بەردىباي جاقيالين
مەن ەرتوستىك بولا المادىم،
بالا كۇنگى ءتاتتى ەدى سول ارمانىم.
ايدالادا اقبوز ءۇي قالدى دەۋشى ەد،
جولىم ءتۇسىپ وعان دا سوعا المادىم.
جاڭبىردا پانالاعان تاس قۋىسىن،
بالا كۇن قايدا ءجۇرسىڭ،جاقسىمىسىڭ؟!
مەن قۇساپ…
ءبىر-اق رەت شىن جىلاپ -اپ،
مەن قۇساپ ءتۇڭىلدىڭ بە، اق كۇمىسىم!
اسىعىس اق وزەندەر جول بەرمەگەن،
اقباس تاۋ ۇرسىسقىم بار سەندەرمەنەن.
ەسكىشىل ەرنازاردىڭ توعىزىنىڭ،
كەنجەسى ەم،
سەگىزىنە تەڭ كورمەگەن.
قاناتتى شالقۇيرىعىم -ارعىماعىم،
بالا كۇنگى ءتاتتى ەدى سول قيالىم.
پەرى قىزى بەكتورى جۇرەتۇعىن،
سىتىرلاتىپ قىرقانىڭ بوز قياعىن.
بەلىنەن اق تورعىنى شۇباتىلىپ،
بوز قىرعا كىم شىقپاعان بۇراتىلىپ؟
قۋ بۇتاقتىڭ ءىلىنىپ قىل ۇشىنا
اپپاق- اي سۋىق سورعان تۇر اسىلىپ.
بوشالاپ كەتتى دەگەن بوزىنگەننىڭ،
قاي ءبىر جاقتا جايىلعان ءوزىن كوردىم.
«كەنجەكەيىم ءبىر توبە» دەپ باستايتىن،
«قايىناپامنىڭ» كەلگەنى-اي ءسوزىن بولگىم.
مەن ەرتوستىك بولا المادىم،
بالا كۇنگى ءتاتتى ەدى-اۋ سول ارمانىم…
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى؛ « تارباعاتاي اقپارات تورابىنان »الىندى