ءتىلشىمىز سۇڭ جيانلياڭ،ەرىكتى ءتىلشى لي تيان حابارلايدى. قىس كىرگەننەن كەيىن،دالادا جۇمىس ىستەيتىن قىزمەتكەرلەر جونىنەن الىپ ايتقاندا،جىلى دا جانعا جايلى دەمالىس ورنىنىڭ بولۋى،وندا ءبىر شىنى ىستىق شاي ءىشىپ،قولتەلەفونعا توك تولتىرىپ الۋدىڭ ءوزى جان جادىراتار جاقسى ءىس ەكەنى ءشۇباسىز.
ساۋان اۋداندىق باس جۇمىسشىلار ۇيىمى ولاردىڭ بۇل ارمانىن رەالدىققا اينالدىردى. دالادا ەڭبەك ىستەيتىندەردىڭ «سۋىقتا جىلىنىپ،ىستىقتا سالقىندايتىن،شولدەسە ءشولىن قاندىرىپ،شارشاپ-شالدىقسا تىنىعاتىن» ورنىنان يگىلىكتەنۋى ءۇشىن،ساۋان اۋداندىق باس جۇمىسشىلار ۇيىمى قالا رايونىنداعى توراپ تۇيىندەرىنىڭ ورنالاستىرۋىنا سۇيەنە وتىرىپ، ىلگەرىندى-كەيىندى دالادا ەڭبەك ىستەيتىندەرگە قىزمەت وتەۋ پۋنكتىنەن 5 ىن قۇرىپ،دالادا ەڭبەك ىستەيتىندەردىڭ ءىس جۇزىندىك قيىنشىلىعىن ءونىمدى شەشتى.
11-ايدىڭ 10-كۇنى ءتۇس كەزى. ساۋان اۋدانى ۋانكىلۇڭ ەرەن بازارىنداعى دالا ەڭبەگىمەن شۇعىلدانۋشىلارعا قىزمەت وتەۋ پۋنكتىندە ورتا تازالىق جۇمىسشىسى ۋاڭ يۇن اۋىز سۋ جابدىعىنان ءبىر ستاكان قايناق سۋ قۇيىپ الىپ ارقالىق ورىندىقتا تىنىعىپ وتىر. تۇستەن بۇرىن تىنىم تاپپاعان ول ابدەن بولدىرىپ تا قالعان ەدى. بىرنەشە عانا شارشى مەتر كەلەتىن اياداي قىزمەت وتەۋ پۋنكتى ونىڭ شارشاعاندا تىنىعاتىن تاپتىرماس ورنىنا اينالعان.
ۋاڭ يۇن: «جۇمىس ىستەپ شارشاعانىمدا قىزمەت وتەۋ پۋنكتىنە كەلىپ ءشولىمدى باسىپ،ءسال تىنىعىپ السام كوپ-كورىم سەرگىپ قالامىن. اۋداندىق باس جۇمىسشىلار ۇيىمى مەن ۋانكىلۇڭ ەرەن بازارىنىڭ بىزگە كوڭىل ءبولىپ،قامقورلىق جاساعانىنا ەرەكشە العىس ايتامىن» دەدى.
دالادا ەڭبەك ىستەيتىندەرگە قىزمەت وتەۋ پۋنكتىندە اۋىز سۋ جابدىعى، ارقالىقتى ورىندىق،توك تولتىرۋ جابدىقتارى،كىتاپ سورەسى،شۇعىل جاعدايعا توتەپ بەرەتىن ءدارى ساندىعى سياقتى بۇيىمدار تولىق بولىپ،قاتىناس ساقشىسى،ورتا تازالىعى جۇمىسشىسى،جەدەل جەتكىزۋشى سياقتى دالا ەڭبەگىمەن شۇعىلدانۋشىلاردىڭ كوپتەگەن قيىن ماسەلەلەرىن شەشتى.
ساۋان اۋداندىق باس جۇمىسشىلار ۇيىمىنىڭ ءتوراعاسى ما چين: «ۇزاق ۋاقىت دالادا جۇمىس ىستەيتىن جۇمىسشى-قىزمەتكەرلەرگە جايلى دا جىلى تىنىعۋ ورنىن جاراتىپ بەرۋ ءۇشىن،ءبىز ورنىن بەلسەنە سايكەستىرىپ،قىزمەت وتەۋ پۋنكتىن سالىپ،دالا ەڭبەگىمەن شۇعىلدانۋشىلارعا پارتيانىڭ قامقورلىعىن شىنايى سەزىندىرىپ،ولاردىڭ جاراسىمدى قوعام قۇرۋعا ويداعىداي ات سالىسۋىنا مۇمكىندىك جاسادىق» دەدى.
رەداكتورى :الماگۇل اقاتبەك قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى