ەرىكتى تىلشىلەر دارقان، ۋاڭ شۇيدۇڭ حابارلايدى. ” مەيىربان اعالار ۇجىمىنىڭ بىزگە 5000 يۋان بەرگەنىنە راقىمەت“ دەدى جۋىقتا تولى اۋدانى تولى قالاشىعىنىڭ مادەنيەت كوشەسى الەۋمەتتىك اۋماعىنداعى ەڭ تومەنگى تۇرمىسى قامتاماسىزداندىرىلاتىن تۇرعىن جاڭ ديانشياڭ.
جاڭ ديانشياڭنىڭ وتباسىندا 4 جان بار، ەڭبەككۇش كەمشىل، قيىنشىلىعى ءبىرشاما اۋىر بولعاندىقتان، مەيىربان اعالار ۇجىمى ونىڭ وتباسىنا 5000 يۋان حال سۇراۋ قاراجاتى مەن تۇرمىستىق بۇيىمدار جەتكىزىپ بەردى.
تولى اۋدانىنىڭ مەيىربان اعالار ۇجىمى 2020 -جىلى 3 -ايدا قۇرىلعان، ۇجىم قۇرامىندا جەكە ساۋداگەرلەر، ەركىن كاسىپكەرلەر جانە ۇكىمەت قىزمەتكەرلەرى بار.
ۇجىم مۇشەسى شياۋ شينميڭ:” ۇجىم قۇرامى حانزۋ، قازاق قاتارلى ۇلتتاردان قۇرالعان، ۇجىمدى قۇرۋداعى ماقساتىمىز قيىنشىلىعى بار جاندارعا كومەك قولىن سوزۋ بولاتىن“ دەدى.
قازىرگە دەيىن ۇجىم مۇشەلەرى باستاپقى 35 ادامنان كوبەيىپ، 500 ادامعا جەتكەن. ۇجىمنىڭ كولەمدەنۋىنە ىلەسە كومەكتەسۋ -سۇيەمەلدەۋ قۋاتى دا ارتىپ، اي سايىن قيىنشىلىعى بار 3 وتباسىنا كومەكتەسە الاتىن بولعان. كوپشىلىك وزدەرى قارجى توپتاپ، ءار ۇلت بۇقاراسىنا مەيىر جەتكىزىپ، قامقورلىق جاساپ كەلەدى.
سونىمەن بىرگە، ۇجىم مۇشەلەرى شاعانتوعاي اۋدانى شاعانتوعاي مال فەرماسى شاعانتوعاي قىستاعىنىڭ تۇرعىنى قاليپا ءماسالىمنىڭ وتباسىنا بارىپ حال سۇرادى. قاليپا:”بۇل ولاردىڭ بىزدەن 2 -رەت حال سۇراي كەلۋى، قيىنشىلىعىمىزدى دەر كەزىندە شەشكەندەرى مەنى قاتتى اسەرلەندىردى، ولارعا العىس ايتامىن“دەدى.
ۇعىسۋعا قاراعاندا، مەيىربان اعالار ۇجىمى قۇرىلعاننان بەرى 24 رەت حال سۇراۋ قيمىلىن ورىستەتىپ، جىلۋ اتاپ، كومەكتەسىپ -سۇيەمەلدەۋگە جالپى 350 مىڭ يۋان قارجى جۇمساعان ەكەن.
ۇجىم جاۋاپتىسى ورەن مۇقتار: ” ءوزارا كومەكتەسۋ جۇڭحۋا ۇلتىنىڭ ءداستۇرلى تاماشا ءمورالى، ءبىر نيەتپەن ىنتىماقتاسىپ، لەي فىڭ رۋحىن اسقاقتاتىپ، كورىكتى دە جاراسىمدى تولى قۇرۋعا ءوز كۇشىمىزدى ارنايمىز“ دەدى.
رەداكتورى : اراي ەركىن قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى