تىلشىلەرىمىز ايان قايرات ۇلى، ۋاڭ شۋشيا حابارلايدى. شاعانتوعاي اۋدانى جيەك قالاشىعى ورتاجيەك سولتۇستىك قىستاعىنداعى قىزمەت اترەتىنىڭ جاتاعىنىڭ بوساعالىعىنداعى «ءوز وتباسىن قايىرىپ قويىپ، وتاننىڭ باياندى تىنىشتىعىنىڭ نەگىزىن قالادى، قيىنشىلىقتى جەڭىپ، جاۋىن-شاشىندى ەلەمەي وتاندى گۇلدەندىرۋ ۇلى ىسىنە ۇلەس قوستى» دەگەن جازۋلار ادامنىڭ نازارىن ەرىكسىز اۋدارادى.
مەرەكە كەزىندە ايماقتىق اكىمشىلىك مەكەمەسى كەڭسەسىنىڭ ورتاجيەك سولتۇستىك قىستاعىندا تۇراتىن قىزمەت اترەتى قىزمەت ورنىندا تاپجىلماي، قىستاق تۇرعىندارىمەن بىرگە كوكتەم مەرەكەسىن وتكىزدى.
قىزمەت اترەتى مەن قىستاق «ەكى كوميتەتى» اڭگىمە ءماجىلىسى، كونسەرت نومىرلەرىن قويۋ، «باقىت»ءارىبىن ۇسىنۋ، تۇشپارا ءتۇيۋ، كوكتەم مەرەكەسىنە قاراعان تۇنگى تاعامدى بىرگە جەۋ سياقتى قيمىلدار ارقىلى مەرەكەنىڭ مازمۇنىن بايىتىپ، قىستاق تۇرعىندارىنىڭ كوكتەم مەرەكەسىنە شاتتىق سيلادى. ساناققا نەگىزدەلگەندە، قىزمەت اترەتى 4 مايدان قيمىل ورىستەتىپ، قيمىلعا قاتىناسقان ادام سانى 120 ادام-رەتتەن اسىپ، قيىنشىلىعى بار وتباسى، ساقا پارتيا مۇشەلەرى جانە اسكەري مىندەت وتەپ جاتقان جاۋىنگەرلەردىڭ ءۇي ىشىندەگىلەرى سياقتى 19 وتباسىنان حال سۇراپ، جالپى قۇنى 2100 يۋاندىق حال سۇراۋ بۇيىمدارىن ۇسىندى.
قىستاق پارتيا ياچەيكاسىنىڭ ءبىرىنشى شۋجيى، قىزمەت اترەتىنىڭ باستىعى لي تەگاڭ: «كوكتەم مەرەكەسىندە وتباسىمىزعا قايتىپ باس قوسۋدى اڭساساق تا، قىزمەت اترەتىنىڭ مۇشەسى بولعاندىقتان، ءبىز الدىڭعى شەپتە تاپجىلماي، قىستاقتا تۇرۋ مىندەتىمىز بەن بورىشىمىزدى جاقسى اتقارۋىمىز كەرەك. ءبىز قىستاق تۇرعىندارىمەن بىرگە بولىپ، مەرەكەنى بىرگە قۇتتىقتاپ، مەرەكەدەن پايدالانىپ ءار ءتۇرلى قىسقى مادەنيەت جەتكىزۋ قيمىلىن ورىستەتىپ، قىستاق تۇرعىندارىنا مەرەكەنىڭ مەيىرىن سەزىندىرۋىمىز كەرەك» دەدى.
قىستاقتا تۇرعان كۇيەۋىنە سەرىك بولۋ ءۇشىن كوكتەم مەرەكەسىنىڭ ۇشىنشى كۇنى لي تەگاڭنىڭ جۇبايى جاڭ چاۋحۇڭ 14 جاسار قىزىن ەرتىپ قىزمەت اترەتىنە لي تەگاڭدى كورگەلى كەلەدى.
جاڭ چاۋحۇڭ: «مەن ونى تۇسىنەمىن، ونىڭ قىستاقتا تۇرۋ قىزمەتىن جاقسى وتەپ، قىستاق ءۇشىن ناقتى جۇمىستار ىستەۋىن ءۇمىت ەتەمىن» دەدى.
قىزمەت اترەتىنىڭ ورىنباسار باستىعى جاۋ حۇڭجى: «مەنىڭ قىستاقتا تۇرعانىما ەكى جىل بولدى، قىستاقتى ءوز ۇيىمدەي كورەمىن. كوكتەم مەرەكەسى مەزگىلىندە قىستاق تۇرعىندارىمەن بىرگە بولدىم، مەن وتە كوڭىلدىمىن، وتباسىمداعىلار دا مەنى قولدايدى» دەدى.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى