ءتىلشىمىز سۇڭ جيانلياڭ،ەرىكتى ءتىلشى ما يانلين حابارلايدى. كوپشىلىك سۋ جەتكىزۋ ماشيناسىنىڭ الدىندا شىرەتكە تۇرىپ سۋ السا؛ الەۋمەتتىك اۋماقتىڭ قىزمەتكەرلەرى قارتتاردىڭ وتباسىنا شەلەك-شەلەك سۋ جەتكىزىپ بەردى. 1-ايدىڭ 3-كۇنى ساۋان اۋدانى سانداۋحىزى قالاشىعى ورمان الاڭى الەۋمەتتىك اۋماعى تاۋيۋان 3-مەرزىمدىك وڭتۇستىك رايونىندا سۋ توقتاپ قالعانىمەن، شۇعىل جوندەۋ بارىسىندا تۋىلعان ءتۇرلى ىستەر تۇرعىنداردىڭ جۇرەگىن جىلىتتى.
ءاسىلى 1-ايدىڭ 2-كۇنى تۇستەن كەيىن،تاۋيۋان 3–مەرزىمدىك وڭتۇستىك رايونىن سۋمەن قامدايتىن نەگىزگى سۋ قۇبىرى جارىلىپ، قاراستىلىعىنداعى تۇرعىندار سۋدان پايدالانۋعا امالسىز قالعان. الەۋمەتتىك اۋماق جاعدايدى ۇعىسقاننان كەيىن،دەرەۋ شۇعىل جوندەۋگە كىرىسىپ ءارى شۇعىل قاجەتتى قامداۋدى قامتاماسىزداندىرۋ مەحانيزمىن ىسكە قوسىپ، تۇرعىنداردىڭ سۋدان پايدالانۋ قيىنشىلىعىن بار كۇشپەن شەشتى.
ساۋان اۋداندىق قارت كادرلار مەكەمەسىنىڭ سانداۋحىزى قالاشىعى ورمان الاڭى الەۋمەتتىك اۋماعىندا تۇراتىن قىزمەت اترەتىنىڭ باستىعى ۋاڭ ۋىنجۇن: «ءۇرتىس قار جاۋعاندىقتان قۇبىردىڭ جارىلعان ورنىن بىردەن ءدال تابا المادىق. ءبىز ءبىر جاعىنان سۋمەن قامداۋ، سۋ ىعىستىرۋ سەرىكتەستىگىمەن جانە قوجالىق سەرىكتەستىگىمەن بىرگە جارىلعان جەرىن ىزدەپ،ءبىر جاعىنان اۋداندىق ءورت ءوشىرۋ،ورتتەن ساقتانۋ،قۇتقارۋ-كومەكتەسۋ ۇلكەن اترەتى ءۇرىمجى شىعىس جولى ءورت ءوشىرۋ، ورتتەن ساقتانۋ، قۇتقارۋ-كومەكتەسۋ پۋنكتىنەن كومەك سۇراپ، تۇرعىنداردىڭ سۋدان قالىپتى پايدالانۋىنا كەپىلدىك ەتتىك» دەدى.
كومەك سۇراۋ تەلەفونىن قابىلداعاننان كەيىن ءۇرىمجى شىعىس جولى ءورت ءوشىرۋ، ورتتەن ساقتانۋ،قۇتقارۋ-كومەكتەسۋ پۋنكتى دەرەۋ ءبىر ءورت ءوشىرۋ ماشيناسىن شىعارىپ، تۇرعىندارعا مىندەتتى تۇردە سۋ جەتكىزىپ بەرىپ،الدىمەن تۇرعىنداردىڭ ۋاقىتشا سۋدان پايدالانۋ قاجەتىن شەشتى. شاعىن رايونداعى ءبىر ءبولىم قارتتاردىڭ ءجۇرىس-تۇرىسى قولايسىز بولعاندىقتان، الەۋمەتتىك اۋماق قىزمەتكەرلەردى ۇيىمداستىرىپ سۋ جەتكىزىپ بەرىپ، ولاردىڭ سۋدان پايدالانۋ قيىنشىلىقتارىن شەشتى.
«سۋ توقتاپ قالسا تۇرمىسىمىزعا ىقپالى وتە زور،باعىمىزعا جاراي الەۋمەتتىك اۋماق بىزگە دەر كەزىندە سۋ جەتكىزىپ بەردى» دەدى تاۋيۋان 3-مەرزىمدىك وڭتۇستىك رايونىنىڭ تۇرعىنى جاۋ مانحۇڭ.
ورمان الاڭى الەۋمەتتىك اۋماعى پارتيا ياچەيكاسىنىڭ شۋجيى پان حۇيحۇي: «قاراستىلىعىمىزداعى رايونداعى تۇرعىنداردىڭ تۇرمىسىندا كەزىككەن قيىنشىلىقتارىن دەركەزىندە شەشۋ ءبىزدىڭ ماڭىزدى قىزمەتىمىز. وسى جولى شاعىن رايوندا سۋ توقتاعاندا،ءبىز قامداۋ- قامتاماسىزداندىرۋ مەحانيزمى رولىن ساۋلەلەندىرىپ، تۇرعىنداردىڭ سۋدان پايدالانۋ ماسەلەسىن دەر كەزىندە شەشتىك. ءورت ءوشىرۋ،قۇتقارۋ پۋنكتى مىندەتتى تۇردە 18 توننادان ارتىق سۋ جەتكىزىپ بەردى،سۋ جەتكىلىكتى بولعاندىقتان كوپشىلىكتىڭ تۇسىنۋىنە جانە قولداۋىنا يە بولدىق» دەدى.
قازىر تاۋيۋان 3-مەرزىمدىك وڭتۇستىك رايونىنداعى سۋمەن قامداۋ قۇبىر جولى شۇعىل جوندەلىپ، سۋدان پايدالانۋ جاعدايى قالىپقا ءتۇستى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى