پراكتيكانت ءتىلشى ماقپال مىرزاقان،ءتىلشىمىز داي جياۋمەي حابارلايدى. 12-ايدىڭ 1-كۇنى شەشەسىنىڭ تاپسىرۋى بويىنشا تارباعاتاي گازەتى مەكەمەسىنە كەلگەن توكەن ومارۆانىڭ ۇلى وسى مەكەمەنىڭ قىزمەتكەرى ۋ گۇيرۇڭعا قامقا تۋ ۇسىندى.
44 جاستاعى ۋ گۇيرۇڭ باۋىرمال، باسقالاردان كومەگىن ايامايتىن ادام. اكەسى سىبە،شەشەسى داعۇر ۇلتى بولعاندىقتان،كىشكەنتايىنان كوپ ۇلت توعىسقان ۇلكەن شاڭىراقتا وسكەن ول سىبە،داعۇر تىلدەرىنەن سىرت قازاق تىلىنەن دە مۇدىرمەيدى.
بيىل 8-ايداعى ىندەتتەن ساقتانۋ-تىزگىندەۋ كەزىندە ۋ گۇيرۇڭ ىرىقتىلىقپەن ەرىكتىلەر قوسىنىنا قاتىناسىپ،شاۋەشەك قالاسى قۇرىلىس الەۋمەتتىك اۋماعىنىڭ پوچتا مەكەمەسى شاعىن اۋماعىنداعى تۇرعىندارعا قىزمەت وتەدى. جۇمىستى اسا ۇقىپتىلىقپەن ىستەيتىن ول شاعىن اۋماقتاعى ءبىر ءۇيدىڭ شىراعى ۇنەمى جانباي تۇراتىنىن بايقايدى دا، الاڭداپ ەسىگىن قاعىپ كورەدى،ءبىر مۇنشا ۋاقىت وتكەندە بارىپ ەسىك باياۋ اشىلىپ،اياعىن ارەڭ باسىپ جۇرگەن ءبىر قازاق اجەي شىعادى.
سۇراستىرا كەلە بۇل اجەيدىڭ اتى توكەن ومارۆا ەكەنىن،بيىل 76 جاسقا شىققانىن،جوعارى قان قىسىم اۋرۋىمەن قوسا جۇرەك اۋرۋى بار ەكەنىن، ىندەتتەن ساقتانۋ-تىزگىندەۋ كەزىندە بالالارى جانىندا بولماعاندىقتان،جالعىز تۇرىپ جاتقانىن بىلەدى. انە سودان باستاپ ۋ گۇيرۇڭ قاشاندا ونىڭ قامىن ويلاپ جۇرەتىن بولدى. ۋاقىتى شىعا قالسا امانداسا بارىپ،اڭگىمەلەسىپ،تاماق جەتكىزىپ بەرىپ،كىرىن جۋىپ،ەدەنىن تازالاپ،ءدارى- دارمەك،ءسۇت سياقتىلاردى ساتىپ اكەلىپ بەرەدى... ۋ گۇيرۇڭنىڭ دەن قويا قارايلاسقانىنا ەرەكشە ريزا بولعان توكەن بارا-بارا ونى ءوز قىزىنداي كورىپ،ءار كۇنى ونىڭ كەلۋىن اسىعا كۇتىپ وتىراتىن بولدى. ۋ گۇيرۇڭ كەلگەندە ۇيگە كىرۋىنە قولايلى بولۋ ءۇشىن،اۋەلى ءۇيدىڭ كىلتىن ەسىكتىڭ قۇلىبىنا سۇعىپ قوياتىن ەدى.
«ۋ گۇيرۇڭ ماعان ءوز شەشەسىندەي قارايلاستى،وعان ەرەكشە العىس ايتامىن» دەدى ۋ گۇيرۇڭ جايلى ءسوز بولعاندا اسەرلەنگەنىنەن كوزىنە جاس العان توكەن.
ۋ گۇيرۇڭ ەرىكتى قىزمەت وتەگەن كەزىندە ءار كۇنى تاڭەرتەڭ توكەنگە امانداسا بارادى،ءوزى دەمالعان كۇندەرى كەزەكشىلىكتى وتكىزىپ العان ەرىكتىگە قاداعالاپ تاپسىرادى. ونىڭ اسەرىندە تارباعاتاي گازەتى مەكەمەسىنىڭ ەرىكتىلەرى رايحان،چىن يۇيجيە قاتارلىلار دا ءوز ەركىمەن قارياعا قارايلاسۋشىلاردىڭ قاتارىنا قوسىلدى. وسىلايشا،ءتىپتى دە كوپ ەرىكتى كۇش جالعاپ،توكەننىڭ كۇندەلىكتى تۇرمىسىنا قارايلاساتىن بولدى.
«تەلەفوندا شەشەمە حابارلاسقان سايىن ‹قىزىم،سەن الاڭداما،قازىر مەنىڭ ءبىر ەرىكتى قىزىم بار،ماعان جاقسى قاراپ جاتىر› دەيتىن» دەدى توكەننىڭ كىشى قىزى ءاليا اقىمەتقالي. شەشەسىنە ۋ گۇيرۇڭنىڭ قارايلاسىپ كەلە جاتقانىن بىلگەن سوڭ ءاليا قاتتى اسەرلەنىپتى. «وتباسىمىز اتىنان وعان ەرەكشە العىس ايتامىز،ول بەينە شەشەمنىڭ قورعاۋشىسى سياقتى،شەشەم ءۇشىن ابىگەرگە ءتۇسىپ،سونداي جاقسى قارايلاسىپتى» دەدى ول.
ۋ گۇيرۇڭ مەن ەرىكتىلەردىڭ وزىنە جاساعان قامقورلىعى مەن كومەگىنە العىس ايتۋدى ويلاپ جۇرگەن توكەن قامقا تۋ ۇسىنۋ ويىنا كەلىپتى. الايدا كەزىندە ۋ گۇيرۇڭ توكەنگە ءوزىنىڭ اتىن ايتپاعان بولاتىن،توكەن دە ونى «قىزىم» دەپ شاقىراتىن،قامقا تۋدى ۋ گۇيرۇڭنىڭ ءوز قولىنا تابىس ەتۋ ءۇشىن،توكەن مەن بالالارى ونىڭ اتى-ءجونىن جان-جاقتان سۇراستىرىپ ءجۇرىپ ارەڭ تاپقاندىقتان،العىستارىن ءبىلدىرۋدىڭ ءساتى تۇسكەنى وسى ەكەن.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى