ءتىلشىمىز لي ميڭشىڭ حابارلايدى. «ماعان تەرەڭ اسەر ەتكەنى، اۋىل-قىستاقتى گۇلدەندىرۋ ستراتەگياسىنىڭ اتقارىلۋىندا ەگىن-مال شارۋاشىلىق رايوندارىندا زور وزگەرىس تۋىلىپتى. كوپتەگەن ەگىنشى-مالشىلاردىڭ تۇرمىسى قالا تۇرعىندارىنان كەم تۇسپەيدى ەكەن. بۇل وزگەرىستەردى پارتيا مەن مەملەكەتتىڭ جاقسى ساياساتىنان بولە قاراۋعا بولمايدى» دەدى7-ايدىڭ 3-كۇنى شاعانتوعاي اۋدانىنداعى پەنسياعا شىققان ساقا كادر جىڭ جى-يۋان تەبىرەنە.
جاڭا جۇڭگو قۇرىلعاندىعىنىڭ 70 جىلدىعىن قۇتتىقتاۋ ءۇشىن،شاعانتوعاي اۋدانى ساقا پارتيا مۇشەلەرىن، ساقا كادرلاردى ۇيىمداستىرىپ، «شاعانتوعاي اۋدانىنداعى جاڭا وزگەرىستەردى كورەيىك» قيمىلىن ورىستەتتى. 20 دان ارتىق ساقا پارتيا مۇشەسى،ساقا كادر شاعانتوعاي مال فەرماسىنىڭ اقتەكشە قىستاعى، جانكىسى اۋىلىنىڭ جانكىسى قىستاعى، قارابۋرا قالاشىعىنىڭ ونەركاسىپ كوشەسى الەۋمەتتىك اۋماعى، شاعانتوعاي اۋدانىنىڭ كەدەيلىكتەن ارىلتۋ جۇمىستاندىرۋدان ۇلگى كورسەتۋ باقشاسى، جاڭا جەر اۋىلىنىڭ مۇقىر قىستاعى سياقتى جەرلەرگە بارىپ، نەگىزگى ساتى پارتيا قۇرىلىسى، كەدەيلىكتەن ارىلتۋدان قامال الۋ، اۋىل-قىستاقتى گۇلدەندىرۋ سياقتى جاقتارداعى جاعدايلاردى ەگجەي-تەگجەيلى ۇعىسىپ،اۋىل-قىستاقتى گۇلدەندىرۋ ستراتەگياسىنىڭ قالا- اۋىلدىڭ دامۋىنا جانە حالىق بۇقاراسىنىڭ ءوندىرىس-تۇرمىسىنا اكەلگەن وزگەرىستەرىن سەزىندى.
شاعانتوعاي مال فەرماسىنىڭ اقتەكشە قىستاعىندا جانكىسى اۋىلىنىڭ جانكىسى قىستاعىندا جانە جاڭا جەر اۋىلىنىڭ مۇقىر قىستاعىندا ساقا پارتيا مۇشەلەرى، ساقا كادرلار شارۋا وتباسىلارىن ارالاپ، اۋلالارىن كوزدەن كەشىرىپ،اۋىل-قىستاقتاعى جاڭا وزگەرىستەردى قۋانا كوردى. كەڭ دە تەگىس ماي جول، ەڭسەلى دە ساۋلەتتى ۇيلەر، كوركەم دە تازا قىستاق ورتاسى ساقا پارتيا مۇشەلەرى مەن ساقا كادرلاردىڭ تاڭدايىن قاقتىردى.
قارابۋرا قالاشىعىنىڭ ونەركاسىپ كوشەسى الەۋمەتتىك اۋماعى مەن كەدەيلىكتەن ارىلتۋ جۇمىستاندىرۋدان ۇلگى كورسەتۋ باقشاسىندا ساقا پارتيا مۇشەلەرى، ساقا كادرلار سول ورىن جاۋاپتىسىنىڭ تانىستىرۋىن تىڭداپ، قۇرىلىس جاعدايى مەن دامۋ جوباسىن تاپتەشتەي ۇعىستى، اراسىندا وسى ءبىر تاماشا ساتتەردى فوتواپپاراتتارىمەن ەستەلىككە الا ءجۇردى.
ەكسكۋرسيا اياقتاعاننان كەيىن كوپشىلىك الداعى جەردە كوممۋنيستەردىڭ اۆانگاردىق، ۇلگىلىك،باستاماشىلدىق رولىن جالعاستى ساۋلەلەندىرىپ، پەنسياعا شىقسا دا جىگەرلەرىن مۇقالتپاي، بەلسەندىلىكتەرىن ساۋلەلەندىرىپ،اتا مەكەننىڭ ەكونوميكاسى مەن قوعام دامۋىنا ءوز ۇلەستەرىن قوساتىندىقتارىن ءبىلدىردى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى