ءتىلشىمىز ليۋ ۋي،ەرىكتى ءتىلشى ليۋ شۋە حابارلايدى. «قىزىل شىراق جانعاندا توقتاپ،جاسىل شىراق جانعاندا جۇرەمىز،سارى شىراق جانعاندا ءسال كۇتە تۇرامىز؛جولدان وتكەندە جاياۋلار جولاقتى سىزىعىنان ءوتۋ كەرەك؛تاس جولدا ءبىرىن- ءبىرى قۋالاپ،الىسىپ-جۇلىسۋعا بولمايدى...» تاياۋدا ساۋان اۋداندىق قوعام حاۋىپسىزدىگى مەكەمەسى قاتىناس ساقشى ۇلكەن اترەتىنىڭ حالىق ساقشىسى تيانبو بالالار باقشاسىنداعى بالدىرعاندارعا قاتىناس حاۋىپسىزدىگى بىلىمدەرىن ۇيرەتتى.
بۇل ساۋان اۋداندىق قوعام حاۋىپسىزدىگى مەكەمەسى قاتىناس ساقشى ۇلكەن اترەتىنىڭ قاتىناس حاۋىپسىزدىگى ۇگىتىن مەكتەپتەرگە جەتكىزۋ بويىنشا ورىستەتكەن «حاۋىپ-قاتەردى سەزىنىپ،قاتەردەن ساقتانا ءبىلۋ» تاقىرىبىنداعى ۇگىت قيمىلى بولاتىن.
قيمىل بارىسىندا ساۋان اۋداندىق قوعام حاۋىپسىزدىگى مەكەمەسى قاتىناس ساقشى ۇلكەن اترەتىنىڭ حالىق ساقشىسى بالالارعا قاتىناس حاۋىپسىزدىگى جونىندەگى نەگىزدىك ساۋاتتاردى قاراپايىم دا ۇعىنىقتى، جاندى دا وبرازدى تىلمەن ءتۇسىندىردى ءارى ناق مايدان ەلىكتەمەلى جاتتىعۋى،ۇلگى كورسەتىپ ءتۇسىندىرۋ،امالياتتىق قيمىلعا قاتىناستىرۋ سياقتى فورمالارمەن كىشكەنتاي دوستارعا قاتىناس كولىكتەرىنە وتىرعاندا،سىرتتا جۇرگەن كەزدە قاتىناس قاعيداسىنا سانالىلىقپەن بويسۇنۋدى ەسكەرتتى.
سوڭىنان حالىق ساقشىسى بالالارعا قاتىناسقا جەتەكشىلىك ەتۋ قول يشاراتتارىن كورسەتتى ءارى ناق مايداندا بالالارعا قاتىناس قول يشاراتتارىن ىستەتىپ ۇيرەتتى،بالالار دا قيمىلعا بەلسەنە ات سالىستى.
تيانبو بالالار باقشاسىنداعى بالدىرعان جياڭ يۇيشين: «بۇگىن ءبىز ساقشى اعايلاردان كوپتەگەن ءبىلىم ۇيرەندىك،جولدان وتكەندە جولاقتى سىزىقتان ءوتۋىمىز كەرەك،جولدا الىسىپ ويناۋعا بولمايدى» دەدى.
بۇل رەتكى قيمىل وقۋ جاسىنا تولماعان بالالاردىڭ قاتىناس حاۋىپسىزدىگى تانىمى مەن ءوزىن قورعاۋ قابىلەتىن اناعۇرلىم جوعارىلاتىپ،قاتىناس شىرعالاڭىنىڭ تۋىلۋىنان تۋ باستان ساقتانىپ جانە ازايتىپ،وقۋ جاسىنا تولماعان بالالاردىڭ ءجۇرىس-تۇرىسىنداعى حاۋىپسىزدىگىنە تاماشا نەگىز قالادى.
«وقۋشىلار مەن وقىتۋشىلارعا جول قاتىناس حاۋىپسىزدىگى زاڭىن ءتۇسىندىرىپ،حاۋىپسىز،وركەنيەتتى ءجۇرىپ-تۇرۋدىڭ ءومىردى قورعايتىن ماڭىزدى ‹قالقان› ەكەندىگىن ۇعىندىردىق» دەدى اۋداندىق قوعام حاۋىپسىزدىگى مەكەمەسى قاتىناس ساقشى ۇلكەن اترەتىنىڭ حالىق ساقشىسى ۋ بو.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى