ءتىلشىمىز لي ميڭشىڭ حابارلايدى. جۋىقتا شاعانتوعاي اۋدانى شاعانتوعاي مال فەرماسى اقتەكشە مالشىلار جاڭا قىستاعىنا بارعانىمىزدا قاز-قاتار سالىنعان قىزىل توبەلى بەيقۇت ۇيلەردىڭ ارت جاعىنا سالىنعان مال قورا مەن مال قورانىڭ جانىندا ءشوپتىڭ توبە بولىپ جينالعاندىعىن كوردىك.
اقتەكشە مالشىلار جاڭا قىستاعىنىڭ تۇرعىنى قۋانىشتىڭ وتباسىندا 200 دەن استام قوي بار. قۋانىش: « بۇرىن قىس كىرىسىمەن مالدى قىستاۋلىقتا باعاتىنبىز، الايدا اۋا رايى ناشار كەزدەردە مالدان كوپ شىعىن شىعاتىندىقتان كىرىسىم ماندىمايتىن. ال وتىرىقتانعاننان كەيىن جەم-ءشوپ دايىنداۋ شارت –جاعدايى جاقسى بولدى. قازىر مالدىڭ قىستان حاۋىپسىز ءوتۋ ءۇشىن 8 توننا جەم-ءشوپ دايىنداپ الدىم» دەدى.
شاعانتوعاي اۋدانى مال شارۋاشىلىعىن نەگىز ەتكەن اۋدان، دەسەدە مال اپاتى وڭاي تۋىلاتىن اۋدان. مال شارۋاشىلىعىنىڭ اپاتتان ساقتانۋ، اپاتتى ازايتۋ قۋاتىن كۇشەيتۋ ءۇشىن، وتكەن جىلى شاعانتوعاي اۋدانى اپاتتان ساقتانۋ جەم-ءشوپ قويماسى قۇرىلىسى ينجەنەرياسىن بەلسەنە اتقارىپ، مال شارۋاشىلىعىنىڭ اپاتقا شۇعىل توتەپ بەرۋدەگى جەم-ءشوپ ساقتاۋ قويماسىنان 9 ىن سالدى. بيىل تاعى 2 ميلليون قارجى شىعارىپ، جانكىسى اۋىلى، جاڭاجەر اۋىلى جانە التىن ەمىل اۋىلىنا جەم-ءشوپ ساقتاۋ قويماسىن سالىپ بەرىپ، اۋدان، اۋىل، مالشى سياقتى 3 دارەجەلى جەم-ءشوپ ساقتاۋ ءتۇزىمىن اتقارىپ، مالدىڭ قىستان حاۋىپسىز وتۋىنە كەپىلدىك ەتتى.
جەم-ءشوپ ساقتاۋ مەحانيزمىن ىلگەرىلەتۋدەن ءتىس، شاعانتوعاي اۋدانى تاعى 10 مىڭ مۋلىق جەم-ءشوپ ساقتاۋ بازاسىن قۇرۋمەن بىرگە، تابيعي جەم-ءشوپ پەن جاساندى جايلىمدى ءوزارا ۇشتاستىرىپ، جەم-ءشوپ قاينارىن مولايتتى ءارى وسى ءادىس-شارالار ارقىلى شاعانتوعاي اۋدانىنداعى 500 مىڭ مالدىڭ قىستان حاۋىپسىز وتۋىنە كەپىلدىك ەتتى.
جۋىقتا شاعانتوعاي اۋداندىق جەم-ءشوپتى باسقارۋ ورتالىعىنىڭ جەم-ءشوپ قامباسىنا بارعانىمىزدا ءبىرقانشا مالشىلاردىڭ جەم-ءشوپتى تومەن باعادا ساتىپ الىپ جاتقاندىعىن كوردىك.
جاڭاجەر اۋىلىنىڭ تۇرعىنى تۇرسىن: «بيىل قوراعا تاعى 50 قوي كوبەيگەندىكتەن، دايىنداعان جەم- ءشوبىم جەتپەي قالاما دەپ، شاعانتوعاي اۋداندىق جەم-ءشوپ قامباسىنان تومەن باعادا 5 توننا جەم-ءشوپ ساتىپ الدىم» دەدى.
ۇعىسۋعا قاراعاندا، بيىل شاعانتوعاي اۋدانى 290 مىڭ توننا جەم-ءشوپ دايىنداۋدى جوسپارلاعان ەكەن.
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.