تىلشىلەرىمىز ۋىن بو، داي جياۋمەي، ليۋ ۋي، ەرىكتى ءتىلشى ۋاڭ يان حابارلايدى. بىرنەشە كۇننەن بەرى ايماعىمىزدىڭ جەر-جەرى باي مازمۇندى «ۇلتتار ىنتىماعىنىڭ بەرەكەلى شاڭىراعى» بىرلەسكەن دوستىق قيمىلىن وزدىرىپ، قالىڭ پارتيا مۇشەلەرى مەن كادرلار ءار ۇلت تۋىستارىمەن ءبىر اراعا باس قوستى ءارى تۋىستارىنا مەرەكەلىك بۇيىمداردى ۇسىنىپ، مەرەكەلىك تىلەكتەرىن ءبىلدىردى.
«اپەكە جاڭا جىلىڭىز قۇتتى بولسىن! جاڭا جىلدا دەنساۋلىعىڭىزدىڭ مىقتى، ىستەرىڭىزدىڭ ءساتتى بولۋىن تىلەيمىن...» 2-ايدىڭ 4-كۇنى، ياعني ەگىنشىلىك كالەندارى بويىنشا كوكتەم مەرەكەسىنە قاراعان كۇنى شاۋەشەك قالاسى بەيبىت كوشە ءىس باسقارماسى شينحۋا الەۋمەتتىك اۋماعىنىڭ ءبىرىنشى شۋجيى، پارتيا ياچەيكاسىنىڭ شۋجيى ليۋ جۇنليڭ كوكتەم مەرەكەسىنە ارنالعان بوساعالىق، «قۇت» ءارپى سياقتى مەرەكەلىك تارتۋلارىن الىپ، تۋىستىق قاتىناس ورناتقان تۋىسى، الەۋمەتتىك اۋماقتىڭ تۇرعىنى جاڭ شيۋلياننىڭ ۇيىنە باردى.
ۇلكەن «قۇت» ءارپى قاقپانىڭ ءدال ورتاسىنا جاپسىرىلىپ، جاڭ شيۋليان وتباسىنداعىلاردىڭ جۇزدەرىنەن شاتتىق لەبى ەستى. ءجۇن قالاممەن انىق جازىلعان كوكتەم مەرەكەسىنە ارنالعان بوساعالىقتا جاڭا جىلعا دەگەن ىزگى تىلەكتەر بەينەلەنىپ، قوناق بولمەسىنەن شات كۇلكىلەر ەستىلىپ تۇردى. ليۋ جۇنليڭنىڭ كەلۋى جاڭ شيۋليان وتباسىنداعى مەرەكەنىڭ مەرەيىن اسىرا ءتۇستى.
كوكتەم مەرەكەسى كەزىندە شينحۋا الەۋمەتتىك اۋماعى الەۋمەتتىك اۋماقتاعى پارتيا مۇشەلەرى مەن كادرلاردى، «ۇعىسۋ، تيىمدىلىك جاساۋ، توعىستىرۋ» قىزمەت اترەتىنىڭ مۇشەلەرىن ۇيىمداستىرىپ، كوكتەم مەرەكەسىن بىرلىكتە قۇتتىقتاۋ قيمىلىن ورىستەتتى. كوپشىلىك وزدەرىمەن تۋىستىق قاتىناس ورناتقان وتباسىلارىنا بارىپ، پارتيا ۇيىمىنىڭ قامقورلىعى مەن كوكتەم مەرەكەسى تىلەكتەرىن تۋىستارىنا جەتكىزدى.
«اعاي-اپاي، مەرەكەلەرىڭىز قۇتتى بولسىن! سىزدەرگە امانداسا كەلدىم. دەنساۋلىقتارىڭىزدىڭ مىقتى، ىستەرىڭىزدىڭ ءساتتى بولۋىنا تىلەكتەسپىن!». 2-ايدىڭ 5-كۇنى ايماقتىق ورگان ىستەرىن باسقارۋ مەكەمەسىنىڭ جانە باقتى حالىقارالىق تاس جول تاسىمالىن باسقارۋ مەكەمەسىنىڭ شاۋەشەك قالاسى اشىلى داعۇر ۇلتتىق اۋىلىنىڭ قىزبەيت قىستاعىندا تۇراتىن «ۇعىسۋ، تيىمدىلىك جاساۋ، توعىستىرۋ» قىزمەت اترەتىنىڭ ورىنباسار باستىعى جاڭ جينكۇي كۇرىش، مامىق شاپان سياقتى كوكتەم مەرەكەسى تارتۋلارىن الىپ، تۋىسى نيە چۋاندۇڭنىڭ وتباسىنا امانداسا باردى.
2-ايدىڭ 4-كۇنى شيحۋ قالاسى نانيۋان كوشە ءىس باسقارماسى چاۋياڭ جولى الەۋمەتتىك اۋماعىنىڭ قيمىل زالىنان ءان اۋەلەپ، تولاسسىز شاپالاق ءۇنى كوتەرىلىپ، شات كۇلكىلەر ەستىلدى. سول كۇنى چاۋياڭ جولى الەۋمەتتىك اۋماعى وسى ارادا «كوكتەم مەرەكەسىن قارسى الۋ، بەرەكە-بىرلىكتى جىرلاۋ، ۇلتتار ىنتىماعىنىڭ بەرەكەلى شاڭىراعى» بىرلەسكەن دوستىق قيمىلىن وزدىرىپ، الەۋمەتتىك اۋماقتاعى پارتيا مۇشەلەرى مەن كادر-جۇرتشىلىق، «ۇعىسۋ، تيىمدىلىك جاساۋ، توعىستىرۋ» قىزمەت اترەتىنىڭ مۇشەلەرى، تۋىستىق قاتىناس ورناتقان تۇرعىندار، ءار ۇلت جۇرتشىلىعى بولىپ 100 دەن استام ادام ءبىر اراعا شات-شادىمان باس قوسىپ، كوكتەم مەرەكەسىن بىرلىكتە قۇتتىقتاپ، باقىتتى تۇرمىس پەن بەرەكە-بىرلىكتى جىرلادى.
قيمىلدا كوپشىلىك ءوزارا مەرەكەلىك تىلەك ايتىپ، «كومپارتيا بولماسا جاڭا جۇڭگو بولماق ەمەس» ءانىن بىرگە ورىنداپ، تارتىمدى كونسەرت نومىرلەرىن بىرگە تاماشالاپ، زال ءىشى شاتتىققا شومدى.
كوكتەم مەرەكەسى كەزىندە ساۋان اۋداندىق باۋ-باقشا باسقارماسىنىڭ كادرى لان ليڭ ۇن، ازىقتىق ماي سياقتى زاتتاردى جانە وتباسىنداعىلاردىڭ تىلەگىن الىپ تۋىسى وسمان كالىمنىڭ ۇيىنە بارىپ، ولارمەن بىرگە باس قوسۋ تاعامىن جەدى ءارى جۇڭحۋا ۇلتىنىڭ ءداستۇرلى مەرەكەسى ــ كوكتەم مەرەكەسىنىڭ كەلىپ شىعۋى مەن وعان قاتىستى سالت-داستۇرلەردى بىرگە ۇيرەندى.
«كوممۋنيستىك پارتيانىڭ مەنى جانە بالالارىمدى وسىنداي باقىتتى كۇنگە جەتكىزگەنىنە راقىمەت ايتامىن. جاڭا جىلدا وتباسىمنىڭ بارلىق جاعىنىڭ ءتىپتى دە جاقسى بولۋىن تىلەيمىن. ‹ۇلتتار ىنتىماعىنىڭ بەرەكەلى شاڭىراعى› قيمىلى ءار ۇلتتىڭ ءوزارا دوستىعىن نىعايتتى، مۇنان بىلاي تۋعان اعا-ءىنى، اپەكە-سىڭلىدەردەي ۇنەمى بايلانىس جاساپ، ارالاسىپ تۇرامىز» دەدى وسمان كالىم قۋانىشتى بەينەمەن.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى