تاماشالاي بارعان قاريدارلار بازاردى قىزدىردى

□ 6-ايدىڭ 14-كۇنى سىچۋان ولكەسىنەن كەلگەن ساياحاتشى يۋانسۋ ساۋدا دۇكەنىندە ءيىس سۋ تاڭداۋدا.

 

  تىلشىلەرىمىز جاڭ گۋحۇي،  جاڭ پەيچي حابارلايدى. 6-ايدىڭ 14-كۇنى حىبي ولكەسىنەن كەلگەن ساياحاتشى ۋ شۋمين: «مىنا اياق كيىمنىڭ ۇلگىسى جاڭا ەكەن، كوزىم ءتۇسىپ قالدى،كيىپ كورسەم اياققا جايلى،ەڭ باستىسى باعاسى قىمبات ەمەس بولعاندىقتان ساتىپ الۋ بەكىمىنە كەلدىم»  دەدى.

  ۋ شۋمين شاۋەشەك باقتى جۇڭگو-قازاقستان شەكارا حالىقتارىنىڭ ءوزارا ساۋدا بازارىنداعى جىبەك جولى مادەنيەت تاۋارلارى قالاشىعىنىڭ سىناق رەتىندە تيجارات باستاعانىن ەستىپ،جۇبايىن ەرتىپ كورگەلى بارعان ەكەن. ول: «جۇبايىم ەكەۋىمىز حىبەيدەن شاۋەشەككە تۋىسشىلاپ كەلگەنبىز، ۇلىمىزبەن باس قوسۋدىڭ سىرتىندا شاۋەشەكتىڭ ماڭايىن ارالاپ،كورىنىستەرىن تاماشالادىق. جاقىننان بەرى شاۋەشەكتە قۋانىشتى ىستەر بىرىنە-ءبىرى جالعاستى،پويەز قاتىناپ،شەكارا حالىقتارىنىڭ ءوزارا ساۋدا بازارى اشىلىپ، جۇرتشىلىقتىڭ تۇرمىس مازمۇنىن بايىتا ءتۇستى» دەدى.

  جاقىنعى ءبىر اپتادان بەرى شەكارا حالىقتارىنىڭ ءوزارا ساۋدا بازارىنىڭ    اشىلىپ،ىسكە تۇسەتىن حابارى جالپاق جۇرتقا تارالىپ،كوپتەگەن جەرلىك تۇرعىندار مەن سىرت ورىننان كەلگەن   ساياحاتشىلار شاۋەشەك جىبەك  جولى مادەنيەت تاۋارلارى قالاشىعىن ارالاۋدى ادەتكە اينالدىرعان.

  جىبەك جولى مادەنيەت تاۋارلارى قالاشىعىنداعى حىجياۋ اياق كيىم دۇكەنىنىڭ قوجايىنى ۋاڭ حۇڭرىن قاريدار قابىلداۋمەن قاربالاس بولىپ،ەكى ساعاتتىڭ ىشىندە 20 پاردان ارتىق اياق كيىم ساتىپتى. ول: «شينجياڭدىق دوستار وتە اق كوڭىل ەكەن،بۇل ارادا دۇكەن اشىپ قاربالاس بولسام دا،وتە كوڭىلدىمىن. بازار رەسمي اشىلعاننان كەيىن كۇنىنە 200 پاردان ارتىق اياق كيىم ساتا الاتىن ۇقسايمىن» دەدى.

  شينفي ساۋدا دۇكەنىنىڭ قوجايىنى   لي دىشياڭ،باستىسى،ازىق-تۇلىك ساۋداسىمەن شۇعىلدانادى،بىرنەشە كۇننەن بەرى جۇك كىرگىزۋ،سورەگە ءتىزۋ،قاريدار قابىلداۋ سياقتى جۇمىستارمەن قاربالاس ەكەن. ول شەكارا حالىقتارىنىڭ ءوزارا ساۋدا بازارىنىڭ دامۋ ۇردىسىنەن زور ءۇمىت كۇتۋمەن بىرگە،جىبەك جولى مادەنيەت تاۋارلارى قالاشىعىنداعى ساۋداسىنىڭ بارعان سايىن كۇسەت بولاتىندىعىنا سەنەدى ەكەن.

  ساۋدا دۇكەندەرىنىڭ ىشىندە يۋانسۋ ساۋدا دۇكەنىنىڭ ساۋداسى ەڭ كۇسەت ەكەن. 5-ايدىڭ 30-كۇنى سىناق رەتىندە تيجارات باستاعاننان بەرى ساۋدا ساتۋ سوماسى كۇن سايىن ارتىپ،العاش  تيجارات باستاعان كۇنگى 1000 نەشە يۋاننان ارتىپ قازىر 20 مىڭ يۋانعا تاياپتى. قازىر دۇكەنگە باراتىن قاريدارلاردان سىرت،زاكاز بەرەتىندەر دە كوبەيدى. 6-ايدىڭ 13-كۇنىنىڭ وزىندە يۋانسۋ ساۋدا دۇكەنى وڭتۇستىك-سولتۇستىك شينجياڭداعى ءارقايسى ايماق،وبلىستارعا،سونداي-اق سىچۋان،تيانجين سياقتى جەرلەرگە 10 جاشىكتەن ارتىق جۇكتى پوچتامەن جونەلتىپتى.

  تارباعاتاي مادەنيەت الاڭىنىڭ الدىندا ەكى قاباتتى كوشە اۆتوبۋز ءار كۇنى تاڭەرتەڭگى ساعات 9 دان باستاپ جولاۋشى تاسىمالدايدى.

  شاۋەشەك قالالىق كوشە اۆتوبۋز قىزمەت وتەۋ شەكتى سەرىكتەستىگىنىڭ شوفەرى شاي زوسىن: «شەكارا حالىقتارىنىڭ ءوزارا ساۋدا بازارىنا كۇنىنە الدەنەشە رەت بارىپ-قايتامىن، اۆتوبۋزعا وتىرعاندار قايتاردا ۇلكەندى-كىشىلى سومكەلەردى كوتەرىپ قايتادى، كەيبىرەۋلەرى كوپ رەت بارىپ قايتتى» دەدى.


رەداكتورى : ارداق كامالقان قىزى
 
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى