مال شيپاگەرلەرىنىڭ كۋرسى اشىلدى

  ۇسىنىس ەتىلگەن تىلشىلەرىمىز باقىتبەك شايحى ۇلى، تاۋلە قۇماش ۇلى، ەرىكتى ءتىلشى گاۋھار جۇمان قىزى حابارلايدى. جۋىقتا شاعانتوعاي اۋداندىق مال شارۋاشىلىق -مال شيپاگەرلىك پۋنكتى 5 كۇندىك ۋاقىتپەن نەگىزگى ساتىداعى مال شيپاگەرلەرىنىڭ قىسقا مەرزىمدىك كاسىپتىك ۇيرەنۋ كۋرسىن اشتى.

  بۇل رەتكى ۇيرەنۋ كۋرسىنا اۋدانعا قاراستى ءارقايسى اۋىل، فەرما، قالاشىقتاعى مال شيپاحاناسىنىڭ شيپاگەرلەرى، قىستاق دارەجەلى مال شيپاگەرلەر بولىپ 130 ادام قاتىناستى، بۇل رەتكى ۇيرەنۋ كۋرسىندە التاي ايماقتىق مال شارۋاشىلىق مەكتەبىنەن قۇمار اۋعانباي ۇلى مەن تارباعاتاي ايماقتىق مال شارۋاشىلىق عىلىم-تەحنيكاسىن زەرتتەۋ-جالپىلاستىرۋ ورتالىعىنان كوممۋنيسقان جاقان ۇلى نەگىزگى ساتىداعى مال شيپاگەرلەرىنە ادام مەن حايۋاناتتاردا بىردەي بولاتىن ءارى ءوزارا جۇعىمدالاتىن جۇقپالى ىندەتتەردىڭ الدىن الۋ جانە ودان ساقتانۋ شارالارى؛ مال باعىمشىلىعى؛ ءۇي حايۋاناتتارىندا بولاتىن جۇقپالى اۋرۋلاردىڭ الدىن الۋ جونىندە لەكسيا سويلەدى. سوڭىندا كۋرسكە قاتىناسقان مال شيپاگەرلەرىنەن ءبىرتۇتاس ەمتيحان الىندى.

  اۋداندىق مال شارۋاشىلىق - مال شيپاگەرلىك پۋنكتىنىڭ جاۋاپتىسى مۇرات  ءسايپىن ۇلى: «بۇل جولعى ۇيرەنۋ كۋرسىن اشۋداعى باستى ماقساتىمىز - ەڭ الدىمەن نەگىزگى ساتى مال شيپاگەرلەرىنىڭ كاسىپتىك ورەسىن جوعارىلاتىپ، ەگىنشى-مالشى قاۋىمعا حاۋپى زور بولعان مالدان ادامعا جۇعىمدالاتىن (برۋتسەللەز، قالتالى قۇرت اۋرۋى) جۇقپالى ىندەتتەردىڭ الدىن الۋ، ساقتانۋ بىلىمدەرىن كەڭ كولەمدە ۇگىتتەپ، مال ءناسىلىن ساپالىلاندىرۋ ارقىلى مال شارۋاشىلىعىن دامىتىپ، كەدەي وتباسىلارىنىڭ باعىمشىلىقپەن شۇعىلدانىپ، كەدەيلىكتەن ەرتەرەك قۇتىلۋىنا كومەكتەسىپ، جاپپاي دوڭگەلەك داۋلەتتى قوعام قۇرۋعا ورتاق قۇلشىنۋعا جۇمىلدىرۋ» دەدى.

  شاعانتوعاي اۋداندىق مال شارۋاشىلىق- مال شيپاگەرلىك پۋنكتىنىڭ كاسىپتىك مامانى ابدۋاقيت بەدەلقان ۇلى: «وسى رەتكى كۋرستە ارناۋلى ۇسىنىس ەتىلگەن ماماندار مال شارۋاشىلىعى، مال شيپاگەرلىگى، سونداي – اق حايۋاناتتاردا بولاتىن جۇقپالى ىندەتتەردىڭ الدىن الۋ جونىندە جۇيەلى ساباق وتۋمەن بىرگە،ۇيرەنۋ مەن امالياتتى ءوزارا ۇشتاستىرىپ، ناق مايداندا حايۋاناتتارعا وپەراتسيا جاساپ، نەگىزگى ساتى مال شيپاگەرلەرىنىڭ كاسىپتىك ورەسىن جوعارىلاتۋعا كۇش سالدى. ءبىز الداعى ۋاقىتتا نەگىزگى ساتى مال شيپاگەرلەرىنىڭ كاسىپتىك ۇيرەنۋ كۋرسىن جالعاستى بىرنەشە قارار اشىپ، ‹قىسقى عىلىم- تەحنيكا ۇيرەنۋ اپتالىعى›، ‹ەگىنشى- مالشىلار كەشكى مەكتەبى› سياقتىلاردان پايدالانىپ، اۋىل- قىستاقتاردى ارالاپ، ەگىنشى- مالشىلارعا مال ءناسىلىن جاقسارتۋ، حايۋاناتتاردا بولاتىن جۇقپالى ىندەتتەردىڭ الدىن الۋ جانە ساقتىق شارالارىن ۇيرەتىپ، ۇگىت تەبىنىن كۇشەيتىپ، اۋدانىمىزدىڭ مال شارۋاشىلىق كاسىبىن وركەندەتۋ ارقىلى جەرلىك ورىننىڭ ەكونوميكاسىنىڭ دامۋىن ىلگەرىلەتۋگە كۇش سالامىز» دەدى.
  سۋرەتتە: ماماندار نەگىزگى ساتى شيپاگەرلەرىنە حايۋاناتتارعا وپەراتسيا جاساۋدى ۇيرەتۋدە.

  رەداكتورى : جىگەر ومىربەك ۇلى  


  تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
  مىسالى: «تارباعاتاي اقپارات تورابىنان» الىندى