىندى»