تىلشىلەرىمىز ايان قايرات ۇلى، ما چين حابارلايدى. 11-ايدىڭ 22-كۇنى تاڭەرتەڭ شيحۋ قالاسى شيداگۋ قالاشىعى شىعىس گوبي قىستاعىنىڭ تۇرعىنى ياۋ زۇڭچۋان ورنىنان تۇرا سالىسىمەن سۋ شۇمەگىن اشىپ، مالدارىن سۋارا باستادى. بۇرىندارى مۇنداي ءارى تازا ،ءارى ىركىلىسسىز قۇبىر سۋىن تۇتىنۋ ياۋ زۇڭچۋان ءۇشىن ارمان ەدى.
ۇعىسۋعا قاراعاندا، 50 جاستاعى ياۋ زۇڭچۋان قىستاقتاعى بىردەن-ءبىر ەڭ تومەنگى تۇرمىستى قامتاماسىزداندىرۋ قاراجاتىنان يگىلىكتەنەتىن ادام ەكەن، كوپ جىلدان بەرى وتباسىندا جالعىز تۇرىپ كەلگەن ول شاعىن باعىمشىلىق پەن كۇندىك جۇمىس ىستەۋ ارقىلى كىرەتىن ازىن-اۋلاق كىرىسىنە سۇيەنىپ كۇن كورىپ كەلىپتى. ياۋ زۇڭچۋاننىڭ ءۇيى قىستاقتاعى3-گرۋپپادا تۇرادى، بۇل گرۋپپانىڭ قۇبىر سۋى ترۋباسى ۇزاق جىل بويى جاڭالانباي، سۋ بىردە كەلىپ، بىردە توقتاپ، 20 نەشە قىستاق تۇرعىنىنىڭ اۋىز سۋ ماسەلەسى قازىرگە دەيىن تۇبەگەيلى شەشىلمەي كەلىپتى.
ياۋ زۇڭچۋان: «قۇبىر سۋى ءجيى توقتاپ قالاتىندىقتان، كوپ وتباسى اۋلاسىنا سۋ ساقتايتىن ۇرا سالدى. ۇراعا ساقتالعان سۋدىڭ تازالىعى ناشار بولىپ قانا قالماستان، ىستەتۋ دە قولايسىز، اسىرەسە مەن سياقتى باعىمشىلىقپەن شۇعىلداناتىن قىستاق تۇرعىندارىنىڭ كۇندەلىكتى ىستەتەتىن سۋ مولشەرىن قاناعاتتاندىرا المايدى. مەنىڭ جاسىم دا ۇلعايدى، قىس مەزگىلى سۋىق، جەر تايعاق بولعاندىقتان، كۇندە سۋ ساقتايتىن ۇرادان سۋ الۋ ماعان كوپتەگەن قولايسىزدىق الىپ كەلدى» دەدى.
شيحۋ قالاسى سۋ ىستەرى مەكەمەسىنەن «ۇعىسۋ، تيىمدىلىك جاساۋ، توعىستىرۋ» قيمىلى بويىنشا وسى قىستاققا تۇسكەن قىزمەت اترەتىندەگىلەر بۇل جاعدايدان حابار تاپقاننان كەيىن وزدەرىن جىبەرگەن ورىنمەن حابارلاسىپ، جىبەرگەن ورىن ماشينا، اسپاپ ءبولىپ بەرىپ، تەز ارادا قۇبىر سۋى ترۋباسىن جاڭالاۋ جۇمىسىنا كىرىسەدى.
11-ايدىڭ 15-كۇنى جەر قازۋ ماشيناسىنىڭ دۇرىلدەگەن داۋىسىمەن بىرگە، شىعىس گوبي قىستاعى 3-گرۋپپاسىنىڭ گرۋپپا باستىعى ما ۋىنحۋا قىستاق تۇرعىندارىن ۇيىمداستىرىپ قۇبىر سۋى ترۋباسىن جاڭالاۋ جۇمىسىنا ات سالىسادى.
ما ۋىنحۋا: «قىزمەت اترەتىندەگىلەر اۋىز سۋ ماسەلەمىزدى شەشىمدەپ بەرەدى دەگەندى ەستىگەندە ءارى تازا، ءارى ىركىلىسسىز سۋدان پايدالانۋدى ارمانداپ جۇرگەن قىستاق تۇرعىندارى دا وزدەرىنىڭ كۇشىن ايامايتىندىعىن ءبىلدىرىستى. كوپ جىلدان بەرى اۋىز سۋ ماسەلەسى 3-گرۋپپاداعى قىستاق تۇرعىندارىن الاڭداتىپ كەلگەن ەدى، ءار جولى قۇبىر سۋى ترۋباسىن جاڭالاۋ جۇمىسىن باستايىق دەگەندە، قىستاق تۇرعىندارىنىڭ پىكىرى ءبىر جەردەن شىقپاي، قارجى توپتالماي، وسى كۇنگە دەيىن اتسىز-اياقسىز قالىپ ەدى، ەندى مىنە، قىزمەت اترەتىندەگىلەر بۇل قيىنشىلىعىمىزدى شەشىمدەپ بەردى، ولارعا راقىمەت» دەدى.
ءتورت كۇندىك قاربالاستىقتان كەيىن، قۇبىر سۋى ترۋباسىن جاڭالاۋ جۇمىسى اياقتالىپ، قىستاق تۇرعىندارى تازا قۇبىر سۋىنان الاڭسىز تۇتىنا الاتىن بولدى.
بۇل جولعى جاڭالاۋ جۇمىسىنا 10 مىڭ يۋان قارجى جۇمسالىپ، 600 مەتر قۇبىر سۋى ترۋباسى جاڭالانىپ، جاڭادان ءبىر تەكسەرۋ قۇدىعى سالىنىپ، قىستاق تۇرعىندارىنىڭ اۋىز سۋ ماسەلەسى تۇبەگەيلى شەشىمدەلدى.
قىزمەت اترەتىنىڭ باستىعى جاڭ چياڭ: «قىستاق تۇرعىندارىنىڭ قيىنشىلىعى ءبىزدىڭ قيىنشىلىعىمىز، قىستاق تۇرعىندارىنىڭ اڭىس ەتكەن ءاربىر ماسەلەسىن شەشىمدەۋ ءبىزدىڭ نىسانامىز، بۇدان كەيىن دە حالىق ءۇشىن تىنباي قىزمەت وتەيمىز» دەدى.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى