□ ءتىلشىمىز ماقپال مىرزاقان
جۋىقتا لەنيالىق اۆتوكولىك شوفەرى جان گۋاڭحۇي گازەتىمىزدىڭ ىستىق لەنياسىنا تەلەفون بەرىپ،شاعانتوعاي اۋداندىق جولاۋشى تاسىمال بەكەتى شوفەرلەردىڭ بەلەت قاراجاتىن كەشەۋىلدەتكەندىكتەن،اۆتوكولىكتەردىڭ تاسىمالىن توقتاتقاندىعىن ايتىپ، قاتىستى تاراۋلاردىڭ شەشىم ەتۋىن ءۇمىت ەتتى.
جان گۋاڭحۇيدىڭ ايتۋىنشا،1- ايدىڭ 13-كۇنى شاعانتوعاي اۋدانىنان شاۋەشەك،ءدوربىلجىن،تولى،ءۇرىمجى سياقتى جەرلەرگە قاتىنايتىن لەنيالىق اۆتوكولىكتەر جولاۋشى تاسىمالىن توقتاتقان،بۇعان شاعانتوعاي اۋداندىق جولاۋشى تاسىمال بەكەتىنىڭ شينجياڭ شيڭتا تاسىمال توبى شاعانتوعاي اۋداندىق شۇندا بولىمشە سەرىكتەستىگىنىڭ 2019-جىلى 8-ايدان 2020-جىلى 1-ايعا دەيىنگى 5 ايلىق بەلەت قاراجاتىن كەشەۋىلدەتۋى سەبەپ بولعان ەكەن،وسى لەنيالاردا قاتىنايتىن شوفەرلەر وسى سەرىكتەستىككە تىزىمگە الدىرعاندىقتان،قاراجاتتىڭ دەر كەزىندە قولدارىنا تيمەۋى اۆتوكولىك يەلەرىنىڭ نارازىلىعىن قوزعاۋمەن بىرگە،بۇقارانىڭ جولاۋشىلاۋىنا قولايسىزدىق تۋدىرعان.
«جولاۋشى تاسىمالى بەكەتى ءبىزدىڭ 5 ايلىق بەلەت قاراجاتىمىزدى كەشەۋىلدەتتى،شاۋەشەك قالاسىنان شاعانتوعايعا قاتىنايتىن اۆتوكولىك شوفەرىنەن 11 ادام بارمىز،ورتا ەسەپپەن بىرىمىزگە 15 مىڭ يۋاننان تۋرا كەلەدى،مەنىڭ الاشاعىم 16 مىڭ يۋان» دەدى لەنيالىق اۆتوكولىك شوفەرى ليۋ ميڭ.
«ۇيىمىزدە جەكە اۆتوكولىك بولماعاندىقتان،ءار رەت شاۋەشەككە جۇمىسپەن بارعاندا ءۇنحات توبىنان اۆتوكولىك ىزدەيتىن بولدىق. قازىر بىزگە وتە قولايسىز بولدى،لەنيالىق اۆتوكولىك تاسىمالىنىڭ قالپىنا كەلۋىن ءۇمىت ەتەمىن» دەدى شاعانتوعاي اۋدانىنىڭ تۇرعىنى لي حانىم.
وسى سەبەپتى شاعانتوعاي اۋداندىق جولاۋشى تاسىمالى بەكەتىنىڭ باستىعى لو جيانجۇن مەن شينجياڭ شيڭتا تاسىمال توبى شاعانتوعاي اۋداندىق شۇندا بولىمشە سەرىكتەستىگىنىڭ ديرەكتورى يۇي شوۋيۇڭگە ايىرىم-ايىرىم حابارلاسىپ،لەنيالىق اۆتوكولىكتەر تاسىمالىنىڭ توقتاۋى مەن قاراجاتتى كەشەۋىلدەتۋ جونىندەگى ماسەلەلەردى سۇراستىردىم.
ۇعىسۋعا قاراعاندا،شاعانتوعاي اۋداندىق جولاۋشى تاسىمال بەكەتى توڭىرەگىندە تەمىر جولدىڭ قاتىناۋى، كەزەكشى ۇشاقتاردىڭ اۋە لەنيالارىنىڭ كوبەيۋى سياقتى سەبەپتەردەن جولاۋشى تاسىمال مولشەرى تومەندەپ،قازىر جولاۋشى تاسىمال بەكەتى زيان تارتا باستاعان. زياندى ازايتۋ ءۇشىن،قىزمەتكەرلەردى بۇرىنعى 20 نەشە ادامنان 16 ادامعا قىسقارتىپتى.
لو جيانجۇن: «قازىرگە دەيىن جۇمىسشى-قىزمەتشىلەرگە 7 ايلىق ەڭبەكاقى تاراتىلمادى،ءبىز ۇكىمەتتىڭ قاتىستى تاراۋلارىنا جاعدايدى اڭىس ەتتىك،ساياساتتىق جاقتان كومەككە يە بولۋدى ءۇمىت ەتەمىز» دەدى.
ۇعىسۋعا قاراعاندا،شاعانتوعاي اۋداندىق جولاۋشى تاسىمال بەكەتى ءتۇرلى تاسىمال سەرىكتەستىگىنىڭ ءبىر ميلليون 800 مىڭ يۋاننان استام بەلەت قاراجاتىن تولەي الماي وتىر ەكەن،مۇنىڭ ىشىندە،شينجياڭ شيڭتا تاسىمال توبى شاعانتوعاي اۋداندىق شۇندا بولىمشە سەرىكتەستىگىنە 860 مىڭ يۋان بەرەشەك ەكەن.
يۇي شوۋيۇڭ: «كەزەكتە شاعانتوعاي اۋداندىق جولاۋشى تاسىمال بەكەتى لەنيالىق اۆتوكولىك شوفەرلەرىنىڭ بەلەت قاراجاتىن ۋاعىندا بەرە الماۋىنداعى باستى سەبەپ سەرىكتەستىكتە قارجى تاپشى بولۋىندا. اۆتوكولىك يەلەرى اڭىس ەتكەن ماسەلەلەردى بەلسەنە شەشىم ەتىپ،اۆتوكولىك يەلەرىمەن قارىم-قاتىناستى كۇشەيتۋمەن بىرگە،شاعانتوعاي اۋداندىق جولاۋشى تاسىمال بەكەتىمەن قىزمەتتى سايكەستىرىپ نەمەسە زاڭدىق ءتارتىپ ارقىلى اۆتوكولىك يەلەرى الۋعا ءتيىستى قاراجاتتى تاراتىپ بەرەمىز» دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى