ەرىكتى ءتىلشى جاۋ سىسى، ءتىلشىمىز جاڭ گوحۇي حابارلايدى. جۋىقتا شيحۋ قالاسى جيۋجاندىر اۋىلى حۋاڭچۇي قىستاعىنىڭ ولشەمدى كوكونىس باقشاسىندا قايتالاي ەگىلگەن كوكونىس مول ءونىم بەرىپ،قىستاق تۇرعىندارى اتىز باسىندا كوكونىس ءۇزىپ،قالتالاپ،اۆتوكولىككە تيەپ قاربالاستىققا ءتۇستى.
حۋاڭچۇي قىستاعىنىڭ تۇرعىنى چىن حۋايفىڭنىڭ ءتورت ماۋسىمدىق بايسايى ءبىر-بىرىمەن بوي تالاستىرسا؛قىستاق تۇرعىنى چىن پيڭيىڭنىڭ تاسپاداي تارتىلعان بىركەلكى تاسپا بۇرشاعى كورگەن جاننىڭ كوز جاۋىن الادى.
چىن حۋايفىڭ: «ءبىرىنشى كەزەكتە تاسپا بۇرشاق ەگىپ،7000 يۋان كىرىس كىرگىزدىم. ءتورت ماۋسىمدىق بايساي ەكىنشى كەزەكتە ەگىلگەن كوكونىس. قازىر تولايىم باعاسىنىڭ ءار كيلوگرامى 1.8 يۋان،ءار مۋىنان 6000 يۋان كىرىس كىرەتىنى مۇندا تۇر. ءتورت ماۋسىمدىق بايسايدى ساتىپ بولعاننان كەيىن ورنىنا جاپىراقتى كوكونىس ەگەمىن،ءار مۋىنان مەجەمەن 2000 دا 3000 يۋانعا دەيىن كىرىس كىرگىزۋگە بولادى» دەدى.
«بيىل مەن 4 جىلىجايعا كوكونىس ەكتىم،اربىرىنەن كىرەتىن كىرىس مەجەمەن 15 مىڭ يۋان اينالاسىندا،كوكونىس ەگۋدىڭ وزىنەن شامامەن 60 مىڭ يۋان كىرىس كىرگىزەمىن،ءونىمى اۋىز تولتىرىپ ايتارلىقتاي-اق» دەدى چىن حۋايفىڭ.
جۋىق جىلداردان بەرى حۋاڭچۇي قىستاعى قىستاقتىڭ ءىس جۇزىندىك جاعدايىنا نەگىزدەلىپ،شارۋالاردىڭ كوكونىس كاسىبىن دامىتۋىنا بار كۇشپەن جەتەكشىلىك ەتىپ،«كوكتەمدە ەرتە جەتىلدىرۋ،كۇزدە جاي جيناۋ» كوكونىس جىلىجايىنان 150 ىن سالىپ،جەرگىلىكتى ورىنداعى شارۋالاردىڭ كىرىسىنىڭ ارتۋىن جەبەدى.
حۋاڭچۇي قىستاعىنىڭ جەرى قۇمايت،كوكونىس ەگۋگە وتە ۇيلەسىمدى. كوكونىس كاسىبىن دامىتىپ،كولەمىن زورايتۋ ءۇشىن،جيۋجاندىر اۋىلى شارۋالاردىڭ كۇن نۇرى جىلىجايىن سالۋىنا جەتەكشىلىك ەتىپ،ەرتە ەگىپ،ەرتە بازارعا شىعارۋدى جۇزەگە اسىرىپ،«بازارعا ەرتە شىعارىلاتىن،سانى شاقتى،باعاسى جوعارى» بولۋداي باسەكەلىك باسىمدىق ازىرلەدى.
ەندى ءبىر جاعىنان،جىلىجايدا ەگۋ داقىلداردىڭ پىسۋ ۋاقىتىن ءونىمدى قىسقارتىپ،كوكونىستەردى قايتالاپ ەگۋ رەت سانىن ارتتىرىپ،باعاسى مەن ءونىم مولشەرى جاعىندا «ەكەۋىندە دە ۇتىپ شىعۋدى» جۇزەگە اسىرىپ، ەگىمشىلىك كىرىسىن ارتتىرىپ، جەرگىلىكتى ورىنداعى شارۋالاردىڭ اۋقاتتانۋ جولىنا ءتۇسىپ،دوڭگەلەك داۋلەتتى تۇرمىسقا جەتۋىنە جاعداي جاراتتى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى