قارامايلى-شاۋەشەك تەمىر جولىنىڭ رەلسى جەڭىسپەن تۇتاستى

3-ايدىڭ 24-كۇنى ەڭ سوڭعى ءبىر بولەك رەلس تىزبەگى ءساتتى جاتقىزىلىپ،قارامايلى-شاۋەشەك تەمىر جولىنىڭ رەلسى جەڭىسپەن تۇتاستى.

■ تۇتاس لەنياعا پويەز قاتىناۋعا تاعى ءبىر ادىم جاقىندادى
 

  ءتىلشىمىز جاڭ پەيچي، ەرىكتى ءتىلشى لي جيانفىڭ حابارلايدى. 3-ايدىڭ 24-كۇنى ساعات 10 نان 16 مينۋت وتكەندە ءدوربىلجىن بەكەتىنىڭ سىرتىندا ەڭ سوڭعى ءبىر بولەك رەلس تىزبەگى بەكەتتىڭ لەنياسىمەن جالعاستى،بۇل قارامايلى-شاۋەشەك تەمىر جولى لەنياسىنىڭ جەڭىسپەن تولىق تۇتاسقاندىعىن بىلدىرەدى.

  قارامايلى-شاۋەشەك تەمىر جولىنىڭ جالپى ۇزىندىعى 272.79 كيلومەتر، جالپى 4 ميلليارد 669 ميلليون يۋان قارجى  قوسىلىپ، 2014-جىلى 4-ايدا قۇرىلىس باستاعان. جوسپار بويىنشا بيىل 5-ايدىڭ 30-كۇنى شاۋەشەككە دەيىنگى جولاۋشى تاسىمالى باستالىپ،ءدوربىلجىن بەكەتى مەن تەمىرتام بەكەتى 7-ايدىڭ 30 كۇنى ىسكە تۇسەدى،تەمىر جول سالىنىپ،پويەز قاتىناعاننان كەيىن،قۇلىستاي ويپاتىنا پويەز قاتىناماعان تاريح اياقتالادى.

  2018-جىلى 11-ايدىڭ 1-كۇنى قارامايلى-شاۋەشەك تەمىر جولىنىڭ ءبىرىنشى مەرزىمدىك رەلس جاتقىزۋ جۇمىسى (قارامايلىدان تەمىرتامعا دەيىنگى بولەگى) اياقتالا سالىسىمەن،سول كۇنى قارامايلى-شاۋەشەك تەمىر جولىنىڭ (تەمىرتامنان شاۋەشەككە دەيىنگى بولەگى) 172 كيلومەترلىك رەلس جاتقىزۋ ەكىنشى مەرزىمدىك جۇمىسى باستالدى. 143 تاۋلىك شايقاس جاساۋ ارقىلى جۇڭگو تەمىر جول 1-مەكەمەسىنىڭ رەلس جاتقىزۋ ساربازدارى قات-قابات قيىنشىلىقتاردى جەڭىپ، قارلى بورانمەن ايقاسىپ،ۋاقىتپەن جارىسا ىستەپ، اسقان قاجىرلىلىقپەن قارامايلى-شاۋەشەك تەمىر جول لەنياسىنىڭ رەلسىن تولىق تۇتاستىرۋ نىساناسىنىڭ جەڭىسپەن جۇزەگە اسۋىنا كەپىلدىك ەتتى.

رەلس جاتقىزعان جاپالى كەزدى ەسكە العاندا،جۇڭگو تەمىر جول 1-مەكەمەسى توبى قارامايلى-شاۋەشەك تەمىر جولى رەلسىن جاتقىزۋ اترەتىنىڭ باستىعى يە حۇي ايرىقشا تەبىرەندى. ول: «2018-جىلى 12-ايدىڭ 22-كۇنى نولدەن تومەن 30 سەلتسي گرادۋسقا تاياۋ قاقاعان سۋىقتا ماشينامەن رەلس جاتقىزۋ جۇمىسى ۇزىندىعى 40 كيلومەتردەن اساتىن مايتاس جەل وتىنەن وتۋگە تۋرا كەلدى. ول كەزدە قانشا قالىڭ كينسەك تە، قاتتى  بوران ەتەك-جەڭىمىزدەن كيمەلەپ تۇردى. ءبىراق، بۇعان بىردە-ءبىر جۇمىسشى كەيىستىك بىلدىرمەدى» دەدى. ول تاعى دا بىلاي دەپ تانىستىردى: «رەلس جاتقىزۋ جۇمىسشىلارى كوكتەم مەرەكەسى كەزىندە دە قۇرىلىستىڭ ءبىرىنشى شەبىندە تابان تىرەپ،ۇستەمەلەپ جۇمىس ىستەپ، 3-ايدىڭ 1-كۇنى 40 كيلومەتردەن اساتىن دۇلەي بوران ءوتىن جەڭىسپەن بۇزىپ ءوتتى».

  جۇڭگو تەمىر جول جوبالاۋ توپ سەرىكتىگى قارامايلى-شاۋەشەك تەمىر جولى قۇرىلىسىنىڭ باس كوتەرمە نىسانى ءبولىمىنىڭ ديرەكتورى جىڭ حىمين: «اۋىر قۇرىلىس مەرزىمى قىسىمى الدىندا نىسان ءبولىمى زەيىن-زەردەنى، كۇش-قۋاتتى شوعىرلاندىرا وتىرىپ، قيىنشىلىقتاردى جەڭىپ،قۇرىلىس جوباسىن ۇزدىكسىز ساپالىلاندىرىپ جانە تەڭشەپ، بايلىقتى ءبولىپ ورنالاستىرۋدى كۇشەيتىپ،تۇتاس لەنياعا ماشينامەن رەلس جاتقىزۋ جوباسىن تەمىرتام مەن ءدوربىلجىن ارالىعىنداعى 123 كيلومەترلىك جەرگە رەلستى ماشينامەن جاتقىزۋعا، ءدوربىلجىن مەن شاۋەشەك ارالىعىنداعى 48 كيلومەترلىك جەرگە ادام كۇشىمەن جاتقىزۋعا وزگەرتىپ، رەلس تۇتاستىرۋ نىساناسىن ورىنداۋعا كوپ مولشەردە ۋاقىت ۇنەمدەدى. قارامايلى-شاۋەشەك تەمىر جولى قۇرىلىسىن ءساتتى ورىنداپ، تارباعاتاي حالقىن ەرتەرەك باقىتقا كەنەلتە الاتىندىعىمىزعا سەنىمىمىز كامىل» دەدى.

  قارامايلى-شاۋەشەك تەمىر جولى  رەلسىنىڭ تۇتاسۋى كەلەسى قادامداعى قيىرشىق تاس توسەۋ، مەحانيكالىق كۇتىمدەۋ جانە كوپىر ۇستىنە قوسىمشا قۇرىلعىلادى ورناتۋ سياقتى جۇمىستارعا بەرىك نەگىز  قالاعان. قارامايلى-شاۋەشەك تەمىر جولى نىسانىنىڭ بارلىق ساربازدارى پويەز قاتىناۋ نىساناسىن جۇزەگە اسىرۋدىڭ سوڭعى  شايقاسىنا  وتۋدە.


رەداكتورى : ارداق كامالقان قىزى  

تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى