ءتىلشىمىز جاڭ پەيچي حابارلايدى. 5-ايدىڭ 30-كۇنى، شاۋەشەكتىڭ اسپانى شايداي اشىق. تاڭەرتەڭ ەرتە تۇڭعىش كەلگەن پويەزدى ءوز كوزدەرىمەن كورمەكشى بولعان ءار ۇلت جۇرتشىلىعى شاۋەشەك پويەز بەكەتىنە لىق تولدى. ولاردىڭ كەيبىرەۋى سالتاناتتى كيىم كيىپ، ءان ايتىپ، بيگە باسسا، كەيبىرەۋى سۋرەتكە تارتىپ، ەستەلىك قالدىرىپ جاتتى، دوۋيىن تۇعىرىنا جولداعاندار دا كوپ. بۇل ارا مەرەكە كۇنىنەن دە دۋماندى.
«ءۇيىمىزدىڭ ىرگەسىنەن پويەز قاتىنادى!» شاۋەشەك قالاسىنىڭ تۇرعىنى قارلىعاش پويەز بەكەتىنە كىرە سالا، الىستاعى دوسىمەن بەينە ەكراندا تىلدەستى.
اۆتوماتتى بەلەت ساتىپ الۋ اپپاراتىنان پويەز بەلەتىن العان قارلىعاش تىلشىگە كورسەتىپ تۇرىپ، قۋانا بىلاي دەدى: «دوسىم ەكەۋىمىز بارىپ-قايتاتىن بەلەتتى ءبىر-اق الدىق. شاۋەشەكتەن شيحۋعا پويەزبەن بارىپ، بالالارىمىزدىڭ مەرەكەسىن تويلاپ، ونان سوڭ پويەزبەن قايتىپ كەلمەكشىمىز. مۇنداعى ماقساتىمىز ءۇيىمنىڭ ىرگەسىنەن پويەزگە وتىرىپ،وسى ءبىر ۇمتىلماس ساتكە كۋا بولماقشىمىز».
قارلىعاشتىڭ ايتۋىنشا، 2014-جىلى قارامايلى-شاۋەشەك تەمىر جولى سالىنا باستاعاننان باستاپ،ءۇيىمىزدىڭ ىرگەسىنەن پويەزگە وتىرىپ، جولاۋشىلاپ كەلۋدى توسىپ كەلگەن ەكەن. بيىل ول پويەز بەكەتىنە نەشە رەت بارىپ، وسى پويەزعا ەرتەرەك وتىرۋدى اسىعا كۇتىپ ءجۇرىپتى.
«مۇنداي قۋانىشتى ءىستىڭ بولارىن بۇرىن ويلاپ تا كورمەگەن ەدىم، ءۇيىمىزدىڭ ىرگەسىنەن پويەز قاتىناعانىن كورگەندە قۋانىشىمدا شەك جوق» دەدى تاڭەرتەڭ ەرتە شاۋەشەك پويەز بەكەتىنە كەلگەن ايماقتىق ءناسىلدى سيىر فەرماسىنىڭ 92 جاستاعى زەينەتكەر جۇمىسشىسى جاڭ باۋيۋان.
1960-جىلى جاڭ باۋيۋان شەكارا وڭىرگە كومەكتەسۋ ءۇشىن نانجيڭنەن شينجياڭعا پويەزبەن كەلىپتى. سودان باستاپ شاۋەشەك قالاسىندا قونىستانعان ول 30 نەشە جىلدان بەرى سىرتقا شىعىپ كورمەپتى. شاۋەشەككە پويەز قاتىناعاندىعىنىڭ حابارىن ەستىگەن ول بالالارىنا: «كوممۋنيستىك پارتيا بولماسا، قازىرگى باقىتتى تۇرمىسىمىز جوق. 70 جىلدىق پارتيالىلىق تاريحىمدا وتانىمىزدىڭ ۇشقان قۇستاي دامىعانىن ءوز كوزىممەن كوردىم. بۇگىن تۇڭعىش قاتىناعان پويەزگە وتىرىپ كورمەكشىمىن» دەگەن ەكەن.
پويەز جولعا شىعۋعا ءالى 2 ساعاتتان ارتىق ۋاقىت بار بولعان سوڭ جاڭ باۋيۋان قارت ايالداما زالىنان 4 دانا «قارامايلى-شاۋەشەك تەمىر جولىنا پويەز قاتىناۋ ەستەلىگى» كانۆەرتىنە ساتىپ الدى، ونان سوڭ ايالدامادان ءوتىپ، ۆاگوننىڭ قاسىنا تۇرىپ سۋرەتكە ءتۇستى. «پويەزگە وتىرىپ شينجياڭعا كەلگەن جاس كەزىم ەسىمە ورالىپ، ايرىقشا اسەرلەنىپ تۇرمىن» دەدى ول.
ساعات 10 نان 12 مينۋت وتكەندە الدىنا قىزىل گۇل تاعىلعان شاۋەشەكتەن ۇرىمجىگە باراتىن K9858 كەزەكتى جولاۋشىلار پويەزى جولاۋشىلاردىڭ شات كۇلكىسى ىشىندە ورنىقتى قوزعالىپ جولعا شىقتى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى