حۋ گۇييڭ
جيتيان جىڭفۋ جاپونيانىڭ ءبىر كىشى-گىرىم ساۋداگەرى ەدى. ءبىر جىلى جازدا ول فيليپينگە دەمالعالى بارادى. كەشتە ول حانىمىمەن بىرگە تەڭىز قايراڭىندا سەرۋەندەپ كەلە جاتىپ، ءبىر توپ بالانىڭ تەڭىز قايراڭىنداعى تاس قۋىسىنان الدە نەنى ىزدەپ ۇيلىعىسىپ تۇرعانىن كورەدى دە قاستارىنا بارادى. بالالاردىڭ تاس قۋىسىنان كىشكەنتاي راكتاردى الىپ شىققانىن كورەدى. بۇل كىشكەنتاي راكتار جۇپ-جۇبىمەن قوساقتالىپتى، تاستىڭ قۋىسىنان الىپ شىققاننان كەيىن دە ءبىر- بىرىنەن وڭاي اجىرامايدى، شىنىندا عاجايىپ ەدى. مۇقيات قاراپ كورسە، ولاردىڭ دەنەلەرى ءبىر- بىرىنە مىقتاپ جالعاسىپتى. بۇل راكتار قالايشا بۇلاي بولىپ قالدى ەكەن؟ جيتيان جىڭفۋ بۇعان قىزىعىپ قالعان سوڭ، قاسىندا تۇرعان ءبىر بالىقشىدان مۇنىڭ ءمان-جايىن سۇرايدى. بالىقشى بۇل راكتاردىڭ ءاسىلى ىستىق بەلدەۋ وڭىرىندە تىرشىلىك ەتەتىنىن، كىشكەنە كەزىندە تەڭىز تولقىنىنىڭ قايراڭداعى تاس قۋىستارىنا اعىزىپ اكەلگەنىن، تەڭىز تاسقىنى قايتقاننان كەيىن ولاردىڭ وسىندا قالىپ قويىپ، تاس قۋىسىندا اقىرىنداپ ءوسىپ، ەركەك-ۇرعاشىدان قوسارلانىپ، كەيىننەن ءبىر-بىرىنەن اجىراماي قالاتىنىن، مۇنداي راكتاردىڭ تۇرقى وتە شاكەنە بولعان سوڭ، ازىقتىق قۇنى دا تومەن بولاتىندىقتان، بالىقشىلاردىڭ ولاردى اۋلامايتىنىن، تەك بالالاردىڭ عانا ۇستاپ اكەلىپ، تاس سالىنعان بالىق كۇبىسىندە باعىپ ەرمەك قىلاتىنىن، سىرت جەرلەردەن كەلگەن ساياحاتشىلاردىڭ ەستەلىك ءۇشىن ازىراق الا كەتەتىنىن ايتادى. بۇلار كەتەرىندە الگى بالالار وزدەرى ۇستاعان راكتان بىرنەشەۋىن تارتۋ ەتەدى.
جيتيان جىڭفۋ جاتىن ورنىنا قايتىپ كەلگەن سوڭ، تۇندە شىراق ساۋلەسىندە راكتاردى باقىلايدى. بۇل راكتاردىڭ تۇتاس دەنەسى ءموپ-ءمولدىر، توتەنشە ادەمى ەكەن. قۇددى قوس-قوستان جۇپتاسقان عاشىقتاردان اۋمايدى. ول ساناسىنا كەلە قالعان وسى ءبىر بولىمسىز قيال ۇشقىنىنان ەرەسەن ءىرى ساۋدا ورايىن بايقاپ قالادى. جاپونياعا قايتقاننان كەيىن جيتيان جىڭفۋ نەكە ساۋعاسى دۇكەنىن اشىپ، ارناۋلى وسى راكتى ساۋدالايدى. ولاردى جىڭىشكەلىكپەن مانەرلەپ، ارلەپ، «جۇبىن جازبايتىن قوساقتار » دەگەن ادەمى ات قويىپ، ساۋعا قورابىنا مۇنداي راكتاردىڭ دۇنيەگە كەلگەننەن تىرلىگىنىڭ اقىرىنا دەيىن بىرگە جاسايتىن؛ ولگەن سوڭ دا ءبىر- بىرىنەن اجىرامايتىن تۇسىندىرمەسىن جازىپ قويادى. مۇنداي راكتار توكيو بازارىندا ءبىر مەزگىل ەرەكشە ءوتىمدى نەكە ساۋعاسىنا اينالىپ، جيتيان جىڭفۋ دا اتاعى شىعىپ، ەلدىڭ ءبارى قىزىعا قارايتىن ساۋدا سەركەسىنە اينالادى.
اۋدارعان-قانات جۇماش ۇلى
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.