مەملەكەتتىك ەلەكتر تورى شاعانتوعاي اۋداندىق ەلەكترمەن قامداۋ سەرىكتەستىگىنىڭ اق تەرەك ەلەكترمەن قامداۋ بولىمشەسى ___
□تىلشىلەرىمىز داي جياۋمەي
ماقپال مىرزاقان
2021-جىلعا قادام تاستاعاننان بەرى ارت-ارتىنان جاۋعان بىرنەشە رەتكى قالىڭ قاردان سوڭ، مەملەكەتتىك 4A دارەجەلى كورىنىس ءوڭىرى ەسەپتەلەتىن بارلىق تاۋى كورىنىس ءوڭىرى اق قارعا ورانىپ،قاسات قار تىزەدەن كەلدى. 1-ايدىڭ 22-كۇنى شاعانتوعاي اۋدانىندا تاعى دا 7 بال قارلى بوران سوعىپ،اق تۇتەك بوران ءتۇن بويى تولاستامادى.شۇعىل كومەك قاجەت! شۇعىل كومەك قاجەت! بيڭتۋان 9-شىسى 161- تۋانىنىڭ كەرنەۋ وزگەرتكىش سىم جولىندا كىنارات تۋىلىپ،كوپتەگەن تۇرعىنداردىڭ ۇيىندە توك توقتاپ قالدى...
جەلدىڭ وتىنە ورنالاسقان بارلىق تاۋلى وڭىرىندە ءار جىلى قىستا قارلى بوران ءجيى سوعادى،مۇندايدا ەلەكتر قىسىمى تۇراقسىز بولىپ،ەلەكتر سىم جولىنان ۇنەمى كىنارات شىعاتىندىقتان،مەملەكەتتىك ەلەكتر تورى شاعانتوعاي اۋداندىق ەلەكترمەن قامداۋ سەرىكتەستىگىنىڭ اق تەرەك ەلەكترمەن قامداۋ بولىمشەسىندەگى قىزمەتكەرلەر اۋىر سىنعا ءدوپ كەلەدى. ءار جولى وسىنداي ىسكە جولىققاندا بولىمشە باستىعى گى جى-يۋان مەن قىزمەتتەستەرى قاي-قاشان دا ساقاداي سايلانىپ،قۇرال-جابدىقتارىن الا سالىپ دەرەۋ اتتانادى.
بارلىق تاۋىنىڭ باۋرايىنداعى جانكىسى اۋىلىنىڭ شاعانتوعاي قىستاعىنا ورنالاسقان اق تەرەك ەلەكترمەن قامداۋ بولىمشەسى 2012-جىلى قۇرىلعان،شاعانتوعاي اۋدان قالاشىعىنان 30 كيلومەتر شالعايدا. قاراستى اۋماقتاعى 10 كيلوۆولتتىق جانە ودان تومەن ەلەكتردى ۇلەستىرۋ مىندەتىنە جاۋاپتى،ەلەكترمەن قامداۋ اۋماعى 2500 شارشى كيلومەتر بولىپ،3 اۋىل،فەرمانى،بيڭتۋان 9-شىسى 161-تۋانىنىڭ 14 ليان-دۇيىنىڭ جانە ماڭىزدى مەملەكەتتىك قورعانىس ورگاندارىن ەلەكترمەن قامداۋ مىندەتىن ۇستىنە العان.
بۇل ارانىڭ قىسى ۇزاق ءارى سۋىق بولادى،جولداعى قاسات قاردىڭ قالىڭدىعى 2 مەترگە دەيىن جەتەدى. ءار جىلى قىستا تاۋلى وڭىردەگى جولدار نەگىزىنەن توسىلىپ قالادى.
بيىل 58 جاستاعى گى جى-يۋان ساقا پارتيا مۇشەسى،ول بولىمشەدەگى 6 قىزمەتكەرمەن بىرگە ءار كۇنى 256 كيلومەتر كەلەتىن ەلەكتر جەلىسىن تەكسەرەدى،مۇنىڭ 20 نەشە شاقىرىم جەرى قارى قالىڭ تاۋ جولى بولعاندىقتان،شارلاۋ قىزمەتىنىڭ ماشاقاتى ايتپاسا دا تۇسىنىكتى. الايدا قاراستى اۋماقتاعى تۇرعىنداردىڭ ەلەكتردەن حاۋىپسىز،قالىپتى پايدالانۋىنا كەپىلدىك ەتۋ ءۇشىن،گى جى-يۋان مەن قىزمەتتەستەرى بويكۇيەزدىككە سالىنباي،ءار كۇنگى شارلاۋ مىندەتىن تاباندىلىقپەن ورىنداپ كەلەدى.
«ءبىزدىڭ باستى مىندەتىمىز — ەلەكتر جابدىقتارى مەن توك جولدارىنا تەكسەرۋ جۇرگىزىپ،ەلەكتر جابدىقتارى مەن توك جولدارىندا ساقتالعان ماسەلەنى دەر كەزىندە بايقاپ، ماسەلەنىڭ تۋىلۋ سەبەبىنە تالداۋ جاساپ،كومەسكى قاتەر مەن ەلەكتر قۋاتى كىناراتىن دەر كەزىندە جويۋ. قاي جەردە ەلەكتر قۋاتىنان كىنارات شىقسا،ءبىز تىزگىن ۇشىمەن سول اراعا جەتەمىز» دەدى گى جى-يۋان.
«ءار جولى ەلەكتردەن كىنارات تۋىلعاندا مەيلى قارلى بوران بولسىن،الدە جارىم تۇندە نەمەسە تاڭ سارىدە بولسىن تەلەفون بەرسەك بولعانى، ەلەكترمەن قامداۋ بولىمشەسىنىڭ قىزمەتكەرلەرى دەر كەزىندە كەلىپ تەكسەرىپ،جوندەپ بەرەدى» دەدى شاعانتوعاي قىستاعى پارتيا ياچەيكاسىنىڭ شۋجيى يە شيانحۋا.
شۇي مەيحاۋ اق تەرەك ەلەكترمەن قامداۋ بولىمشەسىندەگى ەڭ جاس قىزمەتكەر،قىزمەتكە شىققانىنا ەندى عانا ەكى جىل تولعان. ۇيرەنۋگە ىنتالى شۇي مەيحاۋ ءار جولعى شارلاۋدان قايتىپ كەلگەن سوڭ،شارشاپ- شالدىققانىنا قاراماستان،گى جى-يۋان قاتارلى اعا بۋىنداردان ەلەكتر قۋاتى،ەلەكتر جەلىسى جونىندەگى بىلىمدەر مەن ەلەكتر باعاناسىنا شىعۋ شەبەرلىگىن ۇيرەنەدى. قازىر ول قىزمەتتى دەربەس ءوزى ىستەي بەرەتىن بولدى.
«جاڭا كەلگەن كەزىمدە ەشتەڭەنى بىلمەيتىنمىن،گى بولىمشە باستىعىنىڭ جانە قىزمەتتەستەرىمنىڭ قولما-قول ۇيرەتۋىنىڭ ارقاسىندا قازىر ەلەكتر قۋاتى جاعىنداعى نەگىزدىك بىلىمدەردى يگەرىپ،كىشى –گىرىم ماسەلەلەردى شەشە الاتىن بولدىم» دەدى شۇي مەيحاۋ.
اق تەرەك ەلەكترمەن قامداۋ بولىمشەسى العاش قۇرىلعان كەزدە قىزمەتكەر از،ورتا شارت-جاعدايى جاپالى،قاتىناس قولايسىز بولعاندىقتان، ەلەكتر سىم جولدارىن جوندەۋگە اتپەن،شانامەن شىعاتىن،قارلى بورانعا كەز بولسا الدەنەشە كۇن بويى قايتىپ كەلە الماي قالاتىن،قارنى اشسا جول ازىقتارىن تالشىق قىلىپ،قارمەن شولدەرىن باسىپ،كەشتە مالشىلاردىڭ ۇيىنە قوناتىن. سول ءبىر جاپالى كۇندەر گى جى-يۋاننىڭ ەسىنەن كوتەرىلىپ كورگەن ەمەس.
«قاريدارلاردى رازى ەتىپ، ۇكىمەتتى الاڭنان ارىلتۋ» اق تەرەك ەلەكترمەن قامداۋ بولىمشەسىندەگى قىزمەتكەرلەردىڭ بارلىق قىزمەتىنىڭ شىعار ءتۇيىنى مەن تابان تىرەر تياناعى. «ءبىزدىڭ بۇل جەردە ەلىمىزگە ايگىلى اق تەرەك قاراۋىل ورنى بار،اق تەرەك ەلەكترمەن قامداۋ بولىمشەسى باستان-اقىر اق تەرەك رۋحىن نىسانا ەتىپ،شەكارانى تاپجىلماي قورعاپ،شەكارا قورعانىسى قاراۋىل ورنىنداعى كوماندير- جاۋىنگەرلەردىڭ وتاندى قورعاپ،شەكارانى كۇزەتۋى مەن شەكاراداعى حالىقتىڭ تۇرمىسىن،ءوندىرىسىن ەلەكترمەن پارمەندى قامتاماسىز ەتىپ كەلەدى» دەدى گى جى-يۋان.
كوپ جىلداردان بەرى اق تەرەك ەلەكترمەن قامداۋ بولىمشەسى بيڭتۋانمەن،شەكارا قورعانىس قاراۋىل ورنىمەن،مالشىلارمەن سەلبەسە وتىرىپ،قات-قابات قيىنشىلىقتاردى جەڭىپ،كوپ جاقتىڭ جاقسى باعاسىن الىپ،ىلگەرىندى-كەيىندى «جۇڭگوداعى تاڭداۋلى ەڭ ىزگى ەلەكترمەن قامداۋ بولىمشەسى»، «مەملەكەتتىك ەلەكتر تورى سەرىكتەستىگىندەگى وزات گرۋپپا» سياقتى ماراپاتتارعا يە بولىپ،اق تەرەك ەلەكترمەن قامداۋ بولىمشەسىن مەملەكەتتىك ەلەكتر تورى ماركاسىنىڭ اسەم كورىنىس جەلىسىنە اينالدىردى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى