ءتىلشىمىز يان ۋىنحۋا حابارلايدى. ءار كۇنى تاڭ اتىسىمەن كارىمعازى ساقان قىستاق سىرتىنداعى ەگىس اتىزىنىڭ جاعالاۋىنان ءشوپ جۇلىپ اكەلىپ،قوراداعى مەكيەندەرىنىڭ الدىنا تاستايدى،سوسىن مەكيەندەرىنىڭ قاناتتارىن سابالاپ،جاپىرلاي جەتىپ، تالاسا-تارماسا باس قويعانىنا قاراپ تۇرىپ،جۇزىنەن رازىلىق كۇلكىسى ەسىپ،راحات كۇي كەشەدى.
ودان ارى شارباعىن كوتەرىپ كەلىپ جۇمىرتقالاردى جيناي باستادى.بىرەۋ،ەكەۋ... ول ىشتەي جيعان جۇمىرتقالارىن ساناي ءجۇرىپ، شارباعىنا سۇڭگىتە بەردى،«بىرەۋى ەكى يۋان،54 جۇمىرتقا 104 يۋان بولادى» دەپ كۇبىرلەدى.
ال،جەمگە تويعان مەكيەندەر قاناتتارىن قاققىلاپ،قورانىڭ ىشىندە ءبىرىن-ءبىرى قۋالاپ،تۇتاس قورانىڭ ءىشى تىرشىلىك تىنىسىنا تولى كۇيگە ەنەدى.
«كەدەيلەردى سۇيەمەلدەيتىن كادر اكەلىپ بەرگەن 100 مەكيەننىڭ ارقاسىندا،ءار كۇنى اقشا تاۋىپ،كىرىس كىرگىزىپ وتىرمىن» دەدى كارىمعازى تەبىرەنىسپەن.
57 جاستاعى كارىمعازى ساۋان اۋدانى بورتىنكو اۋىلى جارسۋات قىستاعىنىڭ كەدەي تۇرعىنى، وتباسىنداعى 3 ادام دا مۇگەدەك ەدى. ساۋان اۋداندىق ساياسي كەڭەستىڭ كادرى ياڭ داحاي ونى سۇيەمەلدەيتىن كادر بولعاننان كەيىن،ونىڭ تۇرمىسىندا ءۇمىت ۇشقىنى قاۋلايدى.
بيىل 4-ايدىڭ ورتا شەنىندە ياڭ داحاي كارىمعازىنىڭ وتباسىنا كەلەدى، كارىمعازىنىڭ ايەلى مۇگەدەك بولعانىمەن،وتە مەيىرىمدى،اقىل-ەستى جان ەكەن،ءۇيى مەن اۋلاسىن دا تاپ-تۇيناقتاي ەتىپ تازالاپتى. كارىمعازىنىڭ قۇلاعى اۋىر بولعاندىقتان،تىڭداتقى تاققاندا عانا باسقالارمەن سويلەسە الادى،ءوزى ىسكە يكەمدى،ەڭبەككە شوگەل ەكەن.
«قازى اعامنىڭ اۋلاسى كەڭ،ءوزى دە ەڭبەكشىل ادام،كەدەيلەردى سۇيەمەلدەۋدە ءونىمى تەز كورىلەتىن،كىرىسى باياندى شارۋاشىلىقتى دامىتۋعا تۋرا كەلەدى. مەنشە مەكيەن باعۋ بولىپ تۇرعان جۇمىس». ياڭ داحاي سۇيەمەلدەۋ ءتاسىلى جايىندا وسىنداي بايلامعا كەلەدى.
ءسويتىپ،ياڭ داحاي سۇيەمەلدەۋ ءتاسىلىن ساۋان اۋداندىق ساياسي كەڭەستىڭ مۇشەسى،شينشياڭلۇڭ ساۋدا-ساتتىق شەكتى سەرىكتەستىگىنىڭ باس ديرەكتورى ۋاڭ بيڭعا ايتادى،ۋاڭ بيڭ ۇستىندە كارىمعازىعا 100 مەكيەن مەن جەم اپارىپ بەرۋ بەكىمىنە كەلەدى.
وسىدان كەيىن ياڭ داحاي قىستاقتىڭ ءبىرىنشى شۋجيى،ساۋان اۋداندىق سۋ ىستەرى مەكەمەسىنىڭ قىستاقتا تۇراتىن قىزمەت اترەتىنىڭ باستىعى جين يۇڭچاۋ جانە قىستاق پارتيا ياچەيكاسىنىڭ شۋجيى نۇرتاي بولاتپەن بىرلىكتە كارىمعازىنىڭ اۋلاسىنا تاۋىق قوراسىن سالىپ بەرۋ جۇمىسىن اقىلداسادى.
5-ايدىڭ 7-كۇنى قىزمەت اترەتى اعاش،تاقتاي،كەرپىش،ال قىستاق كوميتەتى تەمىر تور اكەلىپ، ياڭ داحاي دوس-جاراندارىن شاقىرىپ،كوپشىلىك بىرلىكتە ىسكە كىرىسىپ،كارىمعازى اۋلاسىنىڭ ءبىر بۇرىشىنان 20 شارشى مەترلىك تاۋىق قوراسىن تۇرعىزادى،ونىڭ سىرتىندا تەمىر تور تارتىپ،50 نەشە شارشى مەترلىك اشىق قورا قورشايدى. تۇتاس اۋلانى تازالاپ،رەتكە كەلتىرىپ،تاۋىق قوراسىن ىڭعايلاپ بولعاننان كەيىن،ياڭ داحاي تاۋىققا جەم بەرەتىن ىدىس پەن سۋ بەرەتىن اسپاپ ساتىپ اكەلەدى.
5-ايدىڭ 10-كۇنى ياڭ داحاي ياڭ بيڭ 3 مىڭ يۋان قارجى شىعارىپ ساتىپ العان 100 مەكيەن مەن 600 نەشە يۋاندىق جەمدى كارىمعازىنىڭ ۇيىنە جەتكىزەدى. ال بۇل مەكيەندەر كارىمعازىنىڭ قوراسىندا سول كۇننىڭ وزىندە 40 نەشە جۇمىرتقا جۇمىرتقالاعان ەكەن.
«كوپشىلىكتىڭ كومەگىنە كوپتەن-كوپ راقىمەت،مەن تاۋىقتاردى، ءسوزسىز،جاقسىلاپ باعىپ،كۇن كورىسىمدى جاقسارتا تۇسەمىن» دەدى كارىمعازى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى