شاۋەشەك باقتى جۇڭگو-قازاقستان شەكارا حالىقتارىنىڭ ءوزارا ساۋدا بازارى

□ 6-ايدىڭ 13-كۇنى شاشا قالاشىعى گۇڭديان قىستاعىنىڭ تۇرعىنى ما ساييىڭ (الدىڭعى ادام) مەن جاڭ جۇيمەي بانكە كارتچكاسىن تىزىمگە الدىرۋدا. 
 

  ءتىلشىمىز جاڭ پەيچي حابارلايدى. 6-ايدىڭ 13-كۇنى شاۋەشەك باقتى جۇڭگو-قازاقستان شەكارا حالىقتارىنىڭ ءوزارا ساۋدا بازارىنداعى جىبەك جولى مادەنيەت تاۋارلارى قالاشىعى پايدالانۋعا بەرىلدى. تاۋار قالاشىعىندا جۇك تاسىعان اۆتوموبيلدەر كىرىپ-شىعىپ،جۇك تاسۋشىلار زاتتاردى تاۋار قالاشىعىنا تاسىپ جاتتى.

  شاۋەشەك باقتى وتكەلى مەملەكەت دارەجەلى ءبىرىنشى تۇردەگى وتكەل بولىپ،شاۋەشەك قالاسىنان 12 كيلومەتر قاشىقتىققا ورنالاسقان،شينجياڭ بويىنشا قالاعا ەڭ   جاقىن،ساۋدا شارت-جاعدايى ەڭ جاقسى قۇرلىق وتكەلى ءارى شەكارا حالىقتارىنىڭ ءوزارا ساۋدا بازارىنىڭ تيپىن وزگەرتىپ دامىتۋداعى سىناق ءتۇيىندى وتكەل ەسەپتەلەدى. 550 ميلليون يۋان قارجى قوسىلعان شەكارا حالىقتارىنىڭ ءوزارا ساۋدا بازارى   وسىنىڭ ىشىندە بولىپ،ەلىمىز جانە شەتەل ساۋدا سالاسىنداعى قايراتكەرلەر ايرىقشا نازار اۋدارىپ وتىرعان ەكونوميكا-ساۋدا تۇعىرىنا اينالدى.

  شاۋەشەك قالاسىنىڭ مەملەكەت دارەجەلى شەكارا ەكونوميكالىق سەلبەستىك رايونىنىڭ جاعراپيالىق باسىمدىلىعىن سۇيەنىش ەتكەن شەكارا حالىقتارىنىڭ ءوزارا ساۋدا بازارىنىڭ تيپى وزگەرىپ،دارەجەسى جوعارىلاۋدا. جىبەك جولى مادەنيەت تاۋارلارى قالاشىعى مەن قوسىمشا قۇرىلعىلارى شاۋەشەك باقتى جۇڭگو-قازاقستان شەكارا حالىقتارى ءوزارا ساۋدا بازارىنىڭ ءبىرىنشى مەرزىمدىك وزەكتى قۇرىلىسى رەتىندە مەملەكەتتىڭ شەكارا حالىقتارىنىڭ شەكارا ساۋداسىنا قاراتقان ءتيىمدى ساياساتتارى دا وسى ارادا تولىق ايگىلەنۋدە.

  شاۋەشەك باقتى جۇڭگو-قازاقستان شەكارا حالىقتارىنىڭ ءوزارا ساۋدا بازارىنا باسشىلىق ەتۋ گرۋپپاسىنىڭ ورىنباسار باستىعى ليۋ ۋي: «شاۋەشەك باقتى جۇڭگو-قازاقستان شەكارا حالىقتارىنىڭ ءوزارا ساۋدا بازارى باسقا ءوزارا ساۋدا بازارى رايوندارىنان پارىقتى. بىرىنشىدەن،شەكارا حالىقتارى بۇل ارادان يمپورت تاۋارلارىن ساتىپ العاندا ءاربىر ادامنىڭ كۇنىنە ساتىپ العان يمپورت تاۋارلارىنىڭ قۇنى 8000  يۋاننان اسپاسا بولعانى،يمپورت كەدەن باجىسى مەن يمپورت تەجەم باجىسى كەشىرىم ەتىلەدى؛ ەكىنشىدەن،شاۋەشەك قالاسىنىڭ ءارقايسى اۋىل،قالاشىق،الاڭدارىنداعى 2500 شەكارا حالقىنىڭ ءاربىرى 8000   يۋانعا دەيىن ءتيىمدى ساياساتتان يگىلىكتەنەدى،ياعني،ءار 20 ادام ءبىر گرۋپپا بولىپ،شەكارا حالىقتارىنىڭ ءوزارا ساۋدا بازارىندا ساۋدا جاساۋىنا بولادى. سەلبەستىك گرۋپپالارى پارتيا مۇشەلەرى،ەڭ تومەنگى تۇرمىسى قامتاماسىزداندىرىلاتىندار،قيىنشىلىعى بار وتباسى نەمەسە مۇگەدەكتەر سياقتى جۇرتشىلىقتان قۇرالىپ،‹پارتيا قۇرىلىسى+ كەدەيلەردى سۇيەمەلدەۋ + كەدەيلىكتەن ارىلتىپ اۋقاتتاندىرۋ› ۇلگىسىن قالىپتاستىرادى» دەدى.

  ۇعىسۋعا قاراعاندا،ورىس ۇلگىسىندەگى ەكى قاباتتى جىبەك جولى مادەنيەت تاۋارلارى قالاشىعىنىڭ قۇرىلىسى لياۋنيڭ ولكەسى شىنياڭ قالاسىنىڭ شينجياڭعا كومەكتەسۋدەگى كىلت تاپسىراتىن ينجەنەريا سانالىپ،جالپى 84 ميلليون 670 مىڭ يۋان قارجى قوسىلعان،جالپى قۇرىلىس كولەمى 15 مىڭ 720 شارشى مەتر. 2018-جىلى 4-ايدا قۇرىلىسىن باستاپ،2019-جىلى 5-ايدىڭ سوڭىندا قۇرىلىسى اياقتالعان.

  جىبەك جولى مادەنيەت تاۋارلارى قالاشىعىنىڭ اينالىمعا ءتۇسۋى وتكەل ەكونوميكاسىنىڭ دامۋىن اناعۇرلىم ىلگەرىلەتىپ،شاۋەشەك قالاسىنداعى،سونداي-اق ونىڭ ماڭىنداعى ءار ۇلت جۇرتشىلىعىن كوپتەگەن جۇمىستانۋ ورايىمەن قامداپ،ءتىپتى دە مول ەكونوميكالىق جانە قوعامدىق ونىمدىلىك اكەلەدى ەكەن.

  شاۋەشەك قالاسى شاشا قالاشىعى گۇڭديان قىستاعىنىڭ تۇرعىنى ما ساييىڭ: «قىستاعىمىزدا 20 ادامنان قۇرالعان سەلبەستىك گرۋپپاسى بار. سەلبەستىك گرۋپپاسى ءبىر كۇندە 160 مىڭ يۋاننىڭ تاۋارىن ساتىپ الۋىنا بولادى،بۇل ءبىز جونىنەن الىپ ايتقاندا ۇلكەن قامقورلىق سانالىپ،بولاشاققا دەگەن سەنىمىمىز ارتا ءتۇستى. بۇگىن شەكارا حالىقتارى ءوزارا ساۋدا بازارىنىڭ بانكە كارتچكاسىن اكەلىپ تىزىمدەلدىك،بۇل ساۋدا جاساۋدىڭ الدىنداعى ەڭ سوڭعى باسقىش ەكەن» دەدى.

  جىبەك جولى مادەنيەت تاۋارلارى قالاشىعىنا ساۋداگەر باۋراپ،قارجى ەنگىزۋ تەبىنىن ارتتىرۋ ءۇشىن،ايماق پەن شاۋەشەك قالاسى ءبىر جىلدىق قوجالىق باسقارۋ قاراجاتىن كەشىرىم ەتۋ،3 جىلدىق ساۋدا ورنىن مايعا الۋ اقىسىن كەشىرىم ەتۋ سياقتى ءتيىمدى ساياساتتاردى شىعارعان. كەزەكتە جىبەك جولى مادەنيەت تاۋارلارى قالاشىعىنىڭ سىرتتان ساۋداگەر باۋراۋ جۇمىسى اياقتاعان. 77 ساۋدا دۇكەنىنىڭ بارلىعى مايعا بەرىلىپ،مۇنىڭ   ىشىندە،1-قاباتىنا ەلىمىز تاۋارلارى رايونىنداعى 25 ساۋدا دۇكەنى مەن قازاقستان تاۋارلارى رايونىنداعى 38 ساۋدا دۇكەنى،2- قاباتىنا لياۋنيڭ ولكەسى شىنياڭ قالاسىنىڭ ۋ-اي بازارى،لياۋياڭ تۇڭ-ىرباۋ  تەرى كيىمدەرى بازارى،شيليۋ كيىم-كەشەك بازارى،سونداي-اق حۋلۋداۋ مالتاۋ كيىمدەرى كاسىپورنى ورنالاسقان.

  انشان شيليۋ يۇيمان حالىقارالىق ساۋدا شەكتى سەرىكتەستىگىنىڭ باس القاسى شۇي حايجۇن: «لياۋنيڭ مەن تارباعاتاي سىندى ەكى ورىن ۇكىمەتى كوپتەگەن ابزال ساياساتتاردى شىعارىپتى،باقتى وتكەلىنىڭ دامۋ بولاشاعىنا كوزىم جەتەدى. وسى تۇعىردان پايدالانىپ ساۋدا كولەمىن ءتىپتى دە ۇلعايتپاقشىمىن» دەدى.

  شاۋەشەك قالالىق شەكارا ەكونوميكالىق سەلبەستىك رايونى دامۋ-رەفورمالاۋ    مەكەمەسىنىڭ باستىعى جيا شيڭليڭ: «جىبەك جولى مادەنيەت تاۋارلارى قالاشىعىنىڭ رەسمي اينالىمعا ءتۇسۋى لياۋنيڭ-تارباعاتاي سىندى ەكى ورىننىڭ،جۇڭگو-قازاقستان سىندى ەكى ەلدىڭ ساۋدا دانەكەرىنە،دوستىق كوپىرىنە اينالاتىنىنا كامىل سەنەمىز» دەدى.


رەداكتورى : ارداق كامالقان قىزى
 
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى