تىلشىلەرىمىز ۋاڭ شۋشيا، چىن لۋمان حابارلايدى. 7-ايدىڭ 2-كۇنى ساعات 17دەن 50 مينۋت وتكەندە تولى اۋدان قالاشىعىنىڭ وڭتۇستىگىندەگى تاۋلى وڭىردە قاتتى نوسەر جاۋىپ، سەل ءجۇردى. بوگەۋ بەرمەس كۇشتى سەل اۋدان قالاشىعىنىڭ ءبىر ءبولىم رايوندارىندا اۋىر اپات تۋدىردى. قايىرىمسىز اپاتپەن ايقاسۋ بارىسىندا كوپتەگەن جان تەبىرەنتەرلىك ىستەر ارت-ارتىنان جارىققا شىقتى.
جۇرتشىلىقتىڭ مۇددەسىن بارىنەن جوعارى ورىنعا قويدى
كۇشتى سەل اپاتى تۋىلعاننان كەيىن، تولى اۋداندىق پارتكوم مەن ۇكىمەت شۇعىل جاعدايعا توتەپ بەرۋ جوباسىن جەدەل ىسكە قوسىپ، قالىڭ كادر، جۇمىسشى-قىزمەتشىلەردى دەرەۋ اپات تۋىلعان وڭىرگە بارىپ، قاتەردەن اراشالاپ، اپاتتان قۇتقارۋ قىزمەتىن ورىستەتۋگە جۇمىلدىرسا؛ اۋىل-قالاشىقتار مەن تاراۋلار ءوز بورىشتارىن ادا ەتىپ، اپاتپەن ايقاستى؛ پارتيالى كادرلار مەن اسكەري قوسىنداعى كوماندير-جاۋىنگەرلەر قاتەردەن جاسقانباي، اتويلاپ الدا ءجۇردى.
« جۇرتشىلىقتىڭ مۇددەسى بارىنەن جوعارى، جۇرتشىلىقتىڭ باس اماندىعى بارىنەن ماڭىزدى». قاجىرلى تولى حالقى ىنتىماقتاسا كۇرەس جاساۋدىڭ ۇلى تۋىن اپات تۋىلعان بارلىق جەردە جەلبىرەتتى.
اۋداندىق قاتىناس، قوعام حاۋىپسىزدىگى تاراۋلارى قۇرىلىس ماشينالارى مەن تەحنيكتەردەن اپاتتان قۇتقارۋ اتويشىلدار اترەتىن قۇرىپ، اپاتپەن كۇندىز-ءتۇنى تىنباي شايقاس جاسادى.
تولى اۋدان قالاشىعىنداعى «ازات» بازارىنىڭ ماڭىنا قاۋىرت جينالعان ءار ۇلت پارتيالى كادرلارى مەن جۇرتشىلىقتىڭ بىرەۋى كولىگىمەن سۋ تاسىپ، بىرەۋى تاقتايشامەن سۋ ىعىستىرىپ جاتتى.
شارۋالار ساياجايلارى تەگىن تاماق جەتكىزىپ بەردى
«ءبىر كۇن دەمالمادىڭىزدار، ىستىق تاماق ءىشىپ الىڭىزدار». 7-ايدىڭ 3-كۇنى تولى اۋدان قالاشىعىنداعى «اسۋ» شارۋالار ساياجايىنىڭ قوجايىنى اراي تاسقىنعا قارسى اتتانىپ، اپاتتان قۇتقارۋ جۇمىسىمەن شۇعىلدانىپ جاتقاندارعا ەكى اۆتوموبيلمەن 500 ۇلەستەن ارتىق تاعام جەتكىزىپ بەردى.
اراي: «بارلىعىمىز تولىلىقپىز، بارلىعىمىز ءبىر ءۇيلى جاندارمىز، حالقىمىز اپاتقا ۇشىراعاندا كومەك قولىمىزدى سوزۋعا ءتيىسپىز. جۇبايىم جانە دوس-جاراندارىممەن بىرگە تۇنىمەن وسى تاعامداردى جاساپ ۇلگىرتتىك» دەدى.
قوعام حاۋىپسىزدىگى حالىق ساقشىلارى ءبىرىنشى شەپتە شايقاس جاسادى
تولى اۋداندىق قوعام حاۋىپسىزدىگى مەكەمەسىنىڭ حالىق ساقشىسى ۋ دىجياڭ 7-ايدىڭ 2-كۇنى اپات تۋىلعاننان باستاپ ءبىر ءسات دەمالماي، لاي-باتپاقتى تازالاۋمەن قاربالاس بولدى.
كيىمدەرى ساۋىس لاي بولعان ۋدىجياڭ: «مەن حالىق ساقشىسىمىن، حالىقتى قورعاۋ حالىق ساقشىلارىنىڭ بۇلتارماس بورىشى. بىرنەشە كۇننەن بەرى تۇنعان لاي-باتپاقتى تازالاپ كەلەمىز» دەدى.
سول كۇنى تولى اۋداندىق قوعام حاۋىپسىزدىگى مەكەمەسىنىڭ حالىق ساقشىلارى اپات مايدانىنا جەتكەن سوڭ، ءتۇنى بويى دەمالماي اپاتتان قۇتقارۋعا كىرىسكەن.
اۋداندىق قوعام حاۋىپسىزدىگى مەكەمەسىنىڭ ورىنباسار باستىعى شالقار: «تاسقىنعا قارسى اتتانىپ، اپاتتان قۇتقارۋ ءبىزدىڭ بورىشىمىز. اپاتپەن سوڭىنا دەيىن ايقاسىپ، تولى حالقىنىڭ اماندىعىنا كەپىلدىك ەتۋگە كۇش سالامىز» دەدى.
حالىق جۇمىسكەرلەرى اپاتتان قۇتقارۋعا بەلسەنە ات سالىستى
ءبىر جاق قيىنشىلىققا جولىقسا، كوپ بولىپ كومەكتەسەتىن تاڭداۋلى ءداستۇردى ساۋلەلەندىرگەن تولى اۋدانىنداعى سىرت ورىننان كەلگەن جۇمىسكەرلەر دە كومەك قولدارىن بەلسەنە سوزدى.
52 جاستاعى حالىق جۇمىسكەرى ياڭ يۋجىنىڭ حىنان ولكەسى نانياڭ قالاسىنان تولى اۋدانىنا كەلىپ جۇمىس ىستەگەنىنە 10 جىلدان اسقان. وسى جولعى سەل اپاتىن كورگەن ول ەشقانداي ىركىلمەستەن اپاتتان قۇتقارۋ قوسىنىنا قاتىناسقان.
ياڭ يۋجى: « تولىنى سۇيەمىن، تولى حالقى وتە بەرەكەلى ءارى جاراسىمدى. مۇنداي اۋىر اپاتتا كومەك قولىمدى سوزۋعا ءتيىسپىن. كەشە كەشكى ساعات 6 دان باستاپ تاڭعى ساعات 1گە دەيىن اپات مايدانىندا شايقاس جاسادىق. بۇگىن كۇنى بويى لاي-باتپاق تازالاۋمەن بولدىق» دەدى.
ياڭ يۋجى سياقتى كوپتەگەن حالىق جۇمىسكەرى اپاتتان قۇتقارۋعا بەلسەنە ات سالىستى.
ساۋدا ورىندارى مەيىر باعىشتادى
اپاتتان قۇتقارۋ كەزىندە تولى اۋدانىنداعى كوپتەگەن ەرەن بازارلار دا قاراپ وتىرماستان بەلسەنە كومەك كورسەتتى.
تولى اۋدان قالاشىعىنداعى ديڭشىڭ زات ساتىپ الۋ الاڭىنىڭ 5 قىزمەتكەرى اپاتتان قۇتقارۋ مايدانىنا مينەرال سۋ، بولكا سياقتى ازىقتىقتاردى جەتكىزىپ بەردى. ولار مينەرال سۋ مەن بولكالاردى كوتەرىپ، ءبىر مەتردەي تەرەڭ قۇي-باتپاقتى كەشىپ ءوتىپ، اپاتتان قۇتقارۋ قىزمەتكەرلەرىنە تاراتتى.
اپاتتان قۇتقارۋشىلاردىڭ ءبىرى ساجيدا: «جويقىن سەل اپاتىنان قۇتقارۋدىڭ قاربالاستىعىندا تاماق ىشۋگە دە مۇرسامىز تيمەدى. قايىرىمدى جاندار مينەرال سۋ، بولكا جەتكىزىپ بەردى. ولارعا راقىمەت» دەدى.
ديڭشىڭ زات ساتىپ الۋ الاڭىنىڭ جاۋاپتىسى ياڭ يۋان: «تولى حالقىنىڭ قيىنشىلىق قىسپاعىنان تەزىرەك قۇتىلۋىنا از دا بولسا كومەگىمىزدى كورسەتتىك. مەيلى قانداي كەزدە بولسا دا تولى حالقىمەن جۇرەگىمىز بىرگە سوعادى، اپاتپەن جاپالى شايقاس جاساپ جاتقاندارعا از دا بولسا كورسەتكەن كومەگىمىز» دەدى.
تاسقىنعا قارسى اتتانىپ، اپاتتان قۇتقارۋ بارىسىندا جارىققا شىققان جان تەبىرەنتەرلىك ىزگى ىستەر قۇدىرەتتى وڭ ەنەرگيا توپتاپ، تولى حالقىن اپاتقا بار كۇشپەن قارسى تۇرۋعا جىگەرلەندىرە ءتۇستى.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى