ءتىلشىمىز ۋاڭ شۋشيا حابارلايدى. 6-ايدىڭ 6-كۇنى اسحات تەبىرەنە: «قىزمەت اترەتىنىڭ كومەگىندە وتباسىم قيىنشىلىق قىسپاعىنان قۇتىلدى، پارتيا مەن مەملەكەتتىڭ وسىنداي جاقسى قىزمەت اترەتىن بىزگە جىبەرگەنىنە راقىمەت» دەدى.
اسحات شاعانتوعاي اۋدانى التىن ەمىل اۋىلى بايبىشە قىستاعىنىڭ تۇرعىنى، ونىڭ اڭگىمەلەپ وتىرعان قىزمەت اترەتى شاعانتوعاي اۋداندىق جاراتىلىستىق بايلىق مەكەمەسىنىڭ قىستاقتا تۇراتىن قىزمەت اترەتى.
اڭگىمەنى 5-ايدىڭ 15-كۇنىنەن باستاۋعا تۋرا كەلەدى. سول كۇنى اسحات جۇكتى بولعانىنا 8 اي بولعان ايەلى نۇرساۋلەتتى موتوتسيكلمەن بازارعا الىپ بارا جاتقان جولىندا ابايسىزدا موتوتسيكلدەن جىعىلىپ قالادى. سول ساتتە نۇرساۋلەتتىڭ ءىشى ءبىر ساتكە قاتتى اۋىرعانداي بولادى دا باسىلىپ قالادى، ولار بۇعان ونشا ءمان بەرە قويمايدى،ەكى، ءۇش كۇن وتكەننەن كەيىن نۇرساۋلەتتىڭ ءىشى اۋىرىپ،قاتتى دوڭبەكشيدى.
اۋداندىق حالىق شيپاحاناسىنا اپارىپ تەكسەرتۋ بارىسىندا ىشتەگى نارەستەنىڭ ءولىپ قالعانىن،ونىڭ ۇستىنە، قابىنىپ كەتكەندىكتەن،باۋىر،بۇيرەك قىزمەتىنىڭ السىرەپ، ومىرىنە حاۋىپ تونگەندىگىن بايقاپ،دەرەۋ ايماقتىق حالىق شيپاحاناسىنا جوتكەيدى، قىرۋار داۋالانۋ قاراجاتى وسى ءبىر اۋقاتى تومەن وتباسىن قاتتى ابىرجىتادى.
اسحات قىستاقتاعى كەدەي وتباسى بولاتىن. 2018-جىلى قىزمەت اترەتى اسحات وتباسىنىڭ ءىس جۇزىندىك جاعدايىنا قاراي وتىرىپ كەدەيلىكتەن ارىلتۋ جوسپارىن جاسايدى، سۇيەمەلگە بەرىلگەن ءبىر باس سيىرى مەن 6 تۇياق قويىن الىپ، وعان قوسا باسقا سالاعا ويىسىپ كاسىپتەنىپ تۇراقتى كىرىسكە يە بولۋدىڭ ناتيجەسىندە اسحات وتباسى كەدەيلىك قالپاعىن الىپ تاستايدى. الايدا وسى رەتكى تۇتقيىل وقيعا اسحات وتباسىن تىعىرىققا تىرەيدى.
قىستاقتىڭ ءبىرىنشى شۋجيى، قىزمەت اترەتىنىڭ باستىعى ۋاڭ شياڭ جاعدايدان حابار تاپقاننان كەيىن قىستاق «ەكى كوميتەت» ىن جىلۋ جيناۋعا ۇيىمداستىرادى، سول كۇنى 15 مىڭ 500 يۋان جىلۋ جينالادى. مۇنان تىس، ينتەرنەت تەكشەسى ارقىلى جىلۋ جينايدى.
جىلۋ جينالىپ بولعاننان كەيىن قىزمەت اترەتىندەگىلەر ايماقتىق حالىق شيپاحاناسىنا بارىپ،جىلۋعا جيعان اقشانى اسحاتتىڭ قولىنا تاپسىرادى.
اسحات اسەرلەنە: «كوپشىلىككە ۇلكەن راقىمەت،قىزمەت اترەتىنىڭ كومەگى بولماعاندا، مەن نە ىستەرىمدى بىلمەيتىن ەدىم» دەدى.
ۋاڭ شياڭ نۇرساۋلەتكە كۇنىنە ءبىر رەتكى قان قۇيۋدىڭ وزىنە 3600 يۋان اقشا كەتەتىنىن ۇعىسقاننان كەيىن قىزمەت اترەتىندەگى بەسەۋى ايماقتىق ورتالىق قان پۋنكتىنە بارىپ 2000 ميلليمەتر قان بەرىپ، اسحات وتباسىنا 4000 يۋان ەمدەۋ قاراجاتىن ۇنەمدەپ بەرەدى.
اسحات وتباسىنىڭ كوز الداعى قيىنشىلىعى شەشىمدەلگەنىمەن، الايدا اسحات وتباسىنىڭ مۇنان بىلايعى كۇندە قالاي باس كوتەرۋى قىزمەت اترەتى مەن قىستاق «ەكى كوميتەتى» نىڭ كوڭىلىندەگى تۇيىنشەككە اينالادى.
قىزمەت اترەتى مەن قىستاق «ەكى كوميتەتى» اقىلداسا كەلە اسحات وتباسىنا 2019-جىلى دالمە-ءدال سۇيەمەلدەۋ جوسپارىن جاسايدى.
قىزمەت اترەتى اسحات وتباسىنىڭ اۋلاسىن ىسكە قوسىپ، اۋلاعا جەمىس-جيدەك، كوكونىس ەگىپ، تاۋىق، ۇيرەك باعىپ، كوكونىس ماسەلەسىن شەشىمدەپ، تاۋىق، ۇيرەك ساتقان اقشانى وتباسىنىڭ قاراجاتىنا پايدالانۋعا بەردى. ايەلىن كۇتە جۇرۋىنە قولايلى بولۋ ءۇشىن، ينتەرنەت تۇعىرىنان پايدالانىپ اسحاتقا ءۇيىنىڭ ماڭىنان ءبىر قىزمەت تاۋىپ بەرگەن.
ايەلى شيپاحانادا جاتقان مەزگىلدە اسحات ۇيىنەن كەرەك-جاراعىن الۋعا كەلگەندە، اۋلاسىنىڭ تاپ-تازا بولىپ، ءۇيىنىڭ مورجاسىنان بۋداقتاپ شىعىپ جاتقان ءتۇتىندى كورەدى. سول كەزدە قىزمەت اترەتى مۇشەلەرى اسحاتتىڭ 3 جاسار قىزىنا ساباق ۇيرەتىپ وتىرعان ەدى، مۇنى كورگەن اسحات قىزمەت اترەتىنە شىن جۇرەگىنەن العىس ايتتى.
قىزمەت اترەتى قيىنشىلىعى بار قىستاق تۇرعىندارىنا كومەكتەسۋدەن تىس، قىستاقتىڭ دامىپ اۋقاتتانۋى ءۇشىن جوسپار الىپ شىقتى. بيىل قىزمەت اترەتى 900 مىڭ يۋان نىسان قارجىسىن قولعا كەلتىرىپ، قىستاقتىڭ اۋىل شارۋاشىلىق قوسىمشا ونىمدەرى ساۋدا بازارىن جاسىلداندىرىپ، كوگال جاتقىزىپ، جولعا قاراماي جاتقىزىپ، دارەتحانا سالىپ، جول شىراعىن ورناتىپ، قىستاق تۇرعىندارىنىڭ جۇمىس تاۋىپ ىستەۋىنە، اقشا تابۋىنا مۇمكىندىك جاسادى.
ۋاڭ شياڭ : «نىساندى قولعا كەلتىرۋ نەمەسە قىستاق تۇرعىندارىنىڭ قيىنشىلىعىنا كومەكتەسۋ بولسىن ءبىز بارىنشا كۇش سالامىز. قىستاق تۇرعىندارىنىڭ اۋقاتتانعانىن كورگەندە كوڭىلىمىز ورنىعادى» دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى