پارتيانىڭ قۇرىلعان كۇنىن قارسى الدى

  ۇسىنىس ەتىلگەن ءتىلشى قادىل نۇراحىمان ۇلى، ەرىكتى ءتىلشى بولات ءمۇشان ۇلى حابارلايدى. اۋەلگى ماقساتتى ۇمىتپاي، بورىشتى ەستە بەرىك ساقتاپ، اعا بۋىن توڭكەرىسشىلەردىڭ تابان ەت، ماڭداي تەرى مەن ىستىق قاندارىنىڭ بوداۋىنا كەلگەن قاسيەتتى ەڭبەك جەمىستەرىن قاستەرلەپ، بۇگىنگى ۇرپاقتاردىڭ ساناسىنا ءسىڭىرىپ، كوڭىل تۇكپىرلەرىنە ۇيالاتۋ، قاھارمانداردىڭ توڭكەرىستىك رۋحىنا مۇراگەرلىك ەتۋ سوڭعى بۋىنداردىڭ قاسيەتتى بورىشى.

  مىنە، ءدال وسىنداي پارتيانىڭ مەيىر- شاپاعاتى شار تاراپقا شۇعىلا شاشىپ، جۇڭگو ارمانى الاۋلاعان ساليقالى ساتتە، جۇڭگو كوممۋنيستىك پارتياسى قۇرىلعاندىعىنىڭ 97 جىلدىق مەرەي تويى دا كەلىپ جەتتى.

  جۋىقتا ساۋان اۋدانى بورتىنكو مال فەرماسى كوكالاشوقى قىستاق پارتيا ياچەيكاسى «تەسكەن توعان رۋحى» تاقىرىبىندا جۇڭگو كوممۋنيستىك پارتياسى قۇرىلعاندىعىنىڭ 97جىلدىعىن قارسى الۋ قيمىلىن وتكىزدى. قىستاق پارتيا ياچەيكاسى، قىستاقتا تۇراتىن قىزمەت اترەتى، قىستاقتاعى پارتيا مۇشەلەرى جانە پارتياعا ءوتىنىش بەرگەن بەلسەندىلەردى ۇيىمداستىرىپ، 50 جىلدىڭ الدىندا بورتىنكو حالقىنىڭ قان- تەرىمەن قالانىپ جاسالعان تەسكەن توعان قۇرىلىسىن كوزدەن كەشىرىپ، قايتپاس، قايسار بورتىنكولىكتەردىڭ ەگەي ەڭبەگىن ەسكە الدى.

  سوناۋ 1968-جىلى ساۋان اۋداندىق پارتكوم مەن حالىق ۇكىمەتىنىڭ جەتەكشىلىگى مەن قامقورلىعىندا، بورتىنكو باۋرايىنداعى ەگىنشى-مالشى قاۋىم قوس قولدارىنا سۇيەنىپ، تاۋ تەسىپ، 1500 مەتر ۇزىندىقتاعى توعان جاساپ، انجىحاي وزەنىنىڭ سۋىن وباتى جەرىنە جەتكىزىپ، تاريحتان بەرى تاندىر جەر اتانعان قۇبا ءتۇزدى سۋلاندىرىپ، بورتىنكو مال فەرماسىنىڭ  ەگىستىك جەردى سۋارۋ، مال سۋاتى جانە حالىقتىڭ اۋىز سۋ ماسەلەسىن شەشىم ەتكەن بولاتىن.

  بۇل يگىلىكتى قۇرىلىستى جەرگىلىكتى حالىق «تەسكەن توعان» دەپ اتاپ كەلەدى. الايدا، وسى ءبىر حيكمەتتى قۇرىلىستىڭ قاتپارىندا سول تۇستاعى ەڭبەكشى قاۋىمنىڭ اقىل-پاراساتى مەن اشتى تەرىن سوڭعى بۋىن ەسكەرە بەرمەسە كەرەك.
 
  تەسكەن توعان قۇرىلىسىن سالۋعا باستان- اياق قاتىناسقان، بۇل كۇندەرى جاسى 70 تى جەلكەلەگەن قارت پارتيا مۇشەسى اقان ءيىسباي ۇلى جاس پارتيا مۇشەلەرىنە: «تەسكەن توعاننىڭ قۇرىلىسى كۇردەلى، جۇمىستارى وتە ماشاقاتتى بولدى، حاۋىپ-قاتەر ءار ۋاقىت تۋىلىپ وتىراتىن، ەسىمدە قالۋىنشا، سول كەزدەگى جاستار قول-اياعىن تاس جانشىپ جاتسا دا، جىگەرلەرى جالىنداپ، رۋحتارى تاسقىنداپ، العان بەتتەرىنەن قايتپاۋشى ەدى. سەندەر بۇگىنگى باقىتتى تۇرمىستارىڭنىڭ سولاردىڭ جاپالى ەڭبەگىنىڭ بوداۋىنا كەلگەندىگىن ۇمىتپاڭدار،قاراقتارىم» دەدى.

  سوڭىندا پارتيا مۇشەلەرى تەسكەن توعان كومەيىنىڭ باسىنا جينالىپ،پارتيا تۋى الدىندا پارتياعا كىرگەندەگى سەرتىن ەسكە ءتۇسىردى.
  
  سۋرەتتە: پارتيا مۇشەلەرى تەسكەن توعان بويىندا، پارتيا تۋىن الىپ سۋرەتكە ءتۇسىپ، ەستەلىك قالدىرۋدا.

  رەداكتورى : جىگەر ومىربەك ۇلى                                           


  تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
  مىسالى: «تارباعاتاي اقپارات تورابىنان» الىندى