سايراۋ اقاي ۇلى
اياۋلى ارمىسىڭدار ۇلاندارىم،
ءاردايىم جۇزەگە اسسىن ۇلى ارمانىڭ.
باس قوسقان ساباقتاستار قۋانىشپەن،
شالقىسىن،شارىقتاسىن شىعانداپ ءۇن.
ساباقتاپ مارجان ويدىڭ تىزبەكتەرىن،
ۇشىردىم كوڭىلىمنەن جىر كەپتەرىن.
جالعايتىن ارمانىمدى اسقارلارعا،
سەندەرسىڭدەر كەشەگى تىرنەكتەرىم.
جيىلىپ باس قوستىڭدار توڭىرەكتەن،
بالالىق ءسال وزگەرىپ ءوڭ رەتتەن.
عاسىردان-عاسىرعا اتتاپ وتە شىقتىق،
جارىسىپ ۋاقىتپەنەن ءومىر وتكەن.
بىرگە ءوتتى وزدەرىڭمەن جاستىق كۇنىم،
جانىما سيلادىڭدار شاتتىق نۇرىن.
ءدال بۇگىن توبەم كوككە جەتكەندەيمىن،
تۇرعانداي وزدەرىڭمەن ارتىپ قۇنىم.
ادامدى ويلاندىرار بولمىس مىنا،
بارىڭدە بالا ەدىڭدەر سول ءبىر تۇستا.
«وقىڭدار،وقۋشىلىق ءداۋىرىڭ» دەپ،
«وتكىزبەڭدەر» دەۋشى ەدىم ويناپ بوسقا.
بەرەكەڭ ءماندى بولسىن كەڭەسپەنەن،
بارىڭدە ءبىر-بىرىڭمەن تەل وسكەن ەڭ.
ۋاقىتتى بوستان-بوسقا وتكىزبەيىك،
قۇر قيال سۇردەكتەگەن ەلەسپەنەن.
ورالار سانسىز قيال ويعا مىنا،
سول تۇستا بۇگىنىڭدى ويلادىڭ با؟
بارىڭدە تياناقتاپ ورىن تەپتىڭ،
قوعامنىڭ سان سالالى قويناۋىندا.
مەنداعى بالا بولىپ ءوسىپ ەدىم،
جەلىندەي ساحارانىڭ ەسىپ ەدىم.
كەشە عانا بالا ەدىڭدەر كوز الدىمدا،
ال بۇگىن زامانانىڭ كوشىنە ەردىڭ.
قيالىم قياندارعا قۇلاشتايدى،
كورمەگەن ۇستاز بەتىن قىر اسپايدى.
ەلەستەر كوز الدىما پارتالاس بوپ،
وتىرعان ورىندارىڭ كلاستاعى.
الدىمدا قابىرعادا قارا دوسكا،
وتكەن سول ساباعىمدى سالادى ەسكە.
«اعايلاپ» تۇراتۇعىن بالا داۋىس،
ماڭگىلىك كوكەيىمنەن شىعاما استە.
ءبىلىمنىڭ ەرجەتتىڭدەر تاتىپ ءنىلىن،
قادىرىن اسىرىڭدار تاتۋلىقتىڭ.
تۋىڭدى جەلبىرەتىپ تۋعان جەرگە،
ەگىڭدەر ەلىڭ ءۇشىن باقىت گۇلىن.
ۇستازىڭ ەڭبەگىڭمەن ماقتانادى،
شارىقتاسا شاكىرتى شاتتانادى.
اق وردا،التىن ۇيا مەكتەبىڭدى،
ايالاپ جۇرەگىڭدە ساقتا ماڭگى.
جاس قانات تۇلەپ ۇشقان تۇلەكتەرىم،
توعىسسىن ءبىر ارناعا تىلەكتەرىڭ.
ارمانىڭ الىپ ۇشىپ اي شارىنا،
تىنىمسىز سوعا بەرسىن جۇرەكتەرىڭ.
ءوزارا شۋاق بولىپ سەبىلىڭدەر،
قاشاندا جاقسىلىقپەن كەزىگىڭدەر.
قاي شەپتە،قاي سالادا جۇرسەڭدەردە،
عاسىردىڭ قىرقاسىنان كورىنىڭدەر.
بالا بوپ ماعان ءالى كورىنەسىڭ،
بايراعىڭ كوكتە ماڭگى جەلبىرەسىن.
التىنعا بەرمەيتۇعىن قايران جاستىق،
قوسىلىپ ارمانىما ورىلەسىڭ.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى