■ 6 اۋىل-قالاشىقتى،12 قىستاق-اترەتتى قامتىپ،نىسان كولەمى 65 مىڭ مۋعا جەتىپ،جالپى 66 ميلليون 790 مىڭ يۋان قارجى قوسىلدى
ءتىلشىمىز يان ۋىنحۋا حابارلايدى. ەگىن باپتايتىن مەزگىل جەتتى،ساۋان اۋدانى شيگوبي قالاشىعى شياۋپيڭيۋان قىستاعىنىڭ مىڭ مۋلىق جوعارى ولشەمدى جۇگەرى اتىزىنداعى العاشقى سۋىن قانىپ ىشكەن جۇگەرىنىڭ ساباعى جۋانداپ،جاپىراعى قاراقوشقىلدانىپ جايقالا وسكەن. بۇل وسى قىستاقتىڭ جوعارى ولشەمدى ەگىنجاي قۇرىلىسى نىسانىن اتقارعاننان كەيىنگى شارۋالاردىڭ ەگىس اتىزىنىڭ مول ءونىم بەينەسى ەدى.
2019-جىلى شيگوبي قالاشىعى شياۋپيڭيۋان قىستاعى جوعارى ولشەمدى ەگىنجاي قۇرىلىسى نىسانىنا ەنگىزىلىپ،تۇتاس قىستاقتاعى 4775 مۋ بىتىراندى جەر بىرىكتىرىلگەن. بيىل كوكتەمدە تۇتاس قىستاقتىڭ ەگىستىك جەرلەرىنىڭ جوعارى ولشەمدى ەگىنجاي قۇرىلىسى نەگىزىنەن ورىندالىپ،قىستاق بويىنشا جەردى اينالىمعا سالۋ ءساتتى جۇزەگە استى.
بۇل نىسان بۇقاراعا شىنايى پايدا جەتكىزىپ،جەردى بىرىكتىرگەننەن كەيىن،جەر كولەمى دە ارتىپ،قۇنى جوعارىلادى. بۇرىن ءار مۋ جەردى كوتەرمەگە الۋ اقىسى 300 يۋان اينالاسىندا بولسا،جەردى بىرىكتىرگەننەن كەيىن 650 يۋانعا جوعارىلادى.
«جەر ءبىر تۇتاس باسقارۋعا الىنعاننان كەيىن،ءونىم مولشەرى مەن كىرىس مولشەرى ارتىپ قالماستان،ەڭبەككۇش ازات بولىپ، قىستاق تۇرعىندارى سىرتقا شىعىپ جۇمىس ىستەپ،ۇستەمە كىرىس كىرگىزە الاتىن بولدى» دەدى شياۋپيڭيۋان قىستاعى پارتيا ياچەيكاسىنىڭ شۋجيى جاڭ حۇڭباۋ.
شياۋپيڭيۋان قىستاعىنىڭ جوعارى ولشەمدى ەگىنجاي قۇرىلىسى نىسانى ساۋان اۋدانى 2019-جىلى اتقارعان جوعارى ولشەمدى ەگىنجاي قۇرىلىسى نىساندارىنىڭ ءبىرى.
ۇعىسۋعا قاراعاندا،جوعارى ولشەمدى ەگىنجاي قۇرىلىسى نىسانى 6 اۋىل- قالاشىقتى،12 قىستاق-اترەتتى قامتىپ،نىسان كولەمى 65 مىڭ مۋعا جەتىپ،جالپى 66 ميلليون 790 مىڭ يۋان قارجى قوسىلعان ەكەن.
جوعارى ولشەمدى ەگىنجاي قۇرىلىسى نىسانى ءوڭىر ىشىندەگى اتىز،توپىراق،سۋ، ورمان،ەلەكتر،تەحنيكا،باپتاۋ سياقتىلاردى ءبىر تۇتاس سايكەستىرىپ،سول ءوڭىردىڭ ءوندىرىس شارت-جاعدايى مەن ەكولوگيالىق ورتاسىن ءونىمدى جاقسارتىپ،جاراتىلىستىق اپاتتارعا توتەپ بەرۋ قۋاتىن ارتتىرىپ،اۋىل شارۋاشىلىعىنىڭ جالپىلىق ءوندىرىس قۋاتىن جوعارىلاتىپ،اۋىل-قىستاقتاعى وندىرگىش كۇشتەردى ازات ەتۋمەن بىرگە،كوللەكتيۆ ەكونوميكاسى ءالسىز قىستاقتاردىڭ،قيىنشىلىعى بار وتباسىلارىنىڭ ءوندىرىس شارت-جاعدايىن بەلگىلى دارەجەدە جاقسارتىپ،كەدەيلىكتەن ارىلتۋدان قامال الۋ قىزمەتىندە تاماشا ۇلگىلىك،باستاماشىلدىق رول اتقارعان.
ۇعىسۋعا قاراعاندا،كەدەيلىكتەن ارىلتۋدان قامال الۋ قىزمەتىن ىلگەرىلەتۋ ءۇشىن،جوعارى ولشەمدى ەگىنجاي قۇرىلىسى نىسانى الدىمەن بورتىنكو اۋىلى مەن شيگوبي قالاشىعىنىڭ تاۋلى رايوندارىندا اتقارىلادى ەكەن.
«بۇل نىساندار 6-ايدىڭ باسىندا سالىنىپ بولىپ،جەرگىلىكتى ورىننىڭ اۋىل شارۋاشىلىق نەگىزدىك قۇرىلعىلار شارت - جاعدايىن ءونىمدى جاقسارتىپ،اۋىل شارۋاشىلىق كاسىپ قۇرىلىمىن رەتتەۋ،اۋىل شارۋاشىلىعىنىڭ جالپىلىق ءوندىرىس مولشەرىن ،ەگىس داقىلدارىنىڭ ءونىم مولشەرى مەن ساپاسىن جوعارىلاتۋ،شارۋالار كىرىسىن ارتتىرۋدا ماڭىزدى رول اتقاردى» دەدى اۋداندىق اۋىل شارۋاشىلىق،اۋىل-قىستاق مەكەمەسى نىسان كەڭسەسىنىڭ ورىنباسار مەڭگەرۋشىسى،اعا اگرونوم چىن لي.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى