تولى اۋدانىنداعى 35 جىلجىمالى قىزمەت وتەۋ پۋنكتى جۇرت كوڭىلىنەن ورىن الدى
تىلشىلەرىمىز دۋمان يىڭۋا ۇلى، چىن ۋىن، ۋىن بو حابارلايدى. 6-ايدىڭ 25-كۇنى تاڭەرتەڭ تولى اۋدانى قالاشىعىنان 70 كيلومەتر قاشىقتىقتاعى تەمىرتام قالاشىعى ارپاسالعان قىستاعىنىڭ جايلاۋىندا 7 بال جەل سوعىپ تۇرسا دا، سارعىش ءتۇستى جىلجىمالى كەڭسەنىڭ الدىندا 65 مالشى مەملەكەت گيمنىن ورىنداپ، ايبىندى تۋ شىعارۋ ءراسىمىن وتكىزدى.
بۇل «جىلجىمالى كەڭسە» _ تولى اۋدانىنىڭ مال شارۋاشىلىق رايوندارىنا ارنايى دايىنداعان جۇرتشىلىققا قىزمەت وتەۋ پۋنكتى ەدى. تولى اۋدانىندا ءتورت ماۋسىمدا مالشىلارمەن بىرگە كوشىپ-قونىپ جۇرەتىن جۇرتشىلىققا قىزمەت وتەۋ پۋنكتىنەن 35 ى بار.
ارپاسالعان قىستاعى _ جارتىلاي مال شارۋاشىلىعىمەن، جارتىلاي ەگىنشىلىكپەن شۇعىلداناتىن قىستاق بولىپ، قىستاق تۇرعىندارىنىڭ ءبىر ءبولىمى جازدا قىستاق كوميتەتىنەن 40 كيلومەتر قاشىقتىقتاعى جايلاۋدا وتىرادى. جۇرتشىلىققا قىزمەت وتەۋ پۋنكتى قۇرىلعاننان كەيىن، قىستاق تۇرعىندارى ءتىپتى دە قولايلى قىزمەت وتەۋدەن يگىلىكتەنە الاتىن بولدى.
تۋ شىعارۋ ءراسىمى اياقتالعاننان كەيىن، قىستاق كوميتەتىنىڭ بۇرىنعى مەڭگەرۋشىسى نۇراقىمەت ەرەجەپ ۇلى (73 جاستا) جۇرتشىلىققا قىزمەت وتەۋ پۋنكتىنەن «ساقا پارتيا مۇشەسى، ساقا ەڭبەك وزاتى، ساقا جاۋىنگەر، ساقا قىستاق كادرىنە» بەرىلەتىن 2 ايلىق قوسىمشا قاراجاتىن الدى. جارىم ايدىڭ الدىندا قىستاق تۇرعىنى الميرانىڭ ءبىر سيىرى تاۋدان قۇلاپ ولەدى. قىستاقتا تۇراتىن قىزمەت اترەتىنىڭ باستىعى، قىستاق پارتيا ياچەيكاسىنىڭ ءبىرىنشى شۋجيى ەرمەك جاعدايدان حابار تاپقان سوڭ، وعان مال شارۋاشىلىعى ساياساتتىق قامسىزداندىرۋى تولەمىن ءوتىنىش ەتكەن ەدى، 6 مىڭ يۋان تولەمگە يە بولعان الميرا جىلجىمالى قىزمەت وتەۋ پۋنكتىنە ءدان ريزا بولادى.
تولى اۋداندىق پارتكوم نەگىزگى ساتى كەڭسەسىنىڭ مەڭگەرۋشىسى گو ۋيدۇڭ: «اۋدانىمىزعا قاراستى 65 اكىمشىلىك قىستاقتىڭ تەڭ جارىمى مال شارۋاشىلىق قىستاق. مالشىلاردى وتىرىقتاندىرۋ ينجەنەرياسى اتقارىلعاننان كەيىن، قارتتار مەن بالالار وتىرىقتى تۇرمىسقا ويىسقانىمەن، ءالى دە ءبىر ءبولىم مالشىلار كوشپەندى مالشىلىقپەن شۇعىلدانۋدا. بىلتىر اۋدانىمىز وسى جاعدايدى ەسكەرە وتىرىپ، پارتيا مۇشەلەرىنىڭ قيمىل وتكىزۋى مەن جۇرتشىلىققا ۇگىت-تاربيە جۇرگىزۋگە قولايلى بولۋ ءۇشىن، جىلجىمالى قىزمەت وتەۋ پۋنكتىن قۇردى» دەدى.
جىلجىمالى قىزمەت وتەۋ پۋنكتى _ كۇن نۇرىنان پايدالانىپ توك تاراتۋ جابدىعى، كومپيۋتەر، ءارىپ باسۋ اپپاراتى، تۋ باعاناسى، توسەك، ءدارى-دارمەك ساندىعى سياقتى قۇرىلعىلارى بار اۆتوموبيلگە تىركەپ الىپ جۇرۋگە بولاتىن قاراپايىم جىلجىمالى كەڭسە ەكەن.
6-ايدىڭ 25- كۇنى اقبەلدەۋ اۋىلى مايلى قىستاعى پارتيا ياچەيكاسىنىڭ شۋجيى سەرىك بەكەن ۇلى مەن قىستاقتا تۇراتىن قىزمەت اترەتىنىڭ ەكى مۇشەسى جىلجىمالى قىزمەت وتەۋ پۋنكتىن جايلاۋعا كوشىرىپ اپاردى.
سول كۇنى جايلاۋعا كوشىپ بارعان پارتيا مۇشەسى كەمەڭگەر تاياۋ جەردە جەلبىرەپ تۇرعان مەملەكەت تۋىن كورە سالا قويىن ءيىرىپ تاستاپ، اتىن جەلدىرتىپ قىزمەت وتەۋ پۋنكتىنە تارتتى. جۇرتشىلىققا قىزمەت وتەۋ پۋنكتىنىڭ جايلاۋعا كوشىپ بارعانىن ەستىگەن مالشىلار شارشاپ-شالدىققاندارىنا قاراماستان تۇس-تۇستان اعىلىپ جەتتى. سەرىك بەكەن ۇلى: «جايلاۋدا مالشىلار كەشكى مەكتەبى مەن ءتۇرلى مادەنيەت-دەنە تاربيە قيمىلدارىن ۋاعىندا وزدىرىپ، مالشىلار تۇرمىسىن بايىتۋمەن بىرگە، مالشىلارعا قىزمەت وتەي الاتىن بولدىق» دەدى.
ۇعىسۋعا قاراعاندا، بيىل جىل باسىنان بەرى تولى اۋدانىنىڭ جۇرتشىلىققا قىزمەت وتەۋ پۋنكتتەرى مالشىلارعا پارتيا ىستەرى، قارىز الۋ، قامسىزداندىرۋ، ساياساتتان كەڭەس بەرۋ سياقتى جاقتا 1700 تۇردەن استام قىزمەت وتەپ، جۇرتشىلىقتىڭ 240 تان استام قيىنشىلىعىن شەشىمدەپ، 140 رەتتەن استام مادەنيەت -دەنە تاربيە قيمىلىن وزدىرعان.
وشەتى اۋىلى سارىتال قىستاعىنىڭ مالشىلاردى وتىرىقتاندىرۋ ءتۇيىنى مەن قىستاق كوميتەتى كەڭسەسى قىستاۋلىققا قۇرىلعان. قىستاقتىڭ كوكتەۋلىگى مەن جايلاۋى 110 كيلومەتر شالعايداعى جولى كۇدىر تاۋ قويناۋىندا بولاتىن. بۇل جاعدايدى كوزدە ۇستاعان قىستاق كوميتەتى قىزمەت وتەۋ پۋنكتىن كوكتەۋلىككە ورنالاستىرىپ، جولى قيىن جايلاۋ توسىنە كيىز ءۇي تىگىپ كەڭسە قۇرعان.
اۋداندىق پارتكوم ۇيىمداستىرۋ ءبولىمىنىڭ ورىنباسار باستىعى جاڭ چاۋ: «جىلجىمالى قىزمەت وتەۋ پۋنكتى مال شارۋاشىلىق رايوننىڭ پارتيا قۇرىلىسىن نىعايتىپ، كادرلاردىڭ مالشىلارمەن بىرگە بولىپ، حالىققا قولايلى قىزمەت وتەۋىنە تيىمدىلىك اكەلىپ، پارتيا تۋى ساحارادا جەلبىرەدى» دەدى.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى