ءتىلشىمىز زىڭ جاۋمەي، ەرىكتى ءتىلشى حى شياۋيىڭ حابارلايدى. ساۋان قالاسى ۇلانۇس قالاشىعى حۋاڭجيالياڭ جاڭا قىستاعى دۇڭحايزى گرۋپپاسىنىڭ قىستاق تۇرعىنى سۋ يۋانيۋاننىڭ اۋلاسىنداعى قالتقىدا ساۋان قالالىق وقۋ -اعارتۋ جانە عىلىم -تەحنيكا مەكەمەسىنىڭ قىستاقتا تۇراتىن قىزمەت اترەتىنىڭ مۇشەلەرى، قىستاق ”ەكى كوميتەتىنىڭ“ كادرلارى، كورشىلەرى بولىپ ون نەشە ادام جەر تەگىستەپ، كوشەتتى رەتىمەن ءتىزىپ، سۋ سەۋىپ، قۇممەن قىمتاپ، سۋلياۋ جارعاق جاتقىزىپ، ونىڭ ءتاتتى كارتوپ مايساسىن جەتىلدىرۋىنە كومەكتەسىپ، كوپشىلىك جۇمىستى سەلبەسىپ ءبولىسىپ، ايتقىزباي –اق ءوزارا سايكەسىپ، مۇرىندارىنا سۋ جەتپەي قاربالاس بولىپ جاتىر ەكەن.
”پارتيانىڭ جاقسى كادرلارىنا راقىمەت، بۇقارانىڭ جۇمىسىن كوكەيلەرىنە ساقتاپ، ادام كۇشى وتە قاجەت بولىپ وتىرعان كەزدە ولار جەتىپ كەلدى، جاپادان، ارىپ - شارشاۋدان قورىقپادى، ولار قىستاق تۇرعىندارىنا كومەكتەسىپ، ۋايىمنان ارىلتىپ، قيىنشىلىقتارىن دەر كەزىندە شەشەتىن ناعىز ’شۇعىل قۇتقارۋ اترەتى‘، وتكەن جىلى قىستاقتىڭ ءبىرىنشى شۋجيى كومەكتەسىپ تىكە تاراتىلىمدا ءتاتتى كارتوبىمىزدى ساتىپ، قىستاعىمىز ءتاتتى كارتوپتىڭ مۋىنان 1000 يۋان كىرىس كىرگىزدىك، كادرلاردىڭ قولداۋىندا، ءتاتتى كارتوپ ەگۋ سەنىمىمىز ارتا ءتۇستى“ دەدى قاتتى اسەر قۇشاعىنداعى سۋ يۋانيۋان.
وتكەن جىلى سۋ يۋانيۋان 60 مۋ جەرگە ءتاتتى كارتوپ ەككەن، بيىل 70 مۋ جەرگە ەكپەكشى.
حۋاڭجيالياڭ جاڭا قىستاعى دۇڭحايزى گرۋپپاسىندا 40 جىل ءتاتتى كارتوپ ەككەن تاجىريبەلەرى بار، قىستاقتىڭ توپىراعىندا سەلەن ەلەمەنتى مول بولعاندىقتان، ەككەن ءتاتتى كارتوپتارى حوش ءيىستى، جۇمساق، ءدامدى بولادى دا شينجياڭنىڭ ءىشى-سىرتىنا ساتىلادى، دۇڭحايزى ماركاسىن دا تىزىمگە الدىرىپ العان. وسى ەكى جىلدا ءار جىلى قىستاقتاعى 23 تۇرعىن 93 قالتقىدا ءتاتتى كارتوپ كوشەتىن جەتىلدىرىپ، بۇل ءتاتتى كارتوپ كوشەتىنەن قىستاق تۇرعىندارى 150 مىڭ يۋان كىرىس كىرگىزىپ وتىر ەكەن.
سۋ يۋانيۋاننىڭ اۋلاسىندا 6 قالتقى بار، ءار قالتقى 0.3 مۋ، 120 مىڭ ءتۇپ ءتاتتى كارتوپ كوشەتىن جەتىلدىرىپ شىعارا الادى، وسى كوشەتتىڭ ءبىر ءبولىمىن وزدەرى ىستەتۋدەن سىرت، ءبىر ءبولىمىن ءۇرىمجى جانە كورشىلەس اۋىل-قالاشىق، تۋان-الاڭدارعا ساتادى.
حۋاڭجيالياڭ جاڭا قىستاعىندا تۇراتىن قىزمەت اترەتىنىڭ باستىعى، قىستاقتىڭ ءبىرىنشى شۋجيى جۋ دىڭ: ”سورتتى جاڭالاپ، سەلەن قۇرامى مول ءتاتتى كارتوپ كوشەتىنىڭ ساپاسىن جوعارىلاتۋ ءۇشىن، ءار جىلى قىستاق تۇرعىندارى وزدەرى جەتىلدىرگەن ءتاتتى كارتوپ كوشەتىنىڭ ءبىر ءبولىمىن وزدەرى ىستەتىپ، ءبىر ءبولىمىن ساتىپ، ىشكى ولكەدەن جانەدە ءبىر ءبولىم جاڭا سورتتى ءتاتتى كارتوپ كوشەتىن ساتىپ اكەلىپ، سەلەن قۇرامى مول ءتاتتى كارتوپ ەگۋدەن مول ءونىم الىپ، مول كىرىس كىرگىزۋگە ساقاداي سايلانادى“ دەدى.
ەگىس ۋاقىتى كۇتىپ تۇرمايدى، 93 قالتقىدا ءتاتتى كارتوپ كوشەتىن جەتىلدىرۋ جۇمىسى ءبىر-ەكى اپتا اينالاسىندا، ءسوزسىز، سوڭىنا شىعۋى كەرەك، سول ءۇشىن 4 -ايدىڭ باس شەنىندە تۇتاس قىستاقتاعى 1500 مۋ جەرگە ءتاتتى كارتوپ كوشەتىن ساتىمەن وتىرعىزىپ بولۋعا شىنايى كەپىلدىك ەتىلەدى ەكەن.
”بۇقارانىڭ جۇمىسىنىڭ ءبارى ماڭىزدى، بولماشى ىستەن شىنايى سۇيىسپەنشىلىكتى اڭعارۋعا بولادى. الداعى جەردە، جالعاستى ءتىپتى دە كوپ وتباسىلارىنا بارىپ، قيىنشىلىقتارىن شەشىپ، قامقورلىق كورسەتىپ، بار ىنتا -پەيىلىمىزبەن ءاربىر جۇمىستى تىڭعىلىقتى ىستەپ، ولشەمدى ءتاتتى كارتوپ كوشەتىن جەتىلدىرۋ قالتقىسىن قۇرىپ، جوعارى ساپالى، مول ءتۇسىمدى ءتاتتى كارتوپ كوشەتىن جەتىلدىرىپ، دۇڭحايزى ماركالى سەلەن قۇرامى مول ءتاتتى كارتوپ كوشەتىن جەتىلدىرۋگە بەلدى بەكەم بۋا كىرىسەمىز“ دەدى جۋ دىڭ.
رەداكتورى : الماگۇل اقاتبەك قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى