ۇسىنىس ەتىلگەن ءتىلشى مايرا ايتقۇرمان قىزى حابارلايدى. ءدوربىلجىن اۋدانىنىڭ جەلاعاش قالاشىعى مۇقىرسۋ قىستاعى كوللەكتيۆ شارۋاشىلىقتى دامىتۋ بارىسىندا قىستاقتىڭ ءشوبى شۇيگىن،سۋى تۇنىق بولۋ ارتىقشىلىعىنان پايدالانىپ،دامۋدىڭ جاڭا جولىن ىزدەدى.
بيىل وسى قىستاقتىڭ 160 مۋ جەرگە ەككەن ازىقتىق مايعا پايدالاناتىن شۇعىنىق گۇلى ءدال قازىر گۇل اشىپ، ساياحاتشىلاردىڭ كوز مەيىرىن قاندىردى. جازدىڭ العاشقى ماۋسىمىندا مۇقىرسۋدىڭ شۇعىنىق گۇلى بازاسىنا كەلسەڭىز، اق مامىقتاي گۇل مەن جاسىل جاپىراقتار كوركەم كورىنىس قالىپتاستىرىپ تۇرعانىن كورەسىز. مىنە وسىنداي كوركەم كورىنىستى تاماشالاۋعا ءار كۇنى كەلەتىن ساياحاتشىلاردىڭ اياعى ۇزىلمەيتىن بولعان. ساياحاتشى لۋ شياۋچين: «وسى اراعا كەلگەندە شۇعىنىق گۇلىنىڭ ءيىسىن بىردەن سەزدىك، قاراساق اق ءتۇستى شۇعىنىق گۇلى ەكەن، سونداي كوركەم، ءيىسى مۇرىن جارادى» دەدى.
مۇقىرسۋ قىستاعى تاۋ بوكتەرىنە ورنالاسقاندىقتان، ەگىستىكتى سۋارۋ قيىن، وسىنىڭ ىقپالىنان ۇزاق جىلداردان بەرى شارۋالاردىڭ كىرىسى دە تومەن بولىپ كەلگەن. قازىر قىستاقتا ارحيۆ ورناتىلىپ، كارتۋچكا تۇرعىزىلعان كەدەي وتباسى 42 بولعان.
جەلاعاش قالاشىعى مۇقىرسۋ قىستاعىنىڭ پارتيا ياچەيكا شۋجيى لي اننيڭ: «بۇرىن ەكونوميكالىق داقىل ەكسەك، ءونىمى ويداعىداي بولماي، كىرىسىمىز باسقا جەردەن كوپ تومەن بولاتىن. سەبەبى، سۋ قاينارى الىس بولعاندىقتان، جاقسى سۋارىلماعان داقىلدىڭ مول ءونىم بەرۋى دە مۇمكىن ەمەس ەدى» دەدى.
كەدەيلەردى دالمە-ءدال سۇيەمەلدەۋدە قىستاقتىڭ امالياتىنا قاراي وتىرىپ، مۇقىرسۋ قىستاعى پارتيا ياچەيكاسى ەكسكۋرسيالاۋ، ۇيرەنۋ ارقىلى قۋاڭشىلىققا ءتوزىمدى، باپتاپ-باسقارۋ قولايلى، ءونىمى كورنەكتى بولعان مايعا ىستەتىلەتىن شۇعىنىق گۇلىن ەگۋدى تاڭدادى. 2016-جىلى قىستاق پارتيا ياچەيكاسى گانسۋ ولكەسىنەن ازىقتىق مايعا ىستەتىلەتىن شۇعىنىق گۇلىن ەنگىزىپ، كوللەكتيۆتىڭ 160 مۋ جەرىنە وسى گۇلدى ەكتىءارى جاسىل دامۋ، قىستاقتى گۇلدەندىرۋ، دالمە-ءدال سۇيەمەلدەۋ، حالىقتى ەرەكشە ونىممەن اۋقاتتاندىرۋ سىندى قىستاقتىڭ دامۋ وي جەلىسىن بەلگىلەدى.
جەلاعاش قالاشىعى مۇقىرسۋ قىستاعىنىڭ مەڭگەرۋشىسى ۋاڭ جىچياڭ: «شۇعىنىق گۇلىن جاعالاي ەگىپ، ساياحات ورنىن قۇرماقشىمىز، جول جوندەپ، شاتىر سالىپ، قاز، ۇيرەك، تاۋىق باعاتىن بولساق، تاۋ مەن سۋدان تولىق پايدالانعان بولامىز، ونىڭ ۇستىنە ورتانى دا كوركەيتەمىز، وسىنىڭ ءبارى قىستاق تۇرعىندارىنىڭ كىرىسىن ارتتىرۋ ءۇشىن» دەدى.
ازىقتىق مايعا ىستەتىلەتىن شۇعىنىق گۇلى گۇل اشقاندا تاماشالاۋعا ادەمى كورىنىس بولسا، ءونىم بەرگەندە ەكونوميكالىق كىرىستى ارتتىرادى. ونىڭ گۇل جاپىراعى مەن گۇل تۇيىنىنەن شاي جاسالسا، تامىرى دارىگە، ءدانى ماي تارتۋعا ىستەتىلەدى. 2019-جىلى مۇقىرسۋ قىستاعىنىڭ ازىقتىق مايعا ىستەتىلەتىن شۇعىنىق گۇلى ءونىم بەرۋ مەزگىلىنە وتەدى دە، ءار مۋىنان 5 مىڭ يۋان كىرىس كىرەدى دەپ مەجەلەنىپ وتىر، بۇل شارۋالاردى قۋانىشقا بولەدى. جۇگەرى ەگىمشىلىگىمەن شۇعىلداناتىن شارۋا لي چياڭ وسى شۇعىنىق گۇلىن كورگەننەن كەيىن جاڭا ويعا كەلدى.
مۇقىرسۋ قىستاعىنىڭ تۇرعىنى لي چياڭ : «ءار جىلعى جۇگەرىنىڭ ءتۇسىمى ويداعىداي ەمەس، ءار مۋ جەردەن الاتىن ءونىم 700 كيلوگرام عانا، باسقا قىستاقتارمەن سالىستىرعاندا ءونىم مولشەرى كوپ تومەن. ەگەر شۇعىنىق گۇلىنىڭ ءونىمى جوعارى بولسا، كەلەر جىلى 200 مۋ جەرگە تۇگەلدەي شۇعىنىق گۇلىن ەگەمىن» دەدى.
شۇعىنىق گۇلى جايىندا مۇقىرسۋ قىستاعىنىڭ «ەكى كوميتەتى» بۇدان كەيىن اۋىل-قىستاق ساياحاتىن دامىتىپ، شۇعىنىق گۇلى قىستاعىن قۇرىپ، شۇعىنىق گۇلىن شىن مانىندەگى شارۋالاردىڭ اۋقاتتانۋ گۇلىنە ايلاندىرۋدى جوسپارلاپ وتىر.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان»الىندى