ارزىگۇل ابدەش قىزى
كەشە عانا اعاياز اسپانىنىڭ كوڭىلشەك بۇلتتارى توگىپ وتكەن. تاڭەرتەڭ ەرتەمەن باقشاعا قۇلىنشاقتى ەرتىپ، اسىعىس بەت الدىم. الەۋمەتتىك اۋماقتىڭ ماڭىنداعى شاعىن كوشەنى اينالا سالساق جەتەتىنبىز. كەنەت قۇلىنشاق ايقاي سالدى.
_ شەشە،قاراشى ۇلۋ.
مەن ءساپ-سالا قارادىم. ۇلۋ ورلەپ، داۋالدىڭ ءبىرتالاي جەرىنە بارىپتى. تاعى دا توقتاۋسىز جىبىرلاپ بارادى.
قۇلىنشاق ءسال قاراپ تۇردى دا، تاڭ قالىپ «اقىرىن جۇرەدى ەكەن» دەدى دە اسىعىپ باقشاسىنا كىرىپ كەتتى.
مەن ونى قاقپادان كىرگىزىپ، قوشتاسىپ قويىپ، جاڭاعى ۇلۋ بار ما ەكەن دەپ تاعى قارادىم. ول ءالى دە تىم باياۋ ورمەلەپ بارادى ەكەن...
كەڭسەمە جەتكەندە دوسىمنىڭ كەلتە حاتىن تاپسىرىپ الدىم. «مەن اقىرى كوڭىلدەگىدەي قىزمەت تاپتىم» دەپتى ول شۇيىنشىلەي. ءيا، ونىڭ قۇلشىنىسى، شەككەن قيىنشىلىعى ءبىر-بىرلەپ كوز الدىمنان ءوتىپ جاتتى.
ول اقىرى بارلىق كەدەرگىلەر مەن قيىنشىلىقتاردى جەڭگەن -دى.
ءالى ەسىمدە، تولىق ورتادا وقىپ جۇرگەن كەزىمىزدە، ونىڭ اكەسى اۋىر ناۋقاسقا شالدىقتى، اكەسىن ەمدەتۋ ءۇشىن ولار تۋىس -تۋعان، تانىس-بىلىستەرىنەن ءبىرتالاي قارىز الدى، ءتىپتى، ەگىستىك جەرلەرىن ۇزاق جىلعا كوتەرمەگە بەرۋگە ءماجبۇر بولدى. ونىڭ ءبىر كۇنى مەكتەپكە شەشەسىنىڭ اياق كيىمىن كيىپ كەلگەنى، ساباقتان قايتقاندا جىلاعانى ءالى ەسىمدە.
ءيا، ۇلۋ، سەن كەرەمەتسىڭ دەر ەدىم. سەن ءۇن -ءتۇنسىز، ءبىراق، تىنىم الماي العا ىلگەرىلەپ بارا جاتقانداردى ەسكە سالاسىڭ.
مەنىڭ ءبىر دوسىم بىلاي دەگەن ەدى: «مەنشە دۇنيەدە بيىككە شىعا الاتىن ەكى نارسە بار، ءبىرى، قىران، ول قاناتى بار، ۇشىپ شىعادى؛ ەندى ءبىرى، وسى ۇلۋ، ول دا تىنىم الماستان ىلگەرىلەپ، ءوز بيىگىنە شىعادى».
قاراڭىزشى، مىنا ۇلۋ «مەنىڭ ارمانىم اناۋ بيىككە شىعۋ» دەدى، جاپىراقتارى جايقالعان بيىك تەرەكتى نۇسقاپ، ول ارمانىن سەنىممەن ايتا العاندا ءتىپتى دە ايباتتانىپ كەتتى.
