ماقسات قيزات ۇلى
سەن ونىڭ وتكەن كەزدەردەگى جەتەرسىزدىگىنەن باسقانى كورمەي، سوعان تاس كەنەشە جابىسىپ الساڭ، وندا بۇل سەنىڭ السىزدىگىڭ مەن ءىشتارلىعىڭنان باسقا ەشتەڭەدە ەمەس.
وزگەگە وتكەن شاقتىڭ كوزىمەن قاراۋ ادىلەتسىزدىك. ول وسىنشاما ۋاقىتىن وزگەرۋ ءۇشىن وتكىزدى، ونىڭ وتكەندەگى ءبىر قاتەلىگىنە بولا ونىڭ جەتىستىگىن جوققا شىعارۋ قاتىگەز پەندەنىڭ حارەكەتى.
ادام قاشان دا وزگەرىستىڭ ۇستىندە ءومىر سۇرەدى.
وزگەرسەم دەپ تالپىنعان ادامنىڭ ومىرگە اكەلەر پايداسى مول. سەن وزگەرگەن ادامعا قۇرمەتپەن قاراي ءبىل، ءوزىن وزگەرتىپ، ومىرگە سايكەسكەن ادامدى ونەگە تۇت. كەشەگى مومىن، بۇگىن ەل كوزىنە تۇسكەن سەنىمدى ساردار، كەشەگى كەدەي بۇگىن ەلدى اۋزىنا قاراتقان سەرىكتىكتىڭ باس جوراسى بولار.
ەشكىمدە كەمەلدى بولىپ تۋمايدى، كوسەم بولسا دا كوپپەن بىرگە كورىپ، كوشپەن بىرگە تۇزەلەدى.
قاسىڭداعى قۇربىڭا ءۇمىت كوزىمەن قارا، بىرەۋ جيىرماسىندا جارقىلدايدى، بىرەۋ وتىزىندا وردا بۇزادى، ال قىرقىندا قامال الىپ، ەلۋىندە ەل كوزىنە ءتۇسىپ، الپىسىندا اسقارعا شىعىپ جاتقانداردا بار.
بارىنە دە ۋاقىت بەر، وزىڭە دە، وزگەگە دە. سەرىگىڭە سەنىممەن، اينالاڭا مەيىرىممەن قارا.
ول بۇگىن ءۇمىتىڭدى اقتاماعانىمەن ەرتەڭ اقتايتىن بولادى. سەن دە ءوزىڭنىڭ وسى قالىپتا تۇرىپ قالمايتىنىڭدى ءبىل. ورتاڭا، زامانىڭا قاراي ءىس كورسەڭ بارلىق جاڭالىق ساعان قۇشاق اشادى.
«وي، ءبىز كورگەندە بۇل باياعى سول قاۋدىر توندى قاقپىشتىڭ ءوزى ەدى عوي، ەندى جان كىرىپ، جوندانايىن ەكەن»،-دەپ دوسىنا مۇرنىن شۇيىرەتىندەر ءوزىنىڭ السىزدىگىن جاپقىسى كەلەتىندەر، ءومىر ءسۇرۋدىڭ ءوزى وزگەرۋ، ءوزىن ۇزدىكسىز كەمەلدەندىرۋ، جاماندىقتان قاشىپ، جاقسىلىققا ۇمتىلۋ، ەلدى جاڭالىعىمەن جالت قاراتۋ.
وزگەرمەيتىندەر ومىردەن ءۇمىتىن ۇزگەندەر.
بويدىڭ ءوسۋى مەزەتتىك تە،ويدىڭ ءوسۋى ماڭگىلىك.
«ول كەشە اناداي ەدى عوي، بۇگىن بۇيتە قالىپتى» دەپ سەن وزگەنى ءسوز ەتىپ وتىرعاندا، ول الدەقاشان وڭ وزگەرىستىڭ پاراۆوزىنا وتىرىپ العان بولار.
سەن وزگەنىڭ وتكەن شاعىمەن ەسەپتەسكەنشە، ءوزىڭنىڭ بۇگىنگى شاعىڭنىڭ شاراپاتىن شامالا، وزگەنى مىنەي بەرگەنشە، ءوزىمىزدى تۇزەي بىلەيىك، ۋاقىت توسىپ تۇرمايدى، ۋاقىت بىزگە وزگەنىڭ وتكەنىن باعالاۋعا بەرىلگەن جوق، ۋاقىت بىزگە بۇگىنىمىزدى قادىرلەپ، ءوزىمىزدى ۇزدىكسىز وزگەرتىپ، ءومىرىمىزدى گۇلدەندىرۋگە بەرىلگەن.
وزگەرىستى ءتۇسىنىپ، سوعان تالپىنا بىلسەڭ، ەل دە سەنى ەركەلەتەدى.
بۇل جەردەگى وزگەرۋ وسال تۇسىڭدى بەكەمدەپ، تابىسقا جەتۋدى مەڭزەيدى. وزگەرىسكە تاڭ قالۋدىڭ قاجەتى جوق، وعان تاڭعالاتىندار وزىنە سەنبەيتىندەر، وعان تاڭعالاتىندار ءوزىن دە، ويىن دا جاڭالامايتىندار. وزگەرىسكە سەنبەيتىندەر، ومىردەن ءۇمىتىن ۇزگەندەر. وزگەرىسكە سەنبەيتىندەر وزگەنى كۇندەيتىندەر.
ءبىز نەگە سونشا جانتالاسىپ جۇمىس ىستەيمىز، نەگە اق شاشىمىزدى قارايتامىز ءبارى دە وزگەرۋ ءۇشىن،
قازىرگى تۇرمىسىمىزدى وزگەرتىپ، جاڭاشا، ادەمى ءومىر كەشۋ ءۇشىن ەمەس پە. مىڭ جىلدىقتان بەرى ادامزاتتىڭ جانتالاسىپ كەلە جاتقان تىربىڭىنىڭ ءبىر نيەتى وسى.
ادامدار وزگەرۋدى قالاماسا، اسپاندا ۇشىپ جۇرمەس ەدى عوي. وت ارباعا مىنگەن بۇگىنگى ۇرپاقتى وگىز ارباعا مىنگىزىپ قويۋعا بولار ما؟ مۇمكىن ەمەس، ولار بۇنداي وزگەرىستى مۇلدەم قالامايدى، ولار زىمىرانعا وتىرىپ، ايعا ساياحاتتاۋدى ويلايدى. ول مۇمكىندىك وزىق ەلدە الدەن جوسپارعا ەنىپ تە بولدى.
وزگەرمەسەڭ وزگەدەن قالاسىڭ.
ءبىز وسى شەكتى ۋاقىتتا ءوزىمىزدى وزگەرتە الۋىمىز كەرەك. «وتىزىندا وردا بۇزباعان، قىرقىندا قامال الاما» دەگەن ءسوزى بەكەر ايتىلماعان.
ءوزىڭدى ەرتە باستان وزگەرتە ءبىل، قانشا ەرتە بولسا، سونشا جاقسى، ەرتە ۇيرەنسەڭ، ەرتە وزگەرەسىڭ، ەرتە وزگەرسەڭ، ەرتە تابىسقا جەتەسىڭ. وزگەرىس ۋاقىتقا دا تاۋەلدى، ۋاقىتتى ۇتقان ادام، وزگەرىستەن ۇتادى.
ەلدىڭ وزگەرگەنىنەن ونەگە ال، وزگەرمەسەڭ ءومىرىڭنىڭ ءمانى جوق، ورگە شىققىڭ كەلمەسە ءبىر ءسارى، وندا وزگەرمەي، ورنىڭ دا قالا بەر.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى