ءتىلشىمىز يان ۋىنحۋا،ەرىكتى ءتىلشى ياڭ جىچىڭ حابارلايدى. 7-ايدىڭ 10-كۇنى توعان سۋى لي جينگاڭنىڭ جۇگەرى اتىزىنا جەتىپ،«قاتالاعان» جۇگەرى اتىزىنان سۋدىڭ تامشىلاعان داۋىسىن ەستىگەندە لي جينگاڭنىڭ بىرنەشە كۇننەن بەرگى ابىرجىعان كوڭىل كۇيى اقىرى ورنىعا باستادى.
ساۋان اۋدانى دۇڭۋان قالاشىعى نانۋان قىستاعىنىڭ تۇرعىنى لي جينگاڭ: «تامشىلاتىپ سۋارۋعا پايدالانىپ كەلگەن سۋ سىڭبەيتىن توعاننىڭ ءبىر بولەگى ەكى كۇننىڭ الدىندا وپىرىلىپ،سۋ كەلمەي قالدى. جۇگەرى اتىزىنا سۋ كەلمەي قالعانىن كورىپ ىشتەي قاتتى ابىرجىدىم. باعىمىزعا جاراي قىزمەت اترەتى دەر كەزىندە جوندەپ،جۇگەرى اتىزىن سۋمەن قامدادى» دەدى.
7-ايدىڭ 6-كۇنى دۇڭۋان قالاشىعى نانۋان قىستاعىنىڭ 6-ءنومىرلى تامشىلاتىپ سۋارۋ كولشىگىنىڭ سۋ سىڭبەيتىن توعانى وپىرىلىپ،سۋ توعان تاعانىنا ءسىڭىپ سىرتقا اعا باستايدى.
نانۋان قىستاعىنىڭ عىلىم-تەحنيكاعا جاۋاپتى ورىنباسار مەڭگەرۋشىسى قاستەر ابدىراحىمان: «توعاننىڭ وپىرىلعان جەرى بارعان سايىن ۇلعايا تۇسكەن،دەر كەزىندە ءبىر جاقتىلى ەتپەسە،تۇتاس توعان كەرەكتەن شىعاتىن ەدى،ەگەر قايتادان جاڭا توعان سالاتىن بولساق،ەڭ تەز بولعاندا جارىم اي ۋاقىت كەتەدى» دەدى.
لي جينگاڭنىڭ 6-ءنومىرلى تامشىلاتىپ سۋارۋ كولشىگىنەن سۋ ىشەتىن 36 مۋ جۇگەرى اتىزى بار ەدى،ول: «قازىر جۇگەرىنىڭ بۋىن تارتىپ،باس جاراتىن ماڭىزدى كەزەڭى،ەگەر جۇگەرى وتە شولدەپ كەتسە، ماساعى قۋراپ،تولىق توزاڭدانبايدى دا جۇگەرىنىڭ ءدانى ازايىپ،ونىمدىلىگى تومەندەپ كەتەدى» دەيدى الاڭداپ.
جاعدايدان حاباردار بولعان ساۋان اۋداندىق اۋىل شارۋاشىلىعى،اۋىل-قىستاق مەكەمەسىنىڭ «ۇعىسۋ،تيىمدىلىك جاساۋ،توعىستىرۋ» قىزمەت اترەتى دەرەۋ ويىلىپ كەتكەن ورىنعا بارىپ جاعدايدى كوزدەن كەشىرىپ،قىستاق «ەكى كوميتەتىمەن» قاتىستى شارا قولدانۋدى اقىلداسادى. قىستاقتىڭ ءبىرىنشى شۋجيى،قىزمەت اترەتىنىڭ باستىعى ۇلان پازىلبەك: «قازىر اۋەلى سۋدى توقتاتىپ،پارتيا مۇشەلەرى مەن بۇقارانى جۇمىلدىرىپ،سۋ سىڭبەيتىن توعاندى ەڭ قىسقا ۋاقىتتا جوندەپ،الدىمەن وسى رەتكى سۋدى سۋارىپ بولعاننان كەيىن،ارالىقتاعى ۋاقىتتان پايدالانىپ،توعاندى بەكەمدەپ جوندەيىك» دەيدى.
7-ايدىڭ 8-كۇنى تۇستەن كەيىن قىزمەت اترەتى 300 شارشى مەتر سۋ سىڭىرمەيتىن جارعاق،9 تەكشە مەتر شاعىل سياقتى ماتەريالداردى سۋ سىڭبەيتىن توعاننىڭ ويىلعان جەرىنە جەتكىزدى. قىزمەت اترەتى مەن قىستاق «ەكى كوميتەتى» جەتەكشىلىك ەتىپ،پارتيا مۇشەلەرى باستاماشى بولىپ قىستاق تۇرعىندارىن جۇمىلدىرىپ،4 ساعاتتا 26 مەتر ۇزىندىقتاعى سۋ سىڭبەيتىن توعاندى شۇعىل جوندەپ بولادى.
سۋ ناسوسى ۇيىندەگى موتور ىسكە قوسىلىسىمەن سارقىراپ اققان تازا سۋدى كورگەن قىستاق تۇرعىندارى قۋانىشقا شومدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى