پاناسىز قارتتارعا قامقورشى بولدى

  ءتىلشىمىز جىگەر ومىربەك ۇلى حابارلايدى. ايماقتىق قوعامدىق يگىلىك ورنىنىڭ جۇمىسشىسى جاينار مۇراتبەك قىزىنىڭ وتباسى دۋمانعا شومدى، جاينار قوعامدىق يگىلىك ورنىنداعى ءبىرقانشا پاناسىز قارتتاردى ۇيىنە قوناق بولۋعا شاقىرعان-دى. بۇل جايناردىڭ ۇيىندە ءار اپتادا بولىپ تۇراتىن تۇراقتى باس قوسۋ ەدى، قارتتار پالاۋ باسىپ، كوكونىس ارشىپ،  جەمىس-جيدەك جۋىپ، اڭگىمە شەرتىسىپ  وتىر… جاينار قارتتاردىڭ كوڭىلدەنە شۇيىركەلەسىپ وتىرعانىن كورىپ، مىنا جاقتا قولعابىس جاساپ جۇرگەن ۇلىنا: «كومەك كورسەتكەن ادامىڭ كوپ بولسا،ءوز كوڭىلىڭ جادىراپ قالادى» دەدى.

    47 جاستاعى جاينار ايماقتىق قوعامدىق  يگىلىك ورنىنىڭ قاراپايىم ءبىر قىزمەتكەرى، كاسىبىن قىزۋ سۇيەدى، مىنەزى اشىق-جارقىن، ول پاناسىز قارتتارعا قارايلاسۋمەن 28 جىلىن ءبىر كۇنگىدەي وتكىزدى.

     70 جاستاعى قوعامدىق يگىلىك ورنىنداعى قاريا لو يۇيلين: «جاينار مەنىڭ تۋعان قىزىمداي بولىپ كەتتى، ۇزاق جىلدان بەرى ول بىزگە شىن ىقىلاسىمەن قارايلاسىپ كەلەدى، مەنىڭ  كوپ جىل بولعان تەرى اۋرۋىمدى ول دەن قويا ەمدەدى، سونىڭ ارقاسىندا جاقسى جازىلدى» دەدى.

     1990-جىلى جاينار ايماقتىق قوعامدىق يگىلىك ورنىنا كەلىپ قىزمەت ىستەيدى، قارتتارعا جاقسى قارايلاسۋ ءۇشىن، ول 1999-جىلى ايماقتىق مەديتسينا مەكتەبىنىڭ ارناۋلى ەمدەۋ-كۇتۋ كاسىبىنەن 3 جىل وقيدى. كوپ جىلداردان بەرى ول قوعامدىق يگىلىك ورنىنىڭ نەگىزدىك ەمدەۋ-كۇتۋ قىزمەتىن ۇستىنە الىپ، قارتتاردى شيپاحاناعا جاتقىزۋ، شيپاحانادان الىپ شىعۋ سياقتى ىستەردى ىستەپ، قارتتارعا ءوز اتا-اناسىنداي قارايلاسىپ كەلەدى. كەي كەزدەرى ەكونوميكالىق شارت-جاعدايى تومەن قارتتارعا جولىققاندا ولاردىڭ ەمدەلۋ قاراجاتىن دا تولەپ كەلەدى.
 
    قوعامدىق يگىلىك ورنىنىڭ جۇمىسشىسى جاينار: «شەشەم 13 جاس كەزىمدە دۇنيە سالدى، اكەم مەنىڭ 34 جاسىمدا دۇنيەدەن ءوتتى. مەن ول كىسىلەرگە بالالىق بورىشىمدى وتەي المادىم. قوعامدىق يگىلىك ورنىندا قىزمەت ىستەپ، قارتتاردى بەينە ءوز اكە-شەشەمدەي كورىپ قارايلاسىپ كەلەمىن، مەن ءوز كاسىبىمدى سۇيەمىن، جۇبايىم مەن ۇلىم دا مەنى قولدايدى. ءار جىلعى مەرەكە-مەيرامداردىڭ بارلىعىندا، ءبىز قارتتاردى ۇيگە شاقىرىپ ءدامدى تاعام جاساپ بەرىپ، ولاردىڭ العىسىنا يە بولامىز» دەدى.

    كەي كەزدەرى، جۇبايى سەرىك قايروللا ۇلى دا قوعامدىق يگىلىك ورنىنا كەلىپ، ەت اسىپ، نارىن سالىپ بەرەدى، قارتتاردىڭ تاماقتى سۇيسىنە جەگەنىن كورگەندە، جۇبايى ەكەۋى ەرەكشە ريزا بولادى.

    مەملەكەت پەن اۆتونوميالى رايوننىڭ ءمان بەرۋىندە، ايماقتىڭ قوعامدىق يگىلىك ورنىندا تاياۋ 5 جىلدان بەرى زور وزگەرىستەر تۋىلىپ، قوعامدىق يگىلىك ورنىنىڭ قۇرىلعىلارى بارىنشا كەمەلدەنە ءتۇستى. كۇتۋشىلەر دە كاسىپتىك جاقتان تاربيەلەنىپ، پاناسىز قارتتاردىڭ جاتاقحاناسى جىلۋمەن قامدالىپ، دارەتحانا سالىنىپ، قارتتاردىڭ تۇرمىس شارت-جاعدايى بارىنشا جاقساردى.

    ايماقتىق قوعامدىق يگىلىك ورنىنىڭ ورىنباسار باستىعى شى گۇيچيڭ: «جاينار 28 جىلدى ءبىر كۇنگىدەي وتكىزىپ، ءار ۇلت قارتتارىنا دەن قويا قارايلاسىپ كەلەدى، ول قوعامدىق يگىلىك ورنىنداعى ءار ۇلت قاريالاردىڭ جاقسى قىزى. ونىڭ ىقپالىمەن، كوپتەگەن قىزمەتشىلەر وسى اراداعى قارتتارعا شىنايى سۇيىسپەنشىلىك باعىشتاپ، قارتتاردىڭ سوڭعى ومىرلەرىن الاڭسىز وتكىزۋىنە قالتقىسىز قىزمەت وتەۋدە» دەدى.

     سۋرەتتە: قوعامدىق يگىلىك ورنىنداعى قارتتار جايناردىڭ وتباسىندا بەرەكە داستارقانىنان ءدام تاتۋدا.


    رەداكتورى : جىگەر ومىربەك ۇلى                                           

  تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
  مىسالى: «تارباعاتاي اقپارات تورابىنان» الىندى