انارگۇل باقىتبەك قىزى
كۇيزەلتسە كەيدە ماڭدايدىڭ سورى،
باقىتسىزدىققا بالاما ونى.
تەرەڭدەي تولعان، تارىقپا ءبىراق،
ءومىردىڭ جولى ارمانعا تولى.
ءبىر كورگەن ءتۇسىن ىزدەپ تە قۋعان،
جاستىعىن جاندار ۋاقىتپەن جۋعان.
سوقپاقتاردا سۇرىنبەي وتەر،
ساپارعا بەلىن بەكەمدەپ بۋعان.
وتەرسىڭ سولاي كۇندەردى ساناي،
ەلەستىڭ سەزبەي كەتكەنىن قالاي.
تىلەگىم مەنىڭ تىرلىكتە مىناۋ،
تاڭدارىڭ كۇلىپ شاشىلسىن اراي.
بىرىنە جەتسەڭ ىزدەيتىن ءبىرىن،
بىلمەيسىڭ پاي-پاي ارماننىڭ ءتىلىن.
قانىڭ بوپ تۋلاپ تامىردا تاسىپ،
جالعاسىپ جاتار جۇرەكپەن ءۇنىڭ.
مۇراتىڭ ايتسا تاعدىردىڭ ءانىن،
تامسانتىپ تالعام تاتىرسىن بالىن.
ارعىماق اتتاي ارىندا دوسىم،
بيىكتەي بەرسىن ارمانىڭ، جانىڭ.
جەتكىزبەي مەيلى جۇرسەدە نە ءبىر،
ۇمىتتەن كۇدەر ۇزبەسىن كوڭىل.
بولاشاق الدا، شەگىنبە ارتقا،
ارمانسىز ءومىر - تالعامسىز ءومىر.
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.