زاڭسىز ءشوپ ءدارى قازعانداردى تەكسەرىپ جايىلىمدى قورعادى

  ۇسىنىس ەتىلگەن ءتىلشى تاۋلە قۇماش ۇلى حابارلايدى. شاعانتوعاي اۋدانى قارابۋرا اۋىلدىق جايىلىمدى باقىلاپ-باسقارۋ پۋنكتىنىڭ زاڭ اتقارۋ قىزمەتكەرلەرى بارلىق تاۋىنىڭ جۋساۋ، ءۇشبۇلاق، جالاۋلى وڭىرىندەگى قىستاۋلىقتان زاڭسىز ءشوپ ءدارى قازعاندارعا قاتاڭ تيىم سالىپ، «جۇڭحۋا حالىق رەسپۋبليكاسىنىڭ» جايىلىم زاڭ-ەرەجەلەرىن ۇگىتتەپ، ولاردى جايىلىمدى تازارتىپ، جاسىل جايىلىمدى جان كۇيەرلىكپەن قورعاۋلارىن ءۇمىت ەتتى.

  جايىلىم قىزمەتكەرلەرىمەن بىرگە الاتاۋ وتكەلىنىڭ باتىس جاعىنداعى شەكارا وڭىرىنە تاياۋ قىستاۋلىقتان قاسقىرجەم قازىپ، جايىلىمدى بۇلدىرگەن ناق مايدانعا بارعاندا جاسىل جايىلىمنىڭ قورىس-قوپاسى شىعىپ، تىشقان قورىق بولىپ جاتقانىن كورگەن قارابۋرا اۋىلدىق جايىلىمدى باقىلاپ-باسقارۋ پۋنكتىنىڭ باستىعى بولات: «قاسقىرجەم وسىنداي بورباس، سورتاڭ جايىلىمدارعا مول شىعادى، اسىرەسە سەكسەۋىل وسكەن وڭىرگە، مىنانى كوردىڭىز بە، سەكسەۋىل تۇپتەرىنىڭ قورىس-قوپاسىن شىعارعاندىقتان، سەكسەۋىل دە قۋراۋعا بەت الىپتى» دەدى. ولار ەكى ساعاتقا جۋىق ۋاقىت جۇمساپ، بۇلدىرگەن جەرلەردەگى شۇڭقىرلاردى تەگىستەپ شىقتى.

  جايىلىم قىزمەتكەرلەرى ءۇشبۇلاق وڭىرىنە بارعاندا قارابۋرا اۋىلىنىڭ قورۋشىسى گو مان: «كەلگەندەرىڭىز جاقسى بولدى، ءشوپ ءدارى قازىپ، بۇعى ءمۇيىزىن قاراعاندار ساي-سالادا قاپتاپ ءجۇر، كەشتە مالشىلاردىڭ يەن قىستاۋىنا جاتىپ تاماق ىستەپ، وت جاعىپ كەتەدى، ولاردىڭ جاتقان ورنىن قاداعالاي تەكسەرەمىن. كەشتە كەزىككەنىنە ايتقان بولامىن، كەيبىرەۋى دۇرىس قابىلدامايدى، بۇل جاعداي ءار جىلى كەزىگىپ تۇرادى»  دەدى.

  وسىدان كەيىن جايىلىم قىزمەتكەرلەرى قىستاۋلىقتاردى ارالاپ تەكسەرۋ جۇرگىزىپ، مالشىلاردىڭ قىستاۋلىعىنا جاتىپ، وتىن-سۋىنا كومەكتەسىپ، زاڭسىز ءشوپ ءدارى قازىپ، جايىلىمدى ءبۇلدىرۋ اۋىر قىلمىس ەكەندىگىن ولارعا ۇعىندىردى.
   سۋرەتتە: جايىلىم قىزمەتكەرلەرى  زاڭسىز ءشوپ ءدارى قازعان ورىنداردى   تەكسەرۋدە.

   رەداكتورى : جىگەر ومىربەك ۇلى                                           

  تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
  مىسالى: «تارباعاتاي اقپارات تورابىنان» الىندى