ءسويتتى دە جانىنداعىلارمەن قوشتاسىپ اتتاندى. كوبەلەكتەر قاسىنان ۇشىپ ءوتتى. قۇستار قيقۋلاپ، سوناۋ الىستان دەم بەردى. جاڭبىرلى كۇندەر، داۋىلدى كۇندەر، ىستىق-سۋىقتىڭ ءبارىن دە باسىنان وتكەردى. ءبىراق ءبىر ادىم، ءبىر ادىمنان ىلگەرىلەي بەردى. كەيبىر قۇرتتار دا ونان تەز ەكەن، ءا، انە، ءبىر جۇلدىز قۇرت يرەلەڭدەپ قاسىنان وتە بەردى. ءبىراق ول وعان بولا جاسىمادى. تىنباي العا تارتا بەردى. شارشاعاندا دامىلداپ، كۇنگە قاراپ كۇلىمدەدى، بويىنا قايراتىن جيىپ، تاعى دا ىلگەرىلەدى. كەيدە جاڭبىر تامشىلارى تاڭدايىنا ءنار بولىپ تامدى. كەيدە بيىكتەن قۇلاپ بارا جاتقاندا، كومەككە سوزىلعان قولداردىڭ دەمەۋىندە تاعى دا العا باسۋعا جىگەرلەندى. جاپىراقتار وعان جىلۋ سيلادى، مەيىر توكتى. ول جىلجي-جىلجي اقىرى جاسىل جاپىراقتارمەن جايقالعان نۋ ورماننىڭ جانعا جايلى بيىگىندە تۇرماي ما؟ سول بيىكتە ول اينالاسىنا بايىپپەن كوز سالدى. ءتىپتى دە كوپ دۇنيەلەردى كورە الادى ەكەنمىن.
اۋ، جايقالعان جاسىل اتىزدار، سىلدىراپ اققان بۇلاقتار، قۇلپىرا اشىلعان گۇلدەر، تىنىمسىز ۇشىپ جۇرگەن بال ارالار، ەڭبەكشىل قۇمىرىسقالار، مىنە ول سونشاما كوركەم دۇنيەلەردى تۇڭعىش كورىپ تۇرعانداي. ىنتىعا، ىقىلاسپەن قارادى. قالايدا بيىككە ورمەلەپ كورۋ كەرەك ەكەن عوي...
قۇتتى بولسىن ايتىپ، دوسىما تەلەفون جالعادىم. ءبىر قادامىن بولسا دا جەڭىسپەن باسىپ، العا ىلگەرىلەي العان جاننىڭ كوڭىل كۇيى قانداي تاماشا دەسەڭىزشى، ماعان جارقىلداي امانداسىپ، اقتارىلا اڭگىمەلەرىن جەتكىزىپ جاتىر. ول ۇستازدارىنىڭ دەم بەرۋىندە، تولىق ورتا ديپلومىن الىپتى. بىرنەشە جىلدان سوڭ، اكەسى قايتىس بولىپ، ارتىندا قىرۋار قارىز قالىپتى. ول اناسىنىڭ اۋىرتپالىعىن جەڭىلدەتۋ ءۇشىن، اۋىلدا، اناسىنىڭ جانىندا، كەزدەسكەن جۇمىستاردىڭ ءبارىن ىستەي بەرىپتى. بالا باعۋشى، اسحانادا كۇتۋشى بولىپتى. ارەدىك كومپيۋتەر ساتۋ ورىنىندا ىستەپتى. ءبىراق ول ءوزىنىڭ ۇيرەنۋىن، وقۋ ارمانىن ءبىر ساتكە توقتاتپاپتى. قاي ورىنعا بارسا دا قۇلشىنا ەڭبەكتەنىپ، ماڭايىنداعىلاردىڭ القاۋىنا بولەنىپتى. كەيىن كەلە ءبىر تانىسى «ەرەسەكتەر وقۋ اعارتۋى» جايلى اڭگىمە قوزعاپ، حات ارقىلى ورتا، جوعارى تەحنيكۋم وقۋعا بولاتىنىن، جالعاستى ۇيرەنۋگە قاتىناسىپ، ەمتيحان بەرىپ، ساباقتارىن ۋاعىندا پىسىقتاۋىن مۇقيات ءتۇسىندىرىپتى. قۋانىشى قوينىنا سيماعان ول دەرەۋ تىزىمدەلىپ، بىرنەشە جىلدا ديپلوم الىپ، اۋىلدا قىزمەتكە ورنالاسۋدىڭ العاشقى شارتىن ويداعىداي تامامداپتى. اۋىل-قىستاقتاعى جۇرتشىلىقتىڭ، باسشى كادرلاردىڭ ونىڭ ەڭبەكشىلدىگىنە، جاۋاپكەرشىلدىگىنە، ارمانىنان اداسپاعان بەرىك يراداسىنا دەگەن قۇرمەتىنىڭ، سەنىمىنىڭ ارقاسىندا جۋىردا عانا رەسمي قىزمەتكە ورنالاسقان ەكەن. ءيا، دوسىمنىڭ ارمانى ورىندالىپتى.
ءبىر ادىم، ءبىر ادىمنان، اقىرىن العا جىلجي بەرىپ، ۇلۋدىڭ دا ارمانى ىسكە اسىپتى عوي...
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